1 SAMUEL 28

1Sa sadto nga mga adlaw ang mga Filistinhon nagtipon sang ila mga kasoldadosan sa pagpakig-away batok sa Israel. Kag si Aquis nagsiling kay David, “Kilalahon mo sing totoo nga maggowa ka upud sa akon sa kasoldadosan ikaw kag ang imo mga tawo.” 2Si David nagsiling kay Aquis, “Busa makilala mo ang himoon sang imo alagad.” Kag si Aquis nagsiling kay David, “Busa himoon ko ikaw nga manugbantay sang akon olo sa gihapon.”

Si Saul kag ang Manugpagowa sang Espiritu sa En-dor

3Karon si Samuel patay na, kag ang bug-os nga Israel naghaya sa iya kag ginlubung sia sa Rama, sa iya gid kaugalingon nga banwa.#1 Sam. 25:1. Kag ginpagowa ni Saul gikan sa duta ang mga manugpagowa sang espiritu kag ang mga manugpakot.#Lev. 20:27; Deut. 18:10-11. 4Ang mga Filistinhon nagtipon sing tingub, kag nag-abut kag nagpahamtang sing dologan sa Sunem; kag gintipon sing tingub ni Saul ang bug-os nga Israel, kag nagpahamtang sila sing dologan sa Gilboa. 5Sang nakita ni Saul ang kasoldadosan sang mga Filistinhon, nahadluk sia, kag nagkurug sing daku ang iya tagiposoon. 6Kag sang si Saul nagpamangkot sa Ginoo, ang Ginoo wala magsabat sa iya, bisan sa mga damgo, ukon sa Urim,#Num. 27:21. bisan paagi sa mga manalagna. 7Niyan si Saul nagsiling sa iya mga alagad, “Pangitai ninyo ako sing babayi nga manugpagowa sang espiritu, agud nga ako magkadto sa iya kag mamangkot sa iya.” Kag ang iya mga alagad nagsiling sa iya, “Yari karon, may babayi sa En-dor nga manugpagowa sang espiritu.”

8Gani si Saul wala magpahilmon sang iya kaugalingon kag nagsuklub sing iban nga mga panapton, kag naglakat, sia kag ang duha ka tawo upud sa iya; kag nag-abut sila sa babayi sa kagab-ihon. Kag nagsiling sia, “Pakta paagi sa espiritu, kag pagowaa ang bisan sin-o nga hingadlan ko sa imo.” 9Ang babayi nagsiling sa iya, “Yari karon nahibaloan mo ang nahimo ni Saul, kon paano nga gintabog niya pa gowa sa duta ang mga manugpagowa sang espiritu kag ang mga manugpakot. Ngaa bala niyan nagabutang ka sing siod sa akon kabuhi sa pagpapatay sa akon?” 10Apang si Saul nagsumpa sa iya sa Ginoo, “Sa nagakabuhi ang Ginoo, wala sing silot nga mahanabu sa imo tungud sini nga butang.” 11Niyan ang babayi nagsiling, “Sin-o bala ang akon pagowaon sa imo?” Sia nagsiling, “Pagowaa sa akon si Samuel.” 12Sang nakita sang babayi si Samuel, nagsiagit sia sa mabaskug nga tingug; kag ang babayi nagpamolong kay Saul, “Ngaa bala nga ginlimbongan mo ako? Ikaw si Saul.” 13Ang hari nagsiling sa iya, “Dili ka mahadluk; kay ano bala ang imo nakita?” Kag ang babayi nagsiling kay Saul, “Ginatan-aw ko ang isa ka dios nga nagagowa sa duta.” 14Nagsiling sia sa iya, “Ano bala ang iya dagway?” Kag sia nagsiling, “Nagagowa ang isa ka tigulang nga lalaki; kag nakalumbutan sia sing kunup.” Kag nahantupan ni Saul nga amo si Samuel, kag naghapa sia sa duta, kag nagyaub.

15Niyan si Samuel nagsiling kay Saul, “Ngaa bala nga gintublag mo ako sa pagpagowa sa akon?” Kag si Saul nagsabat, “Nagakalisud ako sing tama; kay ang mga Filistinhon nagaaway batok sa akon, kag ang Dios nagbiya sa akon kag wala na nagsabat sa akon, bisan paagi sa mga manalagna ukon paagi sa mga damgo; busa ginpatawag ko ikaw agud nga mapakilala mo sa akon ang akon himoon.” 16Kag si Samuel nagsiling, “Ngaa bala niyan nagapamangkot ka sa akon, sa ginatan-aw nga nagbiya sa imo ang Ginoo kag nangin-imo kasumpung? 17Ang Ginoo naghimo sa imo subong sang ginpolong niya paagi sa akon; kag ginkusnit sang Ginoo ang ginharian gikan sa imo kamut, kag ginhatag ini sa imo isigkatawo,#1 Sam. 15:28. kay David. 18Bangud nga wala ka magtuman sang tingug sang Ginoo, kag wala maghimo sang iya masingkal nga kaakig sa Amalec,#1 Sam. 15:3-9. busa ang Ginoo naghimo sa imo sini nga butang karon nga adlaw. 19Labut pa itugyan sang Ginoo ang Israel man upud sa imo sa kamut sang mga Filistinhon; kag buwas ikaw kag ang imo mga anak nga lalaki manginkaupud nakon; itugyan man sang Ginoo ang kasoldadosan sang Israel sa kamut sang mga Filistinhon.”

20Niyan sa gilayon si Saul naghaplak sa duta sa bug-os niya nga kalabaon, kag ginhadlukan sing tama bangud sang mga polong ni Samuel; kag wala sing kusug sa iya, kay sa bug-os nga adlaw bisan sa bug-os nga gab-i wala sia makakaon sing tinapay. 21Kag nagkadto ang babayi kay Saul, kag nakita nga sia nalisang sing tama, kag nagsiling sa iya, “Yari karon, ang imo ulipon nagpamati sa imo tingug; kag ginbutang ko ang akon kabuhi sa akon kamut, kag nagpamati sa imo mga polong nga imo ginpamolong sa akon. 22Busa karon, pamati ka man sa tingug sang imo ulipon; kag tuguti ako pagbutang sing isa ka hungit nga tinapay sa atubangan mo; kag magkaon, agud nga may kusug ka kon maglakat ka sa imo dalanon.” 23Nagdumili sia, kag nagsiling, “Indi ako magkaon.” Apang ang iya mga alagad, pati ang babayi, nagpilit sa iya; kag sia nagpamati sa ila tingug. Gani nagbangon sia gikan sa duta, kag naglingkod sa higdaan. 24Karon ang babayi may pinatambok nga tinday nga baka sa balay, kag nagdalidali sia kag nag-ihaw sini, kag nagkuha sia sing harina, kag ginlamas ini kag nagbibingka sing tinapay nga wala sing tapay, 25kag gindala niya ini sa atubangan ni Saul kag sa atubangan sang iya mga alagad; kag nagkaon sila. Niyan nagtindug sila kag naglakat sadto nga gab-i.

Currently Selected:

1 SAMUEL 28: ABHIL82

Highlight

Copy