2 MGA HARI 15
15
Ang Paghari ni Azarias
(2 Cron. 26:3-5, 16-23)
1Sa ikaduha ka pulo kag pito nga tuig ni Jeroboam nga hari sang Israel nagsugud sa paghari si Azarias nga anak ni Amasias nga hari sang Juda. 2Napulo kag anum ka tuig sia sang nagsugud sia sa paghari, kag naghari sia sa Jerusalem sing kalim-an kag duha ka tuig. Ang ngalan sang iya iloy si Jecolia nga taga-Jerusalem. 3Kag ginhimo niya ang matarung sa mga mata sang Ginoo, sono sa tanan nga nahimo ni Amasias nga iya amay. 4Apang wala makuha ang mataas nga mga duug; ang katawohan naghalad kag nagsonog pa sing mga incienso sa mataas nga mga duug. 5Kag ginsakit sang Ginoo ang hari, sa bagay nga nangin-aroon sia tubtub sa adlaw sang iya kamatayon, kag nagpuyo sia sa napain nga balay. Kag si Joatam nga anak sang hari naggahum sa panimalay, nga nagahukom sang katawohan sang duta. 6Karon ang nabilin sang mga binuhatan ni Azarias, kag ang tanan nga ginhimo niya, wala bala sila masulat sa Tolon-an sang mga Maragtas sang mga Hari sang Juda? 7Kag si Azarias#Isa. 6:1. nagtolog upud sang iya mga ginikanan, kag ginlubung nila sia upud sa iya mga ginikanan sa banwa ni David, kag si Joatam nga iya anak naghari nga tal-us niya.
Ang Paghari ni Zacarias
8Sa ikakatloan kag walo nga tuig ni Azarias nga hari sang Juda si Zacarias nga anak ni Jeroboam naghari sa ibabaw sang Israel sa Samaria sing anum ka bulan. 9Kag ginhimo niya ang malaut sa itololok sang Ginoo, subong sang nahimo sang iya mga ginikanan. Wala sia magbiya sa mga sala ni Jeroboam nga anak ni Nabat, nga sa ila ginpapakasala niya ang Israel. 10Si Sallum nga anak ni Jabes nagpuhon batok sa iya, kag ginpilas sia sa atubangan sang katawohan, kag ginpatay sia, kag naghari nga tal-us niya. 11Karon ang nabilin sang mga binuhatan ni Zacarias, yari karon, nasulat sila sa Tolon-an sang mga Maragtas sang mga Hari sang Israel. 12(Amo ini ang polong sang Ginoo nga ginpamolong kay Jehu, “Ang imo mga anak tubtub sa ikap-at nga kaliwatan magalingkod sa trono sang Israel.”#2 Hari 10:30. Kag amo ini ang nahanabu.)
Ang Paghari ni Sallum
13Si Sallum nga anak ni Jabes nagsugud sa paghari sa ikakatloan kag siam nga tuig ni Uzias nga hari sang Juda, kag naghari sia sing isa ka bulan sa Samaria. 14Niyan si Menahen nga anak ni Gadi nagtaklad gikan sa Tirsa kag nagsulud sa Samaria, kag ginpilas si Sallum nga anak ni Jabes sa Samaria kag ginpatay sia, kag naghari nga tal-us niya. 15Karon ang nabilin sang mga binuhatan ni Sallum, kag ang iya puhon nga ginpadugi, yari karon, nasulat sila sa Tolon-an sang mga Maragtas sang mga Hari sang Israel. 16Niyan ginlaglag ni Menahen ang Tipsa kag ang tanan nga yadto sa iya kag ang iya mga ginsakpan kutub sa Tirza; bangud nga wala nila sia pagbuksi, busa ginlaglag niya ini, kag gingayhab niya ang tanan nga babayi nga nagabusung didto.
Ang Paghari ni Menahen
17Sa ikakatloan kag siam nga tuig ni Azarias nga hari sang Juda nagsugud sa paghari sa Israel si Menahen nga anak ni Gadi, kag naghari sia sing napulo ka tuig sa Samaria. 18Kag ginhimo niya ang malaut sa itololok sang Ginoo; wala sia magbiya sa tanan niya nga adlaw sa mga sala ni Jeroboam nga anak ni Nabat, nga sa ila ginpapakasala niya ang Israel. 19May nag-abut batok sa duta nga si Pul nga hari sang Asiria; kag naghatag si Menahen kay Pul sing isa ka libo ka talanton nga pilak, agud nga mag-upud sa iya ang iya kamut sa pagpalig-on sang ginharian sa iya kamut. 20Ginpabuhis sing cuarta ni Menahen ang Israel, bisan ang tanan nga gamhanan nga tawo nga manggaranon, sa tagsa ka tawo kalim-an ka siclo nga pilak, nga ihatag sa hari sang Asiria. Gani ang hari sang Asiria nagpauli, kag wala magpabilin didto sa duta. 21Karon ang nabilin sang mga binuhatan ni Menahen, kag ang tanan nga ginhimo niya, wala bala masulat sa Tolon-an sang mga Maragtas sang mga Hari sang Israel? 22Kag si Menahen nagtolog upud sa iya mga ginikanan, kag naghari nga tal-us niya si Pecaya nga iya anak nga lalaki.
