1 MGA HARI 22
22
Si Micaya Nagatagna sang Pagdaug kay Acab kag kay Josafat
(2 Cron. 18:1-34)
1Nagpadayon sila nga walay inaway sing tatlo ka tuig sa tunga sang Siria kag Israel. 2Apang sa ikatlong tuig si Josafat nga hari sang Juda nagdulhog sa hari sang Israel. 3Kag ang hari sang Israel nagsiling sa iya mga alagad, “Wala bala kamo makahibalo nga aton ang Ramot-galaad, kag nagapahimunong kita kag wala nagabawi sini sa kamut sang hari sang Siria?” 4Kag nagsiling sia kay Josafat, “Magaupud ka bala sa akon sa inaway sa Ramot-galaad?” Kag si Josafat nagsiling sa hari sang Israel, “Ako subong sa imo, ang katawohan ko subong sang katawohan mo, ang akon mga kabayo subong sang imo mga kabayo.”
5Kag si Josafat nagsiling sa hari sang Israel, “Pamangkot anay tungud sang polong sang Ginoo.” 6Niyan ang hari sang Israel nagtipon sing tingub sang mga manalagna, mga apat ka gatus ka tawo, kag nagsiling sa ila, “Magalakat bala ako batok sa Ramot-galaad sa pag-away, ukon magapaumud ako?” Kag nagsiling sila, “Taklad; kay ang Ginoo magatugyan sini sa kamut sang hari.” 7Apang si Josafat nagsiling, “Wala bala diri sing iban pa nga manalagna sang Ginoo, agud nga magpamangkot kita sa iya?” 8Kag ang hari sang Israel nagsiling kay Josafat, “May isa pa ka tawo nga paagi sa iya makapamangkot kita sa Ginoo, si Micaya nga anak ni Imla; apang nagadumut ako sa iya, kay wala sia pagtagna sing maayo nahanungud sa akon, kondi malaut.” Kag si Josafat nagsiling, “Indi magsiling ang hari sing subong.” 9Niyan ang hari sang Israel nagtawag sing manugdumala kag nagsiling, “Dalha sing madali si Micaya nga anak ni Imla.” 10Karon ang hari sang Israel kag si Josafat nga hari sang Juda nagalingkod ang tagsa sa iya trono, nga nasukluban sang ila mga panapton, sa wayang sa salamputan sang gawang sang Samaria; kag ang tanan nga manalagna nagapanagna sa atubangan nila. 11Kag si Sedequias nga lalaki nga anak ni Canaana naghimo nga sa iya sing mga sungay nga salsalon, kag nagsiling, “Amo ini ang ginasiling sang Ginoo, ‘Sa sini idusdus mo ang mga Sirianhon tubtub nga mapapas sila.’” 12Kag ang tanan nga manalagna nagpanagna sing amo, nga nagasiling, “Taklad sa Ramot-galaad kag mag-uswag; ang Ginoo magatugyan sini sa kamut sang hari.”
