1 SAMUEL 31
31
Ang Pagkapatay ni Saul kag sang Iya mga Lalaking Anak
(1 Cron. 10:1-12)
1Karon ang mga Filistinhon nag-away batok sa Israel; kag ang mga lalaki sang Israel nagpalagyo gikan sa atubangan sang mga Filistinhon, kag nagkapukan nga patay sa Bukid nga Gilboa. 2Kag ang mga Filistinhon nagdusdus gid kay Saul kag sa iya mga anak; kag ginpatay sang mga Filistinhon si Jonatan kag si Abinadab kag si Melquisua, ang mga anak ni Saul. 3Ang inaway matama batok kay Saul, kag nalambut sia sang mga manugpana; kag napilasan sia sing daku bangud sang mga manugpana. 4Niyan si Saul nagsiling sa iya manugdala sang hinganib, “Gabuta ang imo espada, kag palapsa ini sa akon, basi nga magkari ini nga mga dicircuncidado kag palapsan ako, kag hampangan ako.” Apang ang iya manugdala sang hinganib indi buut; kay nahadluk sia sing tama. Busa gingabut ni Saul ang iya espada kag ginhap-an ini. 5Kag sang nakita sang iya manugdala sang hinganib nga si Saul napatay, sia man naghapa sa iya espada, kag napatay upud sa iya. 6Sa amo si Saul napatay, kag ang iya tatlo ka anak, kag ang iya manugdala sang hinganib, kag ang tanan niya nga tawo, sa amo nga adlaw sing tingub. 7Kag sang nakita sang mga tawo sang Israel nga yara sa pihak sang nalupyakan, kag sang mga yara sa tabok sang Jordan nga nalagyo ang mga tawo sang Israel kag nga si Saul kag ang iya mga anak patay na, ginbayaan nila ang mga banwa kag nagpalagyo; kag ang mga Filistinhon nag-abut kag nagpuyo sa ila.
8Sa madason nga adlaw, sang nag-abut ang mga Filistinhon sa paghublas sang mga pinatay, nasapwan nila si Saul kag ang iya tatlo ka anak nga napukan sa Bukid nga Gilboa. 9Kag ginpunggol nila ang iya olo, kag ginhuksan sang iya hinganib, kag ginpadala sa duta sang mga Filistinhon palibut, sa pagdala sang mga balita sa balay sang ila mga diosdios kag sa katawohan. 10Ginbutang nila ang iya hinganib sa balay sang Astarot; kag ginlansang nila ang iya bangkay sa kuta sang Bet-san. 11Apang sang nabatian sang mga pumuluyo sang Jabes-galaad nahanungud sa iya sang ginhimo sang mga Filistinhon kay Saul, 12ang tanan nga lalaki nga isganan nagtindug, kag naglakat sa bug-os nga gab-i, kag ginkuha nila ang bangkay ni Saul kag ang mga bangkay sang iya mga anak gikan sa kuta sang Bet-san; kag nag-abut sila sa Jabes kag ginsonog sila didto. 13Kag ginkuha nila ang ila mga tul-an kag ginlubung sila sa idalum sang kahoy nga tamarisk sa Jabes, kag nagpuasa sing pito ka adlaw.
Currently Selected:
1 SAMUEL 31: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