Ang Paghari ni Pecaya
23Sa ikakalim-an nga tuig ni Azarias nga hari sang Juda nagsugud sa paghari sa ibabaw sang Israel sa Samaria si Pecaya nga anak ni Menahen, kag naghari sing duha ka tuig. 24Kag ginhimo niya ang malaut sa itololok sang Ginoo; wala sia magbiya sa mga sala ni Jeroboam nga anak ni Nabat, nga sa ila ginpapakasala niya ang Israel. 25Kag si Peca nga anak ni Remalias, nga iya pangolo, nagpuhon batok sa iya kag gingubat sia sa Samaria, sa palacio sang balay sang hari, upud ni Argob kag ni Arye, kag upud sa iya ang kalim-an ka tawo sang mga Galaadnon; ginpatay niya sia, kag naghari nga tal-us niya. 26Karon ang nabilin sang mga binuhatan ni Pecaya, kag ang tanan nga ginhimo niya, yari karon, nasulat sila sa Tolon-an sang mga Maragtas sang mga Hari sang Israel.
Ang Paghari ni Peca
27Sa ikakalim-an kag duha nga tuig ni Azarias nga hari sang Juda nagsugud sa paghari sa ibabaw sang Israel sa Samaria si Peca nga anak ni Remalias, kag naghari sing duha ka pulo ka tuig. 28Kag ginhimo niya ang malaut sa itololok sang Ginoo; wala sia magbiya sa mga sala ni Jeroboam nga anak ni Nabat, nga sa ila ginpapakasala niya ang Israel.
29Sa mga adlaw ni Peca nga hari sang Israel nag-abut si Tiglat-peleser nga hari sang Asiria kag gin-agaw ang Ijon, Abel-bet-maaca, Janoa, Cades, Hazor, Galaad, kag Galilea, ang bug-os nga duta sang Neftali; kag gindala niya sila nga bihag sa Asiria. 30Niyan si Oseas nga anak ni Ela nagpuhon batok kay Peca nga anak ni Remalias, kag nagpilas sa iya, kag nagpatay sa iya, kag naghari sia nga tal-us niya, sa ikaduha ka pulo nga tuig ni Joatam nga anak ni Uzias. 31Karon ang nabilin sang mga binuhatan ni Peca, kag ang tanan nga ginhimo niya, yari karon, nasulat sa Tolon-an sang mga Maragtas sang mga Hari sang Israel.
Ang Paghari ni Joatam
(2 Cron. 27:1-9)
32Sa ikaduha nga tuig ni Peca nga anak ni Remalias, nga hari sang Israel, nagsugud sa paghari si Joatam nga anak ni Uzias, nga hari sang Juda. 33Nagsugud sia sa paghari sang duha ka pulo kag lima ka tuig sia, kag naghari sia sing napulo kag anum ka tuig sa Jerusalem. Ang ngalan sang iya iloy si Jerusa nga anak ni Sadoc. 34Kag naghimo sia sang matarung sa mga mata sang Ginoo, naghimo sia sono sa tanan nga ginhimo sang iya amay nga si Uzias. 35Wala sing sapayan ang mga mataas nga duug wala makuha; ang katawohan naghalad kag nagsonog pa sing incienso sa mataas nga mga duug. Nagpatindug sia sang naibabaw nga gawang sang balay sang Ginoo. 36Karon ang nabilin sang mga binuhatan ni Joatam, kag ang tanan nga ginhimo niya, wala bala sila masulat sa Tolon-an sang mga Maragtas sang mga Hari sang Juda? 37Sa sadto nga mga adlaw nagsugud ang Ginoo sa pagpadala batok sa Juda kay Resin nga hari sang Siria kag kay Peca nga anak ni Remalias. 38Si Joatam nagtolog upud sa iya mga ginikanan, kag ginlubung upud sa iya mga ginikanan sa banwa ni David nga iya amay; kag naghari nga tal-us niya si Acaz nga iya anak.
Currently Selected:
2 MGA HARI 15: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