13Kag ang manugbalita nga nagkadto sa pagtawag kay Micaya nagpamolong sa iya, “Yari karon, ang mga polong sang mga manalagna nagpahayag sing maayo sa hari sa isa ka baba; ang imo polong mangin-kaangay sang polong sang isa sa ila, kag magpamolong ka sang maayo.” 14Apang si Micaya nagsiling, “Sa nagakabuhi ang Ginoo, ang ginasiling sa akon sang Ginoo, ina ipamolong ko.” 15Kag sang nag-abut sia sa hari, ang hari nagsiling sa iya, “Micaya, magakadto kami bala sa inaway sa Ramot-galaad, ukon mapaumud kami?” Kag nagsabat sia, “Taklad ka kag mag-uswag; ang Ginoo magatugyan sini sa kamut sang hari.” 16Apang ang hari nagsiling sa iya, “Makapila pa bala pasumpaon ko ikaw nga dili ka magpamolong sa akon sing bisan ano kondi ang kamatooran sa ngalan sang Ginoo?” 17Kag nagsiling sia, “Nakita ko ang bug-os nga Israel nga nag-aplaag sa kabukiran, subong sang mga carnero nga walay manugpahalab;#Mat. 9:36; Mar. 6:34. kag ang Ginoo nagsiling, ‘Ini sila walay agalon; magpauli ang tagsa ka tawo sa iya balay sa paghidait.’” 18Kag ang hari sang Israel nagsiling kay Josafat, “Wala bala ako magsugid sa imo nga nahanungud sa akon indi sia magtagna sing maayo, kondi malaut?” 19Kag si Micaya nagsiling, “Busa pamatian mo ang polong sang Ginoo: Nakita ko ang Ginoo nga nagalingkod sa iya trono, kag ang bug-os nga kasoldadosan sang langit nga nagatindug sa iya too kag sa iya wala; 20kag ang Ginoo nagsiling, ‘Sin-o bala ang magapahaylo kay Acab, agud nga magtaklad sia kag magdamhag sa Ramot-galaad?’ Kag ang isa nagsiling sa sining bagay, kag ang isa nagsiling sa sina nga bagay. 21Niyan may naggowa nga espiritu kag nagtindug sa atubangan sang Ginoo, nga nagasiling, ‘Ako magapahaylo sa iya.’ 22Kag ang Ginoo nagsiling sa iya, ‘Sa ano bala?’ Kag sia nagsiling, ‘Ako magakadto, kag mangin espiritu nga butigon sa baba sang tanan niyang manalagna.’ Kag sia nagsiling, ‘Ikaw magpahaylo sa iya, kag maglandas man; kadto ka kag himoa ang subong.’ 23Busa karon, yari karon, ang Ginoo nagbutang sing espiritu nga butigon sa baba sang tanan sining imo manalagna; ang Ginoo nagpamolong sing malaut nahanungud sa imo.”
24Niyan nagpalapit si Sedequias nga anak ni Canaana kag gintampa si Micaya sa pisngi, kag nagsiling, “Diin bala mag-agi gikan sa akon ang espiritu sang Ginoo sa pagpamolong sa imo?” 25Kag si Micaya nagsiling, “Yari karon, makita mo sa sadtong adlaw, kon magpanulud-sulud ka sa hulut pa hulut sa pagpanago mo.” 26Kag ang hari sang Israel nagsiling, “Kuhaa si Micaya, kag dalha sia pabalik kay Amon nga pangolo sang banwa kag kay Joas nga anak sang hari; 27kag isiling, ‘Amo ini ang ginasiling sang hari, “Isulud ining tawo sa bilanggoan, kag saguron sia sang tinapay sang kapipit-an kag sang tubig sang kapipit-an, tubtub nga ako mag-abut sa paghidait.” ’” 28Kag nagsiling si Micaya, “Kon makapauli ka nga mas-a sa paghidait, ang Ginoo wala magpamolong paagi sa akon.” Kag nagsiling sia, “Magpamati, kamo tanan nga katawohan!”
29Gani ang hari sang Israel kag si Josafat nga hari sang Juda nagtaklad sa Ramot-galaad. 30Kag ang hari sang Israel nagsiling kay Josafat, “Indi ako magpakilala sang akon kaugalingon kag magkadto sa inaway, apang suklub ka sang imo panapton.” Kag ang hari sang Israel wala magpakilala sang iya kaugalingon kag nagkadto sa inaway. 31Karon ang hari sang Siria nagsogo sa katloan kag duha ka pangolo sang iya mga kangga, “Dili kamo mag-away sa magamay ukon sa dalagku, luwas lamang sa hari sang Israel.” 32Kag sang nakita sang mga pangolo sang mga kangga si Josafat, nagsiling sila, “Sa pagkamatuud ini hari sang Israel.” Gani nagliso sila sa pag-away sa iya; kag si Josafat nagsinggit. 33Kag sang nakita sang mga pangolo sang mga kangga nga indi ini hari sang Israel, nagbalik sila gikan sa paglagas sa iya. 34Apang ang isa ka tawo nagpana sing palagpat, kag naigo ang hari sang Israel sa ulut sang mga tinaboan sang hinganib; busa si Acab nagsiling sa iya manugkangga, “Paliso-a ang imo kamut, kag pagowaa ako gikan sa kasoldadosan, kay napilasan ako sing tama.” 35Kag ang inaway nagsandukot sadtong adlaw, kag ang hari ginpatindug sa iya kangga batok sa mga Sirianhon, kag napatay sa kahaponon; kag ang dugo nag-ilig gikan sa pilas pakadto sa salog sang kangga. 36Kag sa paghinunud sang adlaw may singgit sa bug-os nga kasoldadosan, “Ang tagsa ka tawo magpauli sa iya banwa, kag ang tagsa ka tawo sa iya duta!”
