Mateo 23

Nagpaandam si Jesus batok sa mga Manunodlo sang Kasugoan kag sa mga Fariseo

(Mar. 12:38-39; Luc. 11:43, 46; 20:45-46)

1Dayon si Jesus naghambal sa madamo nga mga tawo kag sa iya mga gintuton-an, 2“Ang mga manunodlo sang Kasugoan kag ang mga Fariseo amo ang may awtoridad sa pagsaysay sang Kasugoan ni Moises. 3Gani tumana kag sunda ninyo ang tanan nga ginasiling nila sa inyo, pero indi kamo mag-ilog sang ila mga ginahimo, tungod kay wala nila ginabutang sa buhat ang ila ginawali. 4Ginahatagan nila ang mga tawo sang madamo nga mga katungdanan nga mabudlay tumanon, pero wala man gani sila mismo nagahimo sang bisan diutay lang nga butang sa pagbulig, agod tumanon ini nga mga katungdanan. 5Ang#Mat. 6:1; Deut. 6:8; Num. 15:38. tanan nila nga ginahimo pakitakita lang sa mga tawo. Tan-awa kon daw ano kadalagku ang mga sulodlan sang mga dinalan sang kasulatan nga ginabugkos nila sa ila mga agtang kag sa ila mga butkon, kag malaba ang mga sidsid sang ila bayu! 6Luyag nila ang pinasulabi nga mga pulongkuan sa mga punsyon kag sa nahauna nga mga pulongkuan sa mga sinagoga. 7Luyag sila nga abi-abihon nga may pagtahod sa mga tiendahan, kag luyag sila tawgon sang mga tawo nga ‘Manunodlo.’ 8Pero indi dapat magpatawag kamo nga ‘Manunodlo,’ tungod kay kamo tanan mag-ulotod, kag isa lamang ang inyo Manunodlo. 9Kag indi kamo magtawag bisan kay sin-o nga tawo diri sa duta nga ‘Amay,’ tungod kay isa lamang ang inyo amay sa langit. 10Kag indi man kamo magpatawag nga ‘Pangulo,’ tungod kay isa lamang ang inyo pangulo nga amo ang Cristo. 11Ang#Mat. 20:26-27; Mar. 9:35; 10:43-44; Luc. 22:26. labing daku sa inyo dapat manginsuloguon ninyo. 12Ang#Luc. 14:11; 18:14. bisan sin-o nga nagapakataas sang iya kaugalingon pagapauboson, kag ang bisan sin-o nga nagapaubos sang iya kaugalingon pagapakataason.

Ginpakamalaut ni Jesus ang Ila Pagkahipokrito

(Mar. 12:40; Luc. 11:39-42, 44, 52; 20:47)

13“Makaluluoy man kamo, mga manunodlo sang Kasugoan kag mga Fariseo! Mga hipokrito! Ginatakpan ninyo ang pwertahan sang Ginharian sang langit sa mga tawo, pero kamo inyo wala nagasulod kag ginabalabagan pa ninyo ang nagatinguha sa pagsulod!#23:13 Ang iban nga mga manuskrito nagadugang sang bersikulo 14: “Makaluluoy man kamo, mga manunodlo sang Kasugoan kag mga Fariseo! Mga hipokrito! Nagapamintaha kamo sa mga balo nga babayi paagi sa pagkuha sang ila mga pagkabutang kag dayon ginatabuntabonan lang ninyo ang inyo hinimuan paagi sa malawig nga mga pagpangamuyo! Tungod sini labi pa gid ang inyo silot! (tan-awa ang Mar. 12:40).

15“Makaluluoy man kamo, mga manunodlo sang Kasugoan kag mga Fariseo! Mga hipokrito! Ginatabok ninyo ang mga kadagatan kag ginalatas ang mga kadutaan sa pagkonbertir sang isa ka tawo, kag kon makonbertir na gani ninyo sia, ginahimo ninyo nga doble pa kalain sang sa inyo nga bagay magkadto sa impierno!

16“Makaluluoy man kamo, mga bulag nga manugtuytoy! Nagatudlo kamo, ‘Kon ang tawo magsumpa sa templo, indi kinahanglan nga tumanon niya ang iya sumpa. Pero kon magsumpa sia sa bulawan nga yara sa templo, kinahanglan tumanon niya ang iya sumpa.’ 17Mga bulag nga buangbuang! Diin bala ang mas importante, ang bulawan ukon ang templo nga nagapabalaan sang bulawan? 18Nagatudlo man kamo, ‘Kon ang tawo magsumpa sa altar, indi kinahanglan nga tumanon niya ang iya sumpa, pero kon magsumpa sia sa dulot nga yara sa ibabaw sang altar, kinahanglan tumanon niya ang iya sumpa.’ 19Mga bulag gid kamo! Diin bala ang mas importante, ang dulot ukon ang altar nga nagapabalaan sang dulot? 20Gani kon ang tawo magsumpa sa altar, nagasumpa sia sa altar kag sa tanan nga dulot nga yara sa altar. 21Kag kon ang tawo magasumpa sa templo, nagasumpa sia sa templo kag sa Dios nga nagaestar diri. 22Kag#Isa. 66:1; Mat. 5:34. kon ang tawo magsumpa sa langit nagasumpa sia sa trono sang Dios kag sa iya nga nagapungko didto.

