2 MGA HARI 14
14
Ang Paghari ni Amasias
(2 Cron. 25:1-28)
1Sa ikaduha nga tuig ni Joas nga anak ni Joacas nga hari sang Israel nagsugud sa paghari si Amasias nga anak ni Joas, hari sang Juda. 2Sia nagsugud sa paghari sang duha ka pulo kag lima ka tuig sia, kag naghari sia sing duha ka pulo kag siam ka tuig sa Jerusalem. Ang ngalan sang iya iloy si Joadan sang Jerusalem. 3Kag ginhimo niya ang matarung sa mga mata sang Ginoo, apang indi kaangay kay David nga iya amay; naghimo sia sono sa tanan nga nahimo ni Joas nga iya amay. 4Apang ang mataas nga mga duug wala makuha; ang katawohan naghalad pa kag nagsonog sing incienso sa mataas nga mga duug. 5Kag sa gilayon nga napalig-on ang ginharian sa iya kamut ginpatay niya ang iya mga alagad nga nagpatay sang hari nga iya amay. 6Apang wala niya pagpatya ang mga anak sang mga manugpatay; sono sa nasulat sa tolon-an sang kasogoan ni Moises, sono sa ginsogo sang Ginoo, “Ang mga ginikanan dili pagpatyon tungud sa kabataan, ukon ang kabataan patyon tungud sa ginikanan; kondi ang tagsa ka tawo mapatay tungud sa iya kaugalingon nga sala.”#Deut. 24:16.
7Ginpatay niya gikan sa Edom ang napulo ka libo sa Nalupyakan sang Asin kag gin-agaw ang Sela sa inaway, kag ginhingalanan ini Jocteel, tubtub sini nga adlaw.
8Niyan si Amasias nagpadala sing mga manugbalita kay Jehoas, ang anak ni Joacas nga anak ni Jehu, hari sang Israel, nga nagasiling, “Kari, magkitaay kita sa nawung.” 9Kag si Jehoas nga hari sang Israel nagpadala sing polong kay Amasias nga hari sang Juda, “Ang talongon nga yara sa Libano nagpadala sa cedro nga yara sa Libano, nga nagasiling, ‘Ipaasawa ang imo anak nga babayi sa akon anak nga lalaki’; kag may nag-agi nga sapat nga talonon nga yara sa Libano kag gintapak ang talongon. 10Sa pagkamatuud gindaug mo ang Edom, kag ang imo tagiposoon nagpakataas sa imo. Magkalipay ka sini, kag magpabilin sa puluy-an; kay ngaa bala naghilabut ka sa imo kahalitan agud nga maholog ka, ikaw kag ang Juda upud sa imo?”
11Apang si Amasias indi buut magpamati. Gani nagtaklad si Jehoas nga hari sang Israel, kag sia kag si Amasias nga hari sang Juda nagkitaay sa nawung sa Bet-semes, nga naigo sa Juda. 12Kag ang Juda natam-an sa atubangan sang Israel, kag nagpalagyo sila ang tagsa ka tawo sa iya layanglayang. 13Kag si Jehoas nga hari sang Israel nagdakup sa Bet-semes kay Amasias nga hari sang Juda, ang anak ni Jehoas, nga anak ni Ocozias, kag nag-abut sa Jerusalem, kag ginwagwag ang kuta sang Jerusalem kutub sa gawang sang Efraim tubtub sa gawang sa pamusud, apat ka gatus ka maniko. 14Kag ginkuha niya ang tanan nga bulawan kag pilak, kag ang tanan nga suludlan nga nakita sa balay sang Ginoo kag sa mga bahandi sang balay sang hari, ang mga inugpalig-on man, kag nagbalik sa Samaria.
15Karon ang nabilin sang mga binuhatan ni Jehoas nga ginhimo niya, kag ang iya kagamhanan, kag kon paano ang pagpakig-away niya kay Amasias nga hari sang Juda, wala bala sila masulat sa Tolon-an sang mga Maragtas sang mga Hari sang Israel? 16Kag si Jehoas nagtolog upud sa iya mga ginikanan, kag ginlubung sa Samaria upud sa mga hari sang Israel; kag naghari nga tal-us niya si Jeroboam nga iya anak.
17Si Amasias nga anak ni Joas, nga hari sang Juda, nagkabuhi sing napulo kag lima ka tuig sa tapus nga napatay si Jehoas nga anak ni Joacas, nga hari sang Israel. 18Karon ang nabilin sang mga binuhatan ni Amasias, wala bala sila masulat sa Tolon-an sang mga Maragtas sang mga Hari sang Juda? 19Kag nagpuhon sila batok sa iya sa Jerusalem, kag nagpalagyo sia sa Laquis. Apang ginpaapasan nila sa Laquis, kag ginpatay sia didto. 20Kag ginlulan nila sia sa mga kabayo; kag ginlubung sia sa Jerusalem upud sa iya mga ginikanan sa banwa ni David. 21Kag ang bug-os nga katawohan sang Juda nagkuha kay Azarias, nga nagapanuigon sing napulo kag anum ka tuig, kag ginhimo sia nga hari sa tal-us ni Amasias nga iya amay. 22Ginpatindug niya ang Elat kag gin-uli ini sa Juda, sa tapus nga ang hari nagtolog upud sa iya mga ginikanan.
Ang Paghari ni Jeroboam
23Sa ikanapulo kag lima nga tuig ni Amasias nga anak ni Joas nga hari sang Juda nagsugud sa paghari sa Samaria si Jeroboam nga anak ni Joas nga hari sang Israel, kag naghari sing kap-atan kag isa ka tuig. 24Kag ginhimo niya ang malaut sa itololok sang Ginoo; wala sia magbiya sa tanan nga sala ni Jeroboam nga anak ni Nabat, nga sa ila ginpapakasala niya ang Israel. 25Gin-uli niya ang dulunan sang Israel kutub sa salamputan sang Hamat tubtub sa Dagat sang Araba, sono sa polong sang Ginoo, ang Dios sang Israel, nga ginpamolong niya tungud sa iya alagad nga manalagna nga si Jonas#Jon. 1:1. nga anak ni Amitai, nga taga-Gat-hefer. 26Kay nakita sang Ginoo ang kapipit-an sang Israel nga tama kapait, kay wala gid sing nabilin, binukut ukon layaw, kag wala gid sing bisan sin-o nga kabulig tungud sa Israel. 27Apang ang Ginoo wala magsiling nga panason niya ang ngalan sang Israel gikan sa idalum sang langit, kondi ginluwas niya sila tungud sa kamut ni Jeroboam nga anak ni Joas.
28Karon ang nabilin sang mga binuhatan ni Jeroboam, kag ang tanan nga ginhimo niya, kag ang iya kagamhanan, kon paano ang pag-away niya, kag kon paano ang pagbawi niya tungud sa Israel sang Damasco kag sang Hamat, nga naigo anay sa Juda, wala bala sila masulat sa Tolon-an sang mga Maragtas sang mga Hari sang Israel? 29Kag si Jeroboam nagtolog upud sa iya mga ginikanan, upud sa mga hari sang Israel, kag naghari nga tal-us niya si Zacarias nga iya anak.
Currently Selected:
2 MGA HARI 14: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
