1 SAMUEL 15

Ang Paglalis ni Saul kag ang Pagsikway sa Iya

1Kag si Samuel nagsiling kay Saul, “Ang Ginoo nagpadala sa akon sa paghaplas sa imo nga hari sa iya katawohan nga Israel;#1 Sam. 10:1. busa karon pamati ka sa mga polong sang Ginoo. 2Amo ini ang ginasiling sang Ginoo sang mga kasoldadosan, ‘Gintandaan ko ang ginhimo ni Amalec sa Israel kon paano nga nagbalabag sia batok sa iya sa dalanon, sang nagtaklad sia gikan sa Egipto.#Ex. 17:8-14; Deut. 25:17-19. 3Karon lakat ka kag gubata ang Amalec, kag laglaga sing bug-os ang tanan nga ila; dili sila pagpasayloha, kondi patya ang lalaki kag ang babayi, bata kag nagasoso, baka kag carnero, camelyo kag asno.’”

4Gani gintipon ni Saul ang katawohan, kag gin-isip sila sa Telaim, duha ka gatus ka libo nga hangaway nga nagalakat, kag napulo ka libo ka mga lalaki sang Juda. 5Kag si Saul nag-abut sa banwa sang Amalec, kag nagpuut sa nalupyakan. 6Kag si Saul nagsiling sa mga Cenhanon, “Lakat, halin kamo, kag dulhog kamo gikan sa tunga sang mga Amalecnon, basi nga malaglag ko kamo upud sa ila; kay nagpakita kamo sing kalolo sa tanan nga katawohan sang Israel sang nagtaklad sila gikan sa Egipto.” Gani ang mga Cenhanon naghalin sa tunga sang mga Amalecnon. 7Kag gindusdus ni Saul ang mga Amalecnon, kutub sa Havila sa nagapakadto ka sa Sur, nga yara sa tampad sang Egipto. 8Kag gindakup niya nga buhi si Agag nga hari sang mga Amalecnon, kag ginlaglag niya ang bug-os nga katawohan sa sulab sang espada. 9Apang si Saul kag ang katawohan nagpasaylo kay Agag, kag ang labing maayo gid sang mga carnero kag sang kabakahan kag sang mga pinatambok, kag sang mga cordero, kag sang tanan nga maayo, kag indi buut nga laglagon sila sing bug-os; ang tanan nga talamayon kag biyabiya yadto ginlaglag nila sing bug-os.

10Nag-abut ang polong sang Ginoo kay Samuel: 11“Nagpakalisud sa akon nga ginpahamtang ko nga hari si Saul; kay nagtalikod sia sa pagsonod sa akon, kag wala magtuman sang akon mga sogo.” Kag si Samuel nagsingkal; kag nagtuaw sia sa Ginoo sa bug-os nga gab-i. 12Kag si Samuel nagbangon sing aga pa sa pagsugata kay Saul sa pagkaaga; kag ginsugid ini kay Samuel, “Si Saul nagkadto sa Carmelo, kag yari karon, nagpatindug sia sing manumento kag nagliso sia, kag nagpadayon, kag nagdulhog pa Gilgal.” 13Kag si Samuel nag-abut kay Saul, kag si Saul nagsiling sa iya, “Pinakamaayo ka sang Ginoo; natuman ko ang sogo sang Ginoo.” 14Kag si Samuel nagsiling, “Ano bala niyan ang kahologan sini nga pagbaba sang mga carnero sa akon idulungug, kag sang pagmama sang kabakahan nga ginapamatian ko?” 15Si Saul nagsiling, “Gindala nila sila gikan sa mga Amalecnon; kay ang katawohan nagpasaylo sang labi gid kaayo sang mga carnero kag sang mga baka, nga ihalad sa Ginoo nga imo Dios; kag ang nabilin ginlaglag namon.” 16Niyan si Samuel nagsiling kay Saul, “Untat ka! Isugid ko sa imo ang ginsiling sa akon sang Ginoo sini nga gab-i.” Kag sia nagsiling sa iya, “Isiling.”