23“Makaluluoy#Lev. 27:30. man kamo, mga manunodlo sang Kasugoan kag mga Fariseo! Mga hipokrito! Nagahatag kamo sa Dios sang ikapulo nga bahin bisan sang mga panakot subong sang tanglad, sang sibuyas, sang luy-a, pero ginapatumbayaan ninyo ang pagtuman sang labing importante nga mga ginatudlo sang Kasugoan, nga amo ang katarungan, kaluoy kag pagtuo. Amo ini ang inyo dapat buhaton nga wala nagapatumbaya sang iban nga mga kasugoan. 24Mga bulag nga manugtuytoy! Ginasala ninyo ang mga sapatsapat sa inyo ilimnon, pero ginatulon ninyo ang kamelyo!

25“Makaluluoy man kamo, mga manunodlo sang Kasugoan kag mga Fariseo! Mga hipokrito! Ginatinluan ninyo ang sa gwa sang inyo baso kag sang pinggan, pero ang sulod sini puno sang mga butang nga inyo nakuha paagi sa palugos kag kahakog. 26Bulag nga Fariseo! Tinloi anay ang sulod sang baso, kag ang sa gwa magatinlo man!

27“Makaluluoy#Bin. 23:3. man kamo, mga manunodlo sang Kasugoan kag mga Fariseo! Mga hipokrito! Kaangay kamo sang mga lulobngan nga ginpintahan sing puti kag matahom tan-awon sa gwa, pero sa sulod sini puno sang mga tul-an sang mga patay kag sang tanan nga sahi sang kagarukan. 28Sa amo man nga bagay, kon tan-awon kamo sang mga tawo daw sa matarong kamo, pero sa sulod ninyo puno sang mga pagpakunokuno kag kalautan.

Si Jesus Nagtagna sang Ila Silot

(Luc. 11:47-51)

29“Makaluluoy man kamo, mga manunodlo sang Kasugoan kag mga Fariseo! Mga hipokrito! Nagahimo kamo sing matahom nga mga lulobngan para sa mga propeta kag nagapuni sang mga pantyon sang mga matarong, 30kag nagasiling kamo, ‘Kon kita nagkabuhi sa mga adlaw sang aton mga katigulangan, wala kuntani kita maghimo sang ila ginhimo kag magpatay sang mga propeta.’ 31Kon amo ginaako ninyo nga kamo mga kaliwat sang mga nagpamatay sang mga propeta! 32Hala, padayuna ninyo kag tapusa ang ginsugoran sang inyo mga katigulangan! 33Mga#Mat. 3:7; 12:34; Luc. 3:7. man-og kag mga kaliwat sang mga man-og! Paano bala ang paglikaw ninyo sang silot sa impierno? 34Gani nagasiling ako sa inyo: magapadala ako sa inyo sing mga propeta kag mga maalam nga mga tawo, kag mga manunodlo. Ang iban sa ila inyo pamatyon, ang iban ilansang ninyo sa krus, kag ang iban bunalon ninyo sa inyo mga sinagoga, kag lagson ninyo sila halin sa isa ka banwa pakadto sa isa. 35Tungod#Gen. 4:8; 2 Cron. 24:20-21. sini, magaabot sa inyo ang silot sang nagapamatay sang mga matarong, halin sa pagpatay kay Abel nga matarong tubtob sa pagpatay kay Zacarias nga anak ni Baraquias, nga inyo ginpatay sa gintung-an sang Templo kag sang altar. 36Matuod gid nagasiling ako sa inyo: ang silot tungod sini tanan nga mga pagpamatay magaabot sa mga tawo sa sini nga mga inadlaw!

Ang Gugma ni Jesus para sa Jerusalem

(Luc. 13:34-35)

37“O Jerusalem, Jerusalem! Ikaw nga nagapamatay sang mga propeta kag nagapangbato sang mga ginpadala sang Dios sa imo! Makapila kuntani nga luyag ko tipunon ang imo mga tawo kaangay sang isa ka munga nga nagatipon sang iya mga piso sa idalom sang iya mga pakpak, pero indi ka luyag! 38Gani#Jer. 22:5. ang imo templo pagapatumbayaan kag pagagub-on. 39Nagasiling#Sal. 118:26. ako sa imo, halin karon indi na nimo ako makita liwat tubtob nga magsiling ka, ‘Ang Dios ang magbendisyon sa iya nga nagaabot sa ngalan sang Ginoo.’”

Currently Selected:

Mateo 23: MBBHIL12

Highlight

Copy