2 MGA CRONICA 34
34
Ang Paghari ni Josias
(2 Hari 22:1-2)
1Si Josias#Jer. 3:6. walo ka tuig sang nagsugud sia sa paghari, kag naghari sia sing katloan kag isa ka tuig sa Jerusalem. 2Naghimo sia sang matarung sa mga mata sang Ginoo, kag naglakat sa mga dalanon ni David nga iya amay; kag wala maglipas sa too ukon sa wala.
Ang mga Pagbalhin nga Nahimo ni Josias
(2 Hari 23:4-20)
3Kay sa ikawalo nga tuig sang iya paghari, sang bataon pa sia, nagsugud sia sa pagpangita sa Dios ni David nga iya amay; kag sa ikanapulo kag duha nga tuig nagsugud sia sa pagtinlo sang Juda kag sang Jerusalem sang mataas nga mga duug, sang mga Asherim, kag sang mga larawan nga tinigban kag sang mga larawan nga tinunaw. 4Kag ginpulud nila sa iya atubangan ang mga halaran sang mga Baal;#2 Hari 21:3; 2 Cron. 33:3. kag ginlumpag niya ang mga larawan sang adlaw nga yadto sa ibabaw nila; kag ang mga Asherim kag ang mga larawan nga tinigban kag ang mga larawan nga tinunaw, gindugmok niya kag ginbukbuk sila kag ginsabwag ini sa mga lulubngan sang mga naghalad sa ila. 5Ginsonog niya ang mga tul-an sang mga sacerdote sa ila mga halaran,#1 Hari 13:2. kag gintinloan ang Juda kag ang Jerusalem. 6Kag ginhimo niya ang subong sa mga banwa sang Manases, sang Efraim, kag sang Simeon, tubtub sa Neftali, sa ila mga nagub-an sa palibut, 7ginlumpag niya ang mg halaran, kag ginbukbuk ang mga Asherim kag ang mga larawan nga tinigban, kag ginpulud ang tanan nga larawan sang adlaw sa bug-os gid nga duta sang Israel. Niyan nagpauli sa Jerusalem.
Ang Tolon-an sang Kasogoan Nasapwan
(2 Hari 22:3–23:3)
8Karon sa ikanapulo kag walo nga tuig sang iya paghari, sang natinloan niya ang duta kag ang balay, ginpadala niya si Safan nga lalaking anak ni Azalias, kag si Maasias nga manugdumala sang banwa, kag si Joa nga lalaking anak ni Joacaz, nga manugmaragtas, sa pagkaayo sang balay sang Ginoo nga iya Dios. 9Nagkadto sila kay Helcias nga pinakamataas nga sacerdote kag gintugyan ang cuarta nga ginsulud sa balay sang Dios, nga natipon sang mga Levinhon, ang mga manugbantay sang atangan, gikan sa kamut sang Manases kag sang Efraim kag gikan sa tanan nga nabilin sang Isrsael kag gikan sa bug-os nga Juda kag Benjamin kag gikan sa mga pumuluyo sang Jerusalem. 10Gintugyan nila ini sa kamut sang mga manugpangabudlay nga nagtatap sang balay sang Ginoo; kag ang mga manugpangabudlay nga nagpanghikot sa balay sang Ginoo naghatag sini sa pagpahauli kag pagkaayo sang balay. 11Sa mga panday kag sa mga manugpatindug ginhatag nila ini sa pagbakal sing bato nga binasbasan, kag tablon nga mga inugsugpon kag sa paghimo sang mga balayan nga sa mga balay nga ginlaglag sang mga hari sang Juda. 12Kag ang mga tawo naghimo sang buluhaton sing matutum. Ang mga manugtatap nila si Jahat kag si Obadias nga mga Levinhon, gikan sa mga lalaking anak ni Merari, kag si Zacarias kag si Mesulam, gikan sa mga lalaking anak sang mga Coatnon, sa pagpadayon sini. Ang mga Levinhon, ang tanan nga sampaton sa mga tulunggon sa musica, 13nagdumala man sila sa mga manugdala sang mga lulan kag nagpadayon sang tanan nga naghimo sang buluhaton sa tagsa ka bagay sang pag-alagdan; kag sa mga Levinhon may mga escriba, kag mga manugdumala, kag mga manugbantay sang gawang.
14Sang pagpagowa nila sang cuarta nga ginsulud sa balay sang Ginoo, nakita ni Helcias nga sacerdote ang tolon-an sang kasogoan sang Ginoo nga ginhatag paagi kay Moises. 15Niyan si Helcias nagsabat kag nagsiling kay Safan nga escriba, “Nakita ko ang tolon-an sang kasogoan sa balay sang Ginoo;” kag gintugyan ni Helcias ang tolon-an kay Safan. 16Si Safan nagdala sang tolon-an sa hari, kag labut pa nagpabalik sing polong sa hari, “Ang tanan nga gintugyan sa imo mga alagad ginahimo nila. 17Ginhuwad nila ang cuarta nga nakita sa balay sang Ginoo kag gintugyan ini sa kamut sang mga manugtatap kag sa kamut sang mga manugpangabudlay.” 18Niyan si Safan nga escriba nagsugid sa hari, “Si Helcias nga sacerdote naghatag sa akon sing tolon-an.” Kag si Safan nagbasa sini sa atubangan sang hari.