17Kag si Samuel nagsiling, “Bisan diotay ka sa imo kaugalingon nga itololok, wala ka bala paghimoa nga pangolo sa mga kabikahan sang Israel? Ang Ginoo naghaplas sa imo nga hari sa ibabaw sang Israel. 18Kag ang Ginoo nagpadala sa imo sa panlakatan, kag nagsiling, ‘Lakat ka, laglaga sing bug-os ang mga makasasala nga mga Amalecnon, kag awaya sila tubtub nga mapapas sila.’ 19Ngaa bala niyan nga wala mo pagtumana ang tingug sang Ginoo? Ngaa bala nagdamhag kamo sa inagaw, kag naghimo sang malaut sa itololok sang Ginoo?” 20Kag si Saul nagsiling kay Samuel, “Hoo, gintuman ko ang tingug sang Ginoo, nagkadto ako sa dalanon nga ginpadalhan sa akon sang Ginoo, gindala ko si Agag nga hari sang Amalec, kag ginlaglag ko sing bug-os ang mga Amalecnon. 21Apang ang katawohan nagkuha sang inagaw, mga carnero kag mga baka, ang ali sang tinagudilian nga mga butang, nga ihalad sa Ginoo nga imo Dios sa Gilgal.” 22Kag si Samuel nagsiling,

“May daku bala nga kahamuut ang Ginoo sa mga halad-nga-sinonog kag mga halad,

subong sang sa pagtuman sang tingug sang Ginoo?

Yari karon, ang pagtuman maayo pa sang sa halad,

kag ang pagpamati sang sa sapay sang mga carnero.

23Kay ang pagbato subong sang sala sang pagkababaylan,

kag ang pagkabatinggilan subong sang pagkadiwatahan kag mga terafim.

Bangud nga ginsikway mo ang polong sang Ginoo,

sia man nagsikway sa imo sa pagkahari.”

24Kag si Saul nagsiling kay Samuel, “Nakasala ako; kay ginlalis ko ang sogo sang Ginoo kag ang imo mga polong, bangud nga nahadluk ako sa katawohan kag nagtuman sa tingug nila. 25Busa karon, ginaampo ko sa imo, patawara ang akon sala, kag balik ka upud sa akon, agud nga magsimba ako sa Ginoo.” 26Kag si Samuel nagsiling kay Saul, “Indi ako makabalik upud sa imo; kay ginsikway mo ang polong sang Ginoo, kag ang Ginoo nagsikway sa imo sa pagkahari sang Israel.” 27Sang nagtalikod si Samuel sa paglakat, ginhawiran ni Saul ang sidsid sang iya bayo, kag ini nagisi. 28Kag si Samuel nagsiling sa iya, “Ang Ginoo naggisi gikan sa imo sang ginharian sang Israel sini nga adlaw, kag naghatag sini sa imo isigkatawo, nga maayo pa sa imo. 29Kag ang Kusug man sang Israel indi magbutig ukon maghinulsul; kay indi sia tawo, nga maghinulsul sia.” 30Niyan si Saul nagsiling, “Nakasala ako; apang padunggi ako karon sa atubangan sang mga tigulang sang akon katawohan kag sa atubangan sang Israel, kag balik ka upud sa akon, agud nga magsimba ako sa Ginoo nga imo Dios.” 31Gani nagbalik si Samuel sa olihi ni Saul; kag si Saul nagsimba sa Ginoo.

32Niyan si Samuel nagsiling, “Dalha ninyo diri sa akon si Agag nga hari sang mga Amalecnon.” Kag si Agag nag-abut sa iya sing malipayon. Si Agag nagsiling, “Sa pagkamatuud nag-agi na ang kapaitan sang kamatayon.” 33Kag si Samuel nagsiling, “Subong nga ang imo espada nagkuha sa mga babayi sang ila mga bata, sa amo ang imo iloy manginwala sing bata sa tunga sang mga babayi.” Kag gin-utud-utud ni Samuel si Agag sa atubangan sang Ginoo sa Gilgal.

34Niyan si Samuel nagkadto sa Rama; kag si Saul nagtaklad sa iya balay sa Gabaa ni Saul. 35Kag si Samuel wala na magpakigkita kay Saul tubtub sa adlaw sang iya kamatayon, kay si Samuel naglalaw kay Saul. Kag ang Ginoo nagkalisud nga nahimo niya si Saul nga hari sa ibabaw sang Israel.

Currently Selected:

1 SAMUEL 15: ABHIL82

Highlight

Copy