Marcos 6

Si Jesus Ginsikway sa Nazaret

(Mat. 13:53-58; Luc. 4:16-30)

1Naghalin si Jesus sa sadto nga lugar upod sa iya mga gintuton-an kag nagkadto sa iya ginaestaran nga banwa. 2Sang Adlaw nga Inugpahuway nagpanudlo sia sa sinagoga. May madamo nga mga tawo didto, kag sang pagkabati nila sa iya natingala gid sila kag nagpamangkot, “Diin bala niya kinuha ini tanan? Ano bala ini nga kaalam ang ginhatag sa iya? Paano ang paghimo niya sining mga milagro? 3Indi bala ini sia ang panday nga anak ni Maria kag utod nanday Santiago, Jose, Judas kag Simon? Indi bala nga ang iya mga utod nga babayi taga-diri?” Gani indi sila magpati sa iya.

4Si#Juan 4:44. Jesus nagsiling sa ila, “Ang isa ka propeta ginatahod bisan diin luas lang sa iya ginaestaran nga banwa kag sa iya mga pariente kag panimalay.”

5Wala sia didto makahimo sang mga milagro luas lang sa pag-ayo sang pila ka mga masakiton paagi sa pagtandog sa ila. 6Natingala gid sia tungod kay wala sila sing pagtuo sa iya.

Ginpadala ni Jesus ang Dose ka mga Apostoles

(Mat. 10:5-15; Luc. 9:1-6)

Dayon nagkadto si Jesus sa palibot nga mga barangay nga nagapanudlo sa mga tawo. 7Gintawag niya ang dose ka mga apostoles kag ginpalakat sila sing tagduhaduha. Ginhatagan niya sila sing autoridad sa pagtabog sang malaut nga mga espiritu. 8Ginmanduan#Luc. 10:4-11. niya sila nga sa ila pagpanglakaton indi magdala sing pagkaon ukon kwarta ukon bag, kundi sang sungkod lamang. 9Sarang sila makagamit sang sandalyas pero indi na sila magdala sang ilislan nga bayu. 10Ginsingganan pa gid niya sila, “Kon mag-abot kamo sa isa ka banwa, magdayon kamo sa balay sang nagabaton sa inyo tubtob sa inyo paghalin sa sina nga lugar. 11Kon#Bin. 13:51. magkadto kamo sa isa ka banwa sa diin wala kamo ginabaton ukon ginapamatian sang mga tawo, bayai ninyo ina nga lugar kag tataka ang mga yab-ok sa inyo mga tiil. Ini manginpaandam sa ila!”

12Gani naglakat ang dose ka mga apostoles kag nagwali sa mga tawo nga dapat sila magbiya sa ila mga sala. 13Gintabog#San. 5:14. nila ang madamo nga mga demonyo, kag ginhaplasan nila sing lana ang mga masakiton kag nag-alayo sila.

Ang Pagpatay kay Juan nga Manugbautiso

(Mat. 14:1-12; Luc. 9:7-9)

14Karon#Mat. 16:14; Mar. 8:28; Luc. 9:19. ini tanan nabatian ni Haring Herodes#6:14 HARING HERODES: Herodes Antipas, pangulo sang Galilea. tungod kay ginbantog si Jesus sa tanan nga lugar. May mga tawo nga nagsiling, “Nabanhaw si Juan nga manugbautiso! Amo ini ang kabangdanan kon ngaa may gahom sia sa paghimo sang mga milagro.”

15Pero ang iban nagsiling, “Si Elias sia.”

Kag ang iban pa gid nagsiling, “Isa sia ka propeta, kaangay sang mga propeta sang una anay.”

16Sang pagkabati ni Herodes sini nagsiling sia, “Si Juan nga manugbautiso sia! Ginpapugotan ko sia, pero karon nabanhaw!” 17Si#Luc. 3:19-20. Herodes mismo amo ang nagmando nga ipadakop kag ipagapos kag ipabilanggo si Juan. Ginhimo ni Herodes ini tungod kay Herodias nga iya ginpangasawa bisan nga sia asawa sang iya utod nga si Felipe. 18Pirme lang si Herodes ginahambalan ni Juan nga manugbautiso, “Indi matarong ang imo pagpakigpuyo sa asawa sang imo utod!”

