2 MGA HARI 1

Ang Pagkapatay ni Ocozias

1Sang napatay si Acab nagribuk ang Moab batok sa Israel.

2Karon si Ocozias naholog gikan sa balatibat sa iya hulut nga naibabaw nga didto sa Samaria, kag nagbalatian; kag nagpadala sia sing mga manugbalita, kag nagsiling sa ila, “Lakat, pamangkot kay Baal-zebub, ang dios sang Ecron, kon bala magaayo pa ako sa sini nga balatian.” 3Apang ang manugtunda sang Ginoo nagsiling kay Elias nga Tisbinhon, “Tindug, taklad sa pagsugata sa mga manugbalita sang hari sang Samaria, kag isiling sa ila, ‘Bangud bala nga wala sing Dios sa Israel, nga kamo nagakadto sa pagpamangkot kay Baal-zebub, ang dios sang Ecron?’ 4Busa karon amo ini ang ginasiling sang Ginoo, “Dili ka makapanaug sa higdaan nga ginsakaan mo, kondi nga mapatay ka sing totoo.’” Kag si Elias nagtaliwan.

5Ang mga manugbalita nagbalik sa hari, kag nagsiling sia sa ila, “Ngaa bala nga nagbalik kamo?” 6Kag sila nagsiling sa iya, “Nagsugata sa amon ang isa ka lalaki, kag nagsiling sa amon, ‘Lakat, balik kamo sa hari nga nagpadala sa inyo, kag isiling sa iya, Amo ini ang ginasiling sang Ginoo, Bangud bala nga wala sing Dios sa Israel nga ikaw nagapadala sa pagpamangkot kay Baal-zebub, ang dios sang Ecron? Busa indi ka makapanaug sa higdaan nga ginsakaan mo, kondi mapatay sing totoo.’” 7Sia nagsiling sa ila, “Ano bala nga bagay sang lalaki sia nga nagtaklad sa pagsugata sa inyo kag nagsugid sa inyo sini nga mga polong?” 8Nagsabat sila sa iya, “Sia lalaking bulbulon, kag nagtampion sing panit sa iya mga balikawang.”#Mat. 3:4; Mar. 1:6. Kag sia nagsiling, “Si Elias ini nga Tisbinhon.”

9Niyan ang hari nagpadala sa iya sing pangolo sang kalim-an upud sang iya mga kalim-an. Kag sia nagtukad sa iya, kag yari karon, sia nagalingkod sa putokputokan sang bakolod, kag sia nagpamolong sa iya, “O tawo sang Dios, ang hari nagsiling, ‘Dulhog ka.’” 10Apang si Elias nagsabat sa pangolo sang kalim-an, “Kon ako tawo sang Dios, magpanaug ang kalayo gikan sa langit kag mag-upus sa imo kag sang imo kalim-an.#Luc. 9:54.” Kag nagpanaug ang kalayo gikan sa langit, kag nag-upus sa iya kag sang iya kalim-an.

11Ang hari nagpadala liwat sa iya sing isa pa ka pangolo sang kalim-an upud sang iya kalim-an. Kag nagsiling sia sa iya, “O tawo sang Dios, amo ini ang ginasiling sang hari, ‘Dulhog sing madali!’” 12Apang si Elias nagsabat sa ila, “Kon ako tawo sang Dios, magpanaug ang kalayo gikan sa langit kag mag-upus sa imo kag sang imo kalim-an.#Luc. 9:54.” Niyan ang kalayo sang Dios nagpanaug gikan sa langit kag nag-upus sa iya kag sang iya kalim-an.

13Liwat nagpadala sia sang ikatlo ka pangolo sang kalim-an upud sang iya kalim-an. Kag ang ikatlo nga pangolo sang kalim-an nagtukad, kag nag-abut kag nagluhud sa atubangan ni Elias, kag nagpakilooy sa iya, “O tawo sang Dios, ginaampo ko sa imo, magmanginbilidhon sa imo itololok ang akon kabuhi, kag ang kalag sini nga kalim-an nga mga alagad mo. 14Yari karon, may nagpanaug nga kalayo gikan sa langit, kag nag-upus sang duha nga nahauna nga mga pangolo sang kalim-an upud sang ila kinalim-an; apang karon magmanginbilidhon ang akon kabuhi sa imo itololok.” 15Niyan ang manugtunda sang Ginoo nagsiling kay Elias, “Dulhog ka upud sa iya; dili mahadluk sa iya.” Gani nagtindug sia kag nagdulhog upud sa iya pakadto sa hari, 16kag sia nagsiling sa iya, “Amo ini ang ginasiling sang Ginoo, ‘Sa bagay nga nagpadala ka sing mga manugbalita sa pagpamangkot kay Baal-zebub, ang dios sang Ecron,—bangud bala ini nga wala sing Dios sa Israel nga pamangkotan sang iya polong?—busa dili ka makapanaug sa higdaan nga ginsakaan mo, kondi mapatay sing totoo.’”

17Gani napatay sia sono sa polong sang Ginoo nga napamolong ni Elias. Naghari sa tal-us niya si Joram sa ikaduha nga tuig ni Joram nga anak ni Josafat, hari sang Juda, bangud nga wala sia sing anak nga lalaki. 18Karon ang nabilin sang mga binuhatan ni Ocozias nga ginhimo niya, wala bala sila masulat sa Tolon-an sang mga Maragtas sang mga Hari sang Israel?

Currently Selected:

2 MGA HARI 1: ABHIL82

Highlight

Copy