19Sang nakabati ang hari sang mga polong sang kasogoan ginkusnit niya ang iya mga panapton. 20Kag ang hari nagsogo kay Helcias, kay Ahicam nga lalaking anak ni Safan, kay Abdon nga lalaking anak ni Mica, kay Safan nga escriba, kag kay Asaya nga alagad sang hari, nga nagasiling, 21“Kadto kamo, pakisayud kamo sa Ginoo tungud sa akon kag sa ila nga nabilin sa Israel kag sa Juda, nahanungud sa mga polong sang tolon-an nga nakita; kay daku ang kasingkal sang Ginoo nga gin-ula sa aton, bangud nga ang aton mga ginikanan wala magbantay sang polong sang Ginoo, sa paghimo sono sa tanan nga nasulat sa sini nga tolon-an.”
22Gani si Helcias kag sila nga ginsogo sang hari nagkadto kay Hulda nga manalagna nga babayi, ang asawa ni Salum nga lalaking anak ni Tocat, ang lalaking anak ni Hasra, manugbantay sang mga panapton (karon nagpuyo sia sa Jerusalem sa Ikaduhang Bahin) kag nagpamolong sila sa iya sa sina nga bagay. 23Kag nagsiling sa ila sia, “Amo ini ang ginasiling sang Ginoo, ang Dios sang Israel: ‘Isugid ninyo sa lalaki nga nagpadala sa inyo sa akon, 24amo ini ang ginasiling sang Ginoo, Yari karon, magadala ako sing malaut sa sini nga duug kag sa mga pumuluyo niya, ang tanan nga pagpakamalaut nga nasulat sa tolon-an nga ginbasa nila sa atubangan sang hari sang Juda. 25Bangud nga ginbayaan nila ako kag nagsonog sing incienso sa iban nga mga dios, agud nga mapaakig nila ako sa tanan nga binuhatan sang ila mga kamut, busa ang akon kasingkal gin-ula sa sini nga duug kag indi mag-ugdaw. 26Apang sa hari sang Juda, nga nagpadala sa inyo sa pagpakisayud sa Ginoo, amo ini ang isiling ninyo sa iya, Amo ini ang ginasiling sang Ginoo, ang Dios sang Israel: Nahanungud sa mga polong nga nabatian mo, 27bangud nga ang imo tagiposoon mahomok kag nagpaubus ka sang imo kaugalingon sa atubangan sang Dios sang pagkabati mo sang iya mga polong batok sini nga duug kag batok sa mga pumuluyo niya, kag nagpaubus sang imo kaugalingon sa atubangan nakon, kag nagkusnit sang imo mga panapton kag naghibi sa akon atubangan, ako man nagpamati sa imo, nagasiling ang Ginoo. 28Yari karon, isimpon ko ikaw sa imo mga ginikanan, kag isimpon ka sa imo lulubngan sa paghidait, kag ang imo mga mata indi makakita sang tanan nga malaut nga dalhon ko sini nga duug kag sa iya mga pumuluyo.’” Kag ginbalikan nila sing polong ang hari.
29Niyan ang hari nagpadala kag nagtipon sing tingub sang tanan nga tigulang sang Juda kag Jerusalem. 30Kag ang hari nagsaka sa balay sang Ginoo, upud ang tanan nga tawo sang Juda kag ang mga pumuluyo sang Jerusalem kag ang mga sacerdote kag ang mga Levinhon, ang bug-os nga katawohan dalagku kag magamay; kag ginbasa niya sa ila mga idulungug ang tanan nga polong sang tolon-an sang katipan nga nakita sa balay sang Ginoo. 31Kag ang hari nagtindug sa iya duug kag nagpakigkatipan sa atubangan sang Ginoo, sa pagsonod sa Ginoo kag sa pagbantay sang iya mga sogo kag sang iya mga pagpamatuud kag sang iya mga palatukuran, sa bug-os niya nga tagiposoon kag sa bug-os niya nga kalag, sa pagtuman sang mga polong sang katipan nga nasulat sa sini nga tolon-an. 32Niyan ang tanan nga nakita sa Jerusalem kag sa Benjamin ginpatindug niya sini. Kag ang mga pumuluyo sang Jerusalem naghimo sono sa katipan sang Dios, ang Dios sang ila mga ginikanan. 33Kag si Josias nagkuha sang tanan nga kangil-aran gikan sa tanan nga duta nga iya sang katawohan sang Israel, kag ginpaalagad niya ang tanan nga nakita sa Israel sa Ginoo nga ila Dios. Sa tanan niya nga adlaw wala sila magbiya sa pagsonod sa Ginoo nga Dios sang ila mga ginikanan.
Currently Selected:
2 MGA CRONICA 34: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society