19Gani gindumtan ni Herodias si Juan kag gintuyo niya nga patyon sia, pero indi sia makahimo sini tungod kay Herodes. 20Nahadlok si Herodes sa kay Juan tungod kay nahibal-an niya nga si Juan matarong kag balaan nga tawo. Gani, gin-apinan niya si Juan nga indi maano. Naluyag sia magpamati sa iya wala sapayan nga nagakatublag gid sia sa kada tion nga nagapamati sia sa iya.

21Sang ulihi nag-abot gid ang kahigayunan nga ginahulat ni Herodias. Kaadlawan yadto ni Herodes kag naghiwat sia sing isa ka punsyon para sa mataas nga mga pangulo sang banwa, mga opisyales sang mga soldado kag bantog nga mga pumoluyo sang Galilea. 22Ang anak nga babayi ni Herodias#6:22 Ang anak nga babayi ni Herodias: Ang iban nga mga manuskrito mayAng iya anak nga babayi nga si Herodias. nagsulod kag nagsaot, kag naglingaw sa kay Herodes kag sang iya mga dinapit. Gani ang hari nagsiling sa dalagita, “Pangayo ka sang bisan ano nga luyag mo kay ihatag ko sa imo.” 23Kag nagsiling pa sia, “Ginasumpa ko nga ihatag ko sa imo ang bisan ano nga pangayuon mo, bisan pa ang katunga sang akon ginharian!”

24Gani naggwa ang dalagita kag nagpamangkot sa iya iloy, “Ano bala ang pangayuon ko?”

Ang iloy nagsabat, “Ang ulo ni Juan nga manugbautiso.”

25Sa gilayon nagdalidali sa pagbalik ang dalagita sa hari kag nagpangabay, “Gusto ko nga ihatag mo sa akon sa gilayon ang ulo ni Juan nga manugbautiso sa isa ka bandihado!”

26Nagpasubo gid ini sa hari, pero indi na sia makabalibad tungod kay nagpanumpa sia sa atubang sang iya mga inagda. 27Gani ginsugo niya sa gilayon ang isa ka soldado sa pagdala sa iya sang ulo ni Juan. Nagkadto ang soldado sa prisuhan kag ginpugotan si Juan. 28Kag gindala niya ang ulo nga natungtong sa isa ka bandihado kag ginhatag ini sa dalagita nga amo ang naghatag sini sa iya iloy. 29Sang mabatian ini sang mga gintuton-an ni Juan, ginkadtuan nila kag ginkuha ang iya bangkay kag ginlubong.

Ginpakaon ni Jesus ang 5,000

(Mat. 14:13-21; Luc. 9:10-17; Juan 6:1-14)

30Ang mga apostoles nagbalik sa kay Jesus kag ginsugiran nila sia sang tanan nga ila nahimo kag napanudlo. 31Sa pagkadamo sang mga tawo ang nagapakadto kag nagapakari sa bagay nga si Jesus kag ang iya mga gintuton-an wala na sing tion bisan sa pagkaon. Gani nagsiling sia sa ila, “Dali masaylo kita sa isa ka lugar nga kitahanon lang agod makapahuwayhuway kamo.” 32Gani nagsakay sila sa sakayan nga silahanon lang kag nagkadto sa isa ka naligwin nga lugar.

33Pero madamo nga mga tawo ang nakakita sang ila paghalin kag nakahibalo dayon kon sin-o sila. Gani naggwa sila sa tanan nga mga banwa kag nagdalagan pakadto sa ginapadulongan ni Jesus kag sang iya mga gintuton-an, kag una pa sila makaabot didto. 34Sang#Num. 27:17; 1 Hari 22:17; 2 Cron. 18:16; Ezeq. 34:5; Mat. 9:36. pagtakas ni Jesus, nakita niya ang masyado kadamo nga mga tawo kag nagbatyag sia sing kaluoy sa ila tungod kay subong sila sang mga karnero nga wala sing manugbantay. Kag gintudloan niya sila sang madamo nga mga butang. 35Sang hapon na gid ang iya mga gintuton-an nagkadto sa iya kag nagsiling, “Hapon na gid kag baw-ing ini nga lugar. 36Palakta kag pakadtua ang mga tawo sa mga barangay ukon sityo sa palibot agod nga makabakal sila mismo sang ila pagkaon.”

37Nagsabat si Jesus, “Kamo mismo ang maghatag sa ila sing pagkaon.”