37Gani napatay ang hari, kag gindala sa Samaria; kag ginlubung nila ang hari sa Samaria. 38Kag ginhugasan nila ang kangga sa ponong sang Samaria, kag gindilapan sang mga ido ang dugo ni Acab, kag ang mga babayi nga makihilawason nagpaligus didto, sono sa polong sang Ginoo nga ginpamolong niya. 39Karon ang nabilin sang mga binuhatan ni Acab, kag ang tanan nga ginhimo niya, kag ang balay nga tiposo nga ginpatindug niya, kag ang tanan nga mga banwa nga ginpatindug niya, wala bala sila masulat sa Tolon-an sang mga Maragtas sang mga Hari sang Israel? 40Gani nagtolog si Acab upud sa iya mga ginikanan; kag naghari nga tal-us niya si Ocozias nga iya anak nga lalaki.
Ang Paghari ni Josafat
(2 Cron. 20:31-37)
41Si Josafat nga anak ni Asa nagsugud sa paghari sa Juda sa ikap-at nga tuig ni Acab nga hari sang Israel. 42Si Josafat katloan kag lima ka tuig sang nagsugud sia sa paghari, kag naghari sia sing duha ka pulo kag lima ka tuig sa Jerusalem. Ang ngalan sang iya iloy si Azuba nga anak ni Silhi. 43Naglakat sia sa bug-os nga dalanon ni Asa nga iya amay; wala sia maglipas sa sini, nga nagahimo sang matarung sa mga mata sang Ginoo; apang wala makuha ang mataas nga mga duug, kag ang katawohan naghalad pa kag nagsonog sing incienso sa mataas nga mga duug. 44Si Josafat nagpakighidait sa hari sang Israel.
45Karon ang nabilin sang mga binuhatan ni Josafat, kag ang iya kagamhanan nga ginpakita niya, kag paano ang pagpakig-away niya, wala bala sila masulat sa Tolon-an sang mga Maragtas sang mga Hari sang Juda? 46Kag ang nabilin sang mga sodomanhon nga nabilin sa mga adlaw ni Asa nga iya amay, ginsobol niya gikan sa duta.
47Walay hari sa Edom; ang tinugyanan amo ang hari. 48Si Josafat naghimo sing mga sakayan sang Tarsis sa pagkadto sa Ofir tungud sang bulawan; apang wala sila makalakat, kay naguba ang mga sakayan sa Ezion-geber. 49Niyan si Ocozias nga anak ni Acab nagsiling kay Josafat, “Palakta ang akon mga alagad upud sa imo mga alagad sa mga sakayan,” apang si Josafat indi buut. 50Kag si Josafat nagtolog upud sa iya mga ginikanan, kag ginlubung upud sa iya mga ginikanan sa banwa ni David nga iya amay; kag si Joram nga iya anak naghari sa tal-us niya.
Ang Paghari ni Ocozias
51Si Ocozias nga anak ni Acab nagsugud sa paghari sa Israel sa Samaria sa ikapulog pito nga tuig ni Josafat nga hari sang Juda, kag naghari sia sing duha ka tuig sa Israel. 52Naghimo sia sang malaut sa itololok sang Ginoo, kag naglakat sa dalanon sang iya amay, kag sa dalanon sang iya iloy, kag sa dalanon ni Jeroboam nga anak ni Nabat, diin ginpapakasala niya ang Israel. 53Nag-alagad sia kay Baal kag nagsimba sa iya, kag ginpaakig niya ang Ginoo, ang Dios sang Israel, sono sa tanan nga nahimo sang iya amay.
Currently Selected:
1 MGA HARI 22: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
