2 MGA HARI 2

Si Eliseo Nagatal-us kay Elias

1Karon sang buut na bayawon sang Ginoo si Elias pa langit paagi sa buhawi, si Elias naglakat upud kay Eliseo gikan sa Gilgal. 2Kag si Elias nagsiling kay Eliseo, “Pabilin ka diri, ginaampo ko sa imo; kay ginpadala ako sang Ginoo tubtub sa Bet-el.” Apang si Eliseo nagsiling, “Sa nagakabuhi ang Ginoo, kag sa nagakabuhi ang imo kalag, indi ako magbiya sa imo.” Gani nagdulhog sila pa Bet-el. 3Kag ang lalaki nga mga anak sang mga manalagna nga didto sa Bet-el nagsugata kay Eliseo, kag nagsiling sa iya, “Nakahibalo ka bala nga kuhaon sang Ginoo karon ang imo agalon gikan sa ibabaw sang imo olo?” Kag nagsiling sia, “Hoo, ako nakahibalo sini; hipus kamo.”

4Si Elias nagsiling sa iya, “Eliseo, pabilin diri, ginaampo ko sa imo; kay ginpadala ako sang Ginoo sa Jerico.” Apang nagsiling sia, “Sa nagakabuhi ang Ginoo, kag sa nagakabuhi ang imo kalag, indi ako magbiya sa imo.” Gani nag-abut sila sa Jerico. 5Ang lalaki nga mga anak sang mga manalagna nga didto sa Jerico nagpalapit kay Eliseo, kag nagsiling sa iya, “Nakahibalo ka bala nga kuhaon sang Ginoo karon ang imo agalon gikan sa ibabaw sang imo olo?” Kag nagsabat sia, “Hoo, ako nakahibalo sini; hipus kamo.”

6Niyan si Elias nagsiling sa iya, “Pabilin diri, ginaampo ko sa imo; kay ginpadala ako sang Ginoo sa Jordan.” Apang nagsiling sia, “Sa nagakabuhi ang Ginoo, kag sa nagakabuhi ang imo kalag, indi ako magbiya sa imo.” Gani nagpadayon sila nga duha. 7Nagkadto ang kalim-an ka lalaki nga mga anak sang mga manalagna, kag nagtindug sila sa atubang nila sa malayo, sang sila nga duha nagatindug sa obay sang Jordan. 8Niyan ginkuha ni Elias ang iya kunup, kag ginpiod ini, kag ginbunal ang mga tubig, kag naghawa sila sa pihak kag pihak, sa bagay nga nagtabok sila nga duha sa mamala nga duta.

9Sang nakatabok sila, si Elias nagsiling kay Eliseo, “Pangayo ka sang himoon ko tungud sa imo, sa wala pa ako pagkuhaa sa imo.” Kag si Eliseo nagsiling, “Ginaampo ko sa imo, magmanginyari sa akon ang dubli nga bahin#Deut. 21:17. sang imo espiritu.” 10Kag nagsiling sia, “Nagpangayo ka sing butang nga maiwat; kon makita mo ako kon kuhaon ako sa imo, mangin-amo ini sa imo; apang kon indi, indi mangin-amo ini.” 11Kag sang naglakat pa sila kag naghambalanay, yari karon, nagpahayag ang isa ka kangga nga kalayo kag mga kabayo nga kalayo nga nagbulag sa ila nga duha. Kag si Elias nagpaibabaw pa langit paagi sa buhawi. 12Kag nakita ini ni Eliseo kag nagsinggit sia, “Amay ko, amay ko! ang mga kangga sang Israel kag iya mga manugkabayo!”#2 Hari 13:14. Kag wala na nga mas-a makita niya sia.

Niyan ginkaptan niya ang iya kaugalingon nga mga panapton kag ginguyhab sila sa duha ka bahin. 13Kag ginpulut man niya ang kunup ni Elias nga naholog gikan sa iya, kag nagbalik kag nagtindug sa pangpang sang Jordan. 14Niyan ginkuha niya ang kunup ni Elias nga naholog gikan sa iya, kag ginbunal ang mga tubig, kag nagsiling, “Diin bala ang Ginoo, ang Dios ni Elias?” Kag sang nabunal man niya ang mga tubig, naghawa sila sa pihak kag pihak; kag nagtabok si Eliseo.

15Karon sang nakita sia sang mga anak sang mga manalagna nga didto sa Jerico nga nag-atubang sa iya, nagsiling sila, “Ang espiritu ni Elias nagpabilin kay Eliseo.” Kag nag-abut sila sa pagsugata sa iya, kag nagyaub sila sa atubangan niya sa duta. 16Kag nagsiling sila sa iya, “Yari karon, may kalim-an ka lalaki nga mga makusug upud sang imo mga alagad; palakta sila, ginaampo namon sa imo, kag magpangita sang imo agalon; basi nga ginbayaw sia sang Espiritu sang Ginoo kag ginholog sia sa isa ka bukid ukon sa isa ka nalupyakan.” Kag nagsiling sia, “Indi kamo magpadala.” 17Apang sang ginpilit nila sia tubtub nga nahuya sia, nagsiling sia, “Ipadala.” Busa ginpadala nila ang kalim-an ka tawo; kag ginpangita nila sing tatlo ka adlaw kag wala sia makita. 18Kag nagbalik sila sa iya, samtang nga sia nagpabilin sa Jerico, kag nagsiling sia sa ila, “Wala bala ako magsiling sa inyo, Indi kamo maglakat?”

19Karon ang mga tawo sang banwa nagsiling kay Eliseo, “Yari karon, ang kahimtangan sini nga banwa maayo, subong sa ginatan-aw sang akon ginoo; apang ang tubig malain, kag ang duta wala sing bunga.” 20Nagsiling sia, “Dalhi ako sing tibud nga bag-o, kag sudli ini sing asin.” Gani gindalhan nila sia sini. 21Niyan nagkadto sia sa tuburan sang mga tubig kag ginsabwagan niya sa sulud sini sing asin, kag nagsiling, “Amo ini ang ginasiling sang Ginoo, Gin-ayo ko ini nga mga tubig; wala na sa iya sing kamatayon ukon pagkapulak.” 22Gani nag-ayo ang mga tubig tubtub sini nga adlaw, sono sa polong nga ginpamolong ni Eliseo.

23Nagtaklad sia gikan didto pa Bet-el; kag sang nagataklad sia sa dalanon, may naggowa nga kabataan gikan sa banwa kag nag-uligyat sa iya, kag nagsiling sa iya, “Taklad, upaw! Taklad, upaw!” 24Kag nagbalikid sia kag nakita sila, kag ginpakamalaut sila sa ngalan sang Ginoo. Kay may naggowa nga duha ka oso nga babayi gikan sa kakahoyan kag ginkusnit ang kap-atan kag duha ka kabataan sa ila. 25Kutub didto nagkadto sia sa Bukid nga Carmelo, kag gikan didto nagbalik sia sa Samaria.

Currently Selected:

2 MGA HARI 2: ABHIL82

Highlight

Copy