Nagpamangkot sila, “Gusto mo bala nga maglakat kami sa pagbakal sing tinapay nga nagabili sing 200 ka denario#6:37 DENARIO: Ang isa ka denario minimo nga suhol sang ordinaryo nga mamumogon para sa isa ka adlaw nga pag-obra. (tan-awa ang Mat. 20:2). agod nga mapakaon sila?”

38Gani si Jesus nagpamangkot sa ila. “Pila bala ka bilog ang inyo tinapay? Abi tan-awa ninyo.”

Sang mausisa nila, nagsiling sila, “Lima ka bilog nga tinapay kag duha ka bilog nga isda.”

39Gani ginsugo ni Jesus ang iya mga gintuton-an sa pagpapungko sang mga tawo sing grupo-grupo sa hilamon. 40Kag ang mga tawo grupo-grupo nga nagpungko kag napa-idas. Ang iban nga grupo tag-ginatos kag ang iban naman tag-singkwenta. 41Dayon ginkuha ni Jesus ang lima ka bilog nga tinapay kag ang duha ka bilog nga isda, nagtangla sia sa langit, kag nagpasalamat sa Dios. Iya ginpamihakpihak ang tinapay kag ginhatag sa iya mga gintuton-an agod nga ila ipanagtag sa mga tawo. Iya man ginpartiparti ang duha ka bilog nga isda sa ila tanan. 42Nagkaon sila tanan kag nagkalabusog. 43Dayon gintipon sang mga gintuton-an ang nagkalabilin nga tinapay kag isda kag napuno ang dose ka mga alat. 44Ang kadamuon sang mga lalaki nga nagkalaon 5,000.

Si Jesus Naglakat sa Ibabaw sang Tubig

(Mat. 14:22-33; Juan 6:15-21)

45Sa gilayon ginpasakay ni Jesus ang iya mga gintuton-an sa sakayan kag ginpauna sila sa Betsaida sa tabok sang linaw, samtang ginpapauli niya ang mga tawo. 46Sa tapos sia makapaalam sa ila, nagkadto sia sa isa ka bakulod sa pagpangamuyo. 47Sang pagkagab-i, ang sakayan yadto na sa tunga sang linaw, samtang si Jesus isahanon lang sa takas. 48Nalantawan niya nga ang iya mga gintuton-an ginabudlayan sa pagbugsay kay sumpong ang hangin. Gani sang kaagahon na, nag-apas si Jesus sa ila nga nagalakat sa ibabaw sang tubig. Ligaran lang niya sila#6:48 Ligaran lang niya sila: ukonMabuylog sia sa ila. kuntani, 49pero nakita nila sia nga nagalakat sa ibabaw sang tubig kag naghunahuna sila nga bagat sia. Gani nagsinggit sila, “Bagat!” 50Kay sang pagkakita nila tanan sa iya hinadlukan sila.

Sa gilayon si Jesus nagsiling sa ila, “Indi kamo magkahadlok! Ako ini. Magpakaisog kamo!” 51Dayon nagsakay sia sa sakayan upod sa ila kag ang hangin nagkanay. Natingala gid sila, 52tungod kay wala pa nila mahangpi ang kahulogan sang pagmuad sang tinapay, kundi nadulman pa ang ila mga panghunahuna.

Ginpang-ayo ni Jesus ang mga Masakiton sa Genesaret

(Mat. 14:34-36)

53Nakatabok sila sa linaw kag nagdungka sa Genesaret sa diin ginpundo nila ang sakayan. 54Sang pagtakas nila, sa gilayon nakilala sang mga tawo si Jesus. 55Gani ang mga tawo nagkadto sa tanan nga mga bahin sang rehiyon kag nagdala sila sang mga masakiton nga nayayungan sa ila mga hiligdaan sa bisan diin nga lugar nga mabatian nila nga didto si Jesus. 56Kag bisan diin sia magkadto, sa mga barangay, banwa ukon uma, ang mga tawo nagdala sang ila mga masakiton sa mga tiendahan kag nagpakitluoy sa iya nga kon mahimo makatandog ang mga balatianon bisan sa sidsid lamang sang iya kunop, kag ang tanan nga nagtandog sini nag-alayo.

Currently Selected:

Marcos 6: MBBHIL12

Highlight

Copy