2 MGA CRONICA 33
33
Ang Paghari ni Manases
(2 Hari 21:1-18)
1Si Manases napulog duha ka tuig sang nagsugud sia sa paghari, kag naghari sia sing kalim-an kag lima ka tuig sa Jerusalem. 2Ginhimo niya ang malaut sa itololok sang Ginoo,#Jer. 15:4. sono sa mga kangil-aran sang mga pungsud nga ginsobol sang Ginoo gikan sa atubangan sang katawohan sang Israel. 3Kay ginpatindug niya liwat ang mataas nga mga duug nga ginlumpag ni Ezequias nga iya amay, kag nagpatindug sia sing mga halaran sa mga Baal, kag naghimo sing Ashera, kag nagsimba sa bug-os nga kadam-an sang langit, kag nag-alagad sa ila. 4Kag nagpatindug sia sing mga halaran sa balay sang Ginoo, nga nahanungud sini ang Ginoo nagsiling, “Sa Jerusalem ang akon ngalan manginsa gihapon.”#2 Sam. 7:13. 5Kag nagpatindug sia sing mga halaran sa bug-os nga kadam-an sang langit sa duha ka luwang sang balay sang Ginoo. 6Ang iya mga lalaking anak ginpaagi man niya sa kalayo sa nalupyakan sang anak ni Hinom, kag nagpanglagpat sia kag nagbabaylan kag nagdiwata, kag naghisayo sa mga manugpagowa sang mga espiritu kag sa mga salamangkero. Naghimo sia sing labi kadamu nga malaut sa itololok sang Ginoo, sa pagpaakig sa iya. 7Kag ginpahamtang niya ang larawan nga tinigban sang diosdios nga nahimo niya sa balay sang Dios, nga nahanungud sini nagsiling ang Dios kay David kag kay Salomon nga iya lalaking anak, “Sa sining balay, kag sa Jerusalem, nga ginpili ko gikan sa tanan nga kabikahan sang Israel, ibutang ko ang akon ngalan sa gihapon; 8kag dili ko na paghalinon ang tiil sang Israel gikan sa duta nga gintangdo ko tungud sa inyo mga ginikanan, kon lamang magbantay sila sa paghimo sang tanan nga ginsogo ko sa ila, ang bug-os nga kasogoan, ang mga palatukuran, kag ang mga pagsolondan nga nahatag paagi kay Moises.”#1 Hari 9:3-5; 2 Cron. 7:12-18. 9Ginhaylo ni Manases ang Juda kag ang mga pumuluyo sang Jerusalem, sa bagay nga naghimo sila sing malaut nga labi pa sang ginhimo sang mga pungsud nga ginlaglag sang Ginoo sa atubangan sang katawohan sang Israel.
10Ang Ginoo nagpamolong kay Manases kag sa iya katawohan, apang wala sila magsapak. 11Busa gindala sang Ginoo sa ila ang mga pangolo sang kasoldadosan sang hari ang Asiria, nga nagdakup kay Manases sa mga talikala kag gingapus sia sa mga grilyos kag gindala sia sa Babilonia. 12Kag sang yara sia sa kalisdanan nagpakilooy sia sa Ginoo nga iya Dios kag nagpaubus sang iya kaugalingon sing daku sa atubangan sang Dios sang iya mga ginikanan. 13Nagpangamuyo sia sa iya, kag nalooy ang Dios sa iya kag ginpamatian ang iya pag-ampo kag ginpabalik sia sa Jerusalem sa iya ginharian. Niyan si Manases nakakilala nga ang Ginoo amo ang Dios.
14Sa tapus sini nagpatindug sia sing nagowa nga kuta sa banwa ni David nayon sa kilid nga nakatundan sang Gihon, sa nalupyakan, tubtub sa salamputan sa Gawang sang Isda, kag ginlibutan niya sini ang Ofel, kag ginpataas niya ini sing tama gid; ginbutangan niya sing isganan nga mga pangolo sa tanan nga napamakuran nga banwa sang Juda. 15Kag ginkuha niya ang mga dios nga dumuloong kag ang diosdios gikan sa balay sang Ginoo, kag ang tanan nga halaran nga napatindug niya sa bukid sang balay sang Ginoo kag sa Jerusalem, kag ginpilak sila sa gowa sang banwa. 16Ginkaayo man niya ang halaran sang Ginoo, kag nagdolot sa sini sing mga halad sang mga halad-sa-paghidait kag sang pagpasalamat; kag nagsogo sang Juda sa pag-alagad sa Ginoo nga Dios sang Israel. 17Walay sapayan ang katawohan naghalad pa sa mataas nga mga duug, apang sa Ginoo lamang nga ila Dios.
18Karon ang nabilin nga mga binuhatan ni Manases, kag ang iya pangamuyo sa iya Dios, kag ang mga polong sang mga manugpanan-aw nga nagpamolong sa iya sa ngalan sang Ginoo nga Dios sang Israel, yari karon, nasulat sa mga Binuhatan sang mga Hari sang Israel. 19Ang iya pangamuyo man, kag paano nga ang Dios nalooy sa iya, kag ang bug-os niyang sala kag ang iya paglapas, kag ang mga duug nga diin nagpatindug sia sing mataas nga mga duug kag nagpahamtang sang mga Asherim kag sang mga larawan nga tinigban, sang wala pa sia magpaubus sang iya kaugalingon, yari karon, nasulat sila sa Maragtas sang mga Manugpanan-aw. 20Gani si Manases nagtolog upud sa iya mga ginikanan, kag ginlubung nila sia sa iya kaugalingon nga balay; kag naghari nga tal-us niya si Amon nga iya anak.
Ang Paghari ni Amon
(2 Hari 21:19-26)
21Si Amon duha ka pulo kag duha ka tuig sang nagsugud sia sa paghari, kag naghari sia sing duha ka tuig sa Jerusalem. 22Naghimo sia sang malaut sa itololok sang Ginoo, subong sang ginhimo ni Manases nga iya amay. Si Amon naghalad sa tanan nga larawan nga tinigban nga nahimo ni Manases nga iya amay, kag nag-alagad sa ila. 23Kag wala sia magpaubus sang iya kaugalingon sa atubangan sang Ginoo, subong kay Manases nga iya amay nga nagpaubus sang iya kaugalingon, kondi ini gid nga Amon naglapas sing labi kag labi pa. 24Kag ang iya mga alagad nagpuhon batok sa iya kag nagpatay sa iya sa iya kaugalingon nga balay. 25Apang ang katawohan sang duta nagpatay sang tanan nga nagpuhon batok kay Hari Amon; kag ang katawohan sang duta naghimo nga hari nga tal-us niya kay Josias nga iya anak.
Currently Selected:
2 MGA CRONICA 33: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society