1 SAMUEL 27

Si David Nagapuyo sa tunga sang mga Filistinhon

1Kag si David nagsiling sa iya tagiposoon, “Karon mawala ako sa isa ka adlaw sa kamut ni Saul; wala na sing maayo pa sa akon kondi nga magpalagyo ako pakadto sa duta sang mga Filistinhon; niyan si Saul matak-an sa pagpangita pa sa akon sa bug-os nga ginsakpan sang Israel, sa amo makapalagyo ako gikan sa iya kamut.” 2Gani si David nagtindug kag naglaton, sia kag ang anum ka gatus ka lalaki nga upud sa iya, kay Aquis nga anak ni Maoc, hari sa Gat. 3Kag nagpuyo si David upud kay Aquis sa Gat, sia kag ang iya mga tawo, ang tagsa ka tawo upud ang iya panimalay, kag si David kag ang iya duha ka asawa, si Ahinoam nga Jezreelnon, kag si Abigail nga Carmelonhon nga asawa anay ni Nabal. 4Kag sang ginsugid kay Saul nga si David nagpalagyo sa Gat, wala na gid sia magpangita sa iya.

5Niyan si David nagsiling kay Aquis, “Kon karon nakapahamuut ako sa imo mga mata, pahataga sila sa akon sing duug sa isa sang mga banwa sa duta, agud magpuyo ako didto; kay ngaa bala nga magpuyo ang imo alagad upud sa imo sa banwa nga harianon?” 6Gani ginhatag sa iya ni Aquis sadto nga adlaw ang Ziklag; busa ang Ziklag naigo sa mga hari sang Juda tubtub sini nga adlaw. 7Kag ang kadamuon sang mga adlaw nga ginpuyo ni David sa duta sang mga Filistinhon isa ka tuig kag apat ka bulan.

8Karon nagtaklad si David kag ang iya mga tawo, kag nangati sa mga Gesurnon, sa mga Girzinhon, kag sa mga Amalecnon; kay yadto nga mga pumuluyo sang duta gikan sa dumaan, sa nagapakadto ka sa Sur, tubtub sa duta sang Egipto. 9Kag ginlaglag ni David ang duta, kag wala sing ginluwas nga buhi bisan lalaki ukon babayi, kag ginkuha ang mga carnero, ang mga baka, ang mga asno, ang mga camelyo, kag ang mga bayo, kag nagpauli sia kag nag-abut kay Aquis. 10Sang si Aquis nagsiling, “Batok kay sin-o nangati kamo karon nga adlaw?” Si David nagsiling, “Batok sa Bagatnan sang Juda,” ukon “Batok sa Bagatnan sang mga Jerameelnon,” ukon, “Batok sa Bagatnan sang mga Cinhanon.” 11Kag si David wala sing ginluwas nga buhi nga lalaki ukon babayi, sa pagdala sa ila sa Gat, nga nagasiling, “Basi nga magpanugid sila nahanungud sa amon, nga nagasiling, ‘Amo ini ang ginhimo ni David.’” Amo ini ang iya pamatasan sa bug-os nga tion nga nagpuyo sia sa duta sang mga Filistinhon. 12Kag si Aquis nagpati kay David, nga nagasiling, “Ginpangil-ad niya sing bug-os sa iya ang iya katawohan nga Israel; busa mangin-akon sia alagad sa gihapon.”

Currently Selected:

1 SAMUEL 27: ABHIL82

Highlight

Copy