1 SAMUEL 16

Si David Ginhaplas nga Hari

1Ang Ginoo nagsiling kay Samuel, “Tubtub pa bala san-o nga maglalaw ka kay Saul, sa ginatan-aw nga ginsikway ko sia sa pagkahari sa ibabaw sang Israel? Pun-a ang imo sungay sing lana, kag lakat ka; ipadala ko ikaw kay Jesse nga taga-Bet-lehem, kay sa tunga sang iya mga anak nga lalaki nakaaman ako sa akon sing hari.” 2Kag si Samuel nagsiling, “Paano bala nga paglakat ko? Kon si Saul makabati sini, patyon niya ako.” Kag ang Ginoo nagsiling, “Dala ka sing bakiya nga baka, kag magsiling, ‘Nagkari ako sa paghalad sa Ginoo.’ 3Kag tawga si Jesse sa paghalad, kag ipakita ko sa imo ang himoon mo; kag haplason mo sa akon sia nga ihingalan ko sa imo.” 4Ginhimo ni Samuel ang ginpamolong sang Ginoo, kag nag-abut sa Bet-lehem. Ang mga tigulang sang banwa naggowa sa pagsugata sa iya nga nagakurug, kag nagsiling, “Nagakari ka bala sing madaiton?” 5Kag nagsiling sia, “Sing madaiton; nagkari ako sa paghalad sa Ginoo; pakabalaana ang inyo mga kaugalingon, kag kari kamo upud sa akon sa paghalad.” Kag ginpakabalaan niya si Jesse kag ang iya mga anak nga lalaki, kag gintawag sila sa paghalad.

6Sang pag-abut nila, nagtolok sia kay Eliab kag nagsiling sia, “Sa pagkamatuud ang hinaplas sang Ginoo yari sa iya atubangan.” 7Apang ang Ginoo nagsiling kay Samuel, “Dili ka magtolok sa iya nawung ukon sa iya kataason, bangud nga ginsikway ko sia; kay ang Ginoo nagatan-aw indi subong sang pagtan-aw sang tawo; ang tawo nagatolok sa gowa nga dagway, apang ang Ginoo nagatolok sa tagiposoon.” 8Niyan gintawag ni Jesse si Abinadab, kag ginpalabay sia sa atubangan ni Samuel. Kag sia nagsiling, “Wala magpili ang Ginoo sini.” 9Niyan ginpalabay ni Jesse si Sama. Kag sia nagsiling, “Wala magpili ang Ginoo sini.” 10Kag ginpalabay ni Jesse ang iya pito ka anak nga lalaki sa atubangan ni Samuel. Kag si Samuel nagsiling kay Jesse, “Ang Ginoo wala magpili sa ila sini.” 11Kag si Samuel nagsiling kay Jesse, “Yari bala tanan ang imo kabataan?” Kag nagsiling sia, “Nabilin pa ang kamanghuran, apang yari karon, nagabantay sia sang mga carnero.” Kag si Samuel nagsiling kay Jesse, “Pakadtoi kag ipakuha sia; kay indi kita maglingkod tubtub nga mag-abut sia diri.” 12Kag ginpakadtoan niya, kag gindala sia sa sulud. Karon mapulapula sia, kag labut pa matahum sing nawung, kag magayon nga tolokon. Kag ang Ginoo nagsiling, “Tindug ka, haplasa sia; kay ini amo sia.” 13Niyan ginkuha ni Samuel ang sungay nga may lana, kag ginhaplas sia sa tunga sang iya mga utud; kag ang Espiritu sang Ginoo nag-abut sing gamhanan kay David kutub sadtong adlaw padayon. Gani si Samuel nagtindug, kag nagpauli sa Rama.

Si David Nagakutingkuting sang Arpa tungud kay Saul

14Karon ang Espiritu sang Ginoo naghalin kay Saul, kag ang espiritu nga malaut gikan sa Ginoo nagpalisang sa iya. 15Kag ang mga alagad ni Saul nagsiling sa iya, “Yari karon, ang espiritu nga malaut gikan sa Dios nagapalisang sa imo. 16Magsogo karon ang amon ginoo sa imo mga alagad, nga yara sa atubangan mo, sa pagpangita sing tawo nga sampaton sa pagkutingkuting sang arpa; kag kon yara sa imo ang espiritu nga malaut gikan sa Dios, magkutingkuting sia sa iya kamut, kag mag-ayo ka.” 17Gani si Saul nagsiling sa iya mga alagad, “Pangitai ninyo ako sing tawo nga maayo magkutingkuting, kag dalha sia sa akon.” 18Ang isa sang mga pamatan-on nga lalaki nagsabat, “Yari karon, nakita ko ang anak nga lalaki ni Jesse nga taga-Bet-lehem, nga sampaton magkutingkuting, gamhanan nga tawo nga isganan, hangaway, sampaton sa paghambal, kag maambong nga tawo; kag ang Ginoo nagaupud sa iya.” 19Busa si Saul nagpadala sing mga manugbalita kay Jesse, kag nagsiling, “Ipadala sa akon si David nga imo anak nga lalaki, nga nagaupud sa mga carnero.” 20Kag si Jesse nagkuha sing isa ka asno nga nalulanan sing kalan-on, kag isa ka suludlan nga panit nga alak kag isa ka tinday nga kanding, kag ginpadala sila kay Saul paagi kay David nga iya anak. 21Kag si David nag-abut kay Saul, kag nagtindug sa atubangan niya. Kag ginhigugma ni Saul sia sing daku, kag nanginmanugdala sia sang hinganib niya. 22Kag si Saul nagpasogo kay Jesse, nga nagasiling, “Patinduga si David sa atubangan nakon, kay nakapahamuut sia sa akon itololok.” 23Kag kon ang espiritu nga malaut gikan sa Dios yara kay Saul, si David nagkuha sang arpa kag nagkutingkuting sini sa iya kamut; sa amo si Saul naumpawan, kag nag-ayo, kag ang espiritu nga malaut naghalin sa iya.

Currently Selected:

1 SAMUEL 16: ABHIL82

Highlight

Copy