Lucas 7
7
Gin-ayo ni Jesus ang Suloguon sang Kapitan nga Romanhon
(Mat. 8:5-13)
1Sa tapos ni Jesus mahambal ini tanan nga mga butang sa mga tawo, nagkadto sia sa Capernaum. 2Ang kapitan nga Romanhon didto may isa ka suloguon nga palangga gid niya. Ini nga suloguon nagamasakit kag tagumatayon. 3Sang pagkabati sang kapitan nahanungod kay Jesus, ginpadala niya ang pila ka mga katigulangan sang mga Judio sa pagpangabay kay Jesus nga magkari kag ayuhon ang iya suloguon. 4Nagkadto sila kay Jesus kag nagpakitluoy gid sa iya: “Ini nga kapitan takos gid sang imo bulig. 5Kay nagahigugma sia sang aton mga katawhan kag sia gid ang nagpatindog sang amon sinagoga.”
6Gani si Jesus nag-upod sa ila. Sang malapit na si Jesus sa balay, ginpadala sang kapitan ang iya mga abyan nga silingon si Jesus, “Ginoo, indi ka na magpagamo! Indi ako takos nga magkadto ka sa akon balay, 7kag indi man ako takos magpalapit sa imo. Pero magsiling ka lang, ‘Magaayo sia!’ kag magaayo ang akon suloguon. 8Kay ako man tawo nga yara sa idalom sang awtoridad sang mataas nga mga opisyales, kag may mga soldado man ako nga yara sa idalom sang akon awtoridad. Ginasugo ko ining isa, ‘Lakat!’ kag nagalakat sia. Ginasugo ko inang isa, ‘Palapit!’ kag nagapalapit sia. Kag ginasugo ko ang akon suloguon, ‘Himua ini!’ kag ginahimo niya ini.”
9Natingala si Jesus sang pagkabati niya sini. Nagliso sia kag nagsiling sa mga tawo nga nagasunod sa iya, “Nagasiling ako sa inyo, wala ako makakita sing pagtuo kasubong sini, bisan sa Israel.”
10Sang magbalik sa balay sang kapitan ang mga ginsugo, nakita nila nga maayo na ang suloguon.
Ginbanhaw ni Jesus ang Anak sang Balo
11Sa tapos sini,#7:11 Sa tapos sini: Ang iban nga mga manuskrito maySang masunod nga adlaw. si Jesus nagkadto sa banwa nga ginatawag Nain. Nag-upod sa iya ang iya mga gintuton-an kag ang madamo nga mga tawo. 12Sang nagahinampot sia sa pwerta sang banwa, may patay nga ginayayungan pa gwa kag madamo nga mga tawo halin sa banwa ang nagakompanyar. Ang patay nga tawo amo ang bugtong nga anak sang isa ka iloy nga balo. 13Sang pagkakita sang Ginoo sa balo naluoy gid sia kag nagsiling sa iya, “Indi ka maghibi.” 14Dayon nagpalapit sia sa lungon kag gintandog niya ini. Ang mga nagayayong nagdulog. Si Jesus nagsiling, “Noy, nagasiling ako sa imo, bangon ka!” 15Ang napatay nga tawo nagpungko kag naghambal, kag gintugyan sia ni Jesus sa iya iloy.
16Ang tanan hinadlukan gid kag nagdayaw sila sa Dios nga nagasiling, “Ang isa ka gamhanan nga propeta nagpakita sa tunga naton, kag ang Dios nag-abot sa pagluwas sang iya mga tawo.”
17Ining balita nahanungod kay Jesus naglapnag sa bug-os nga Judea kag sa palibot nga kadutaan.
Ang mga Mensahero ni Juan nga Manugbautiso
(Mat. 11:2-19)
18Ginsugiran si Juan sang iya mga gintuton-an nahanungod sini tanan nga mga butang. Gintawag niya ang duha sang iya mga gintuton-an 19kag ginpakadto sa Ginoo sa pagpamangkot sa iya, “Ikaw bala ang ginsiling ni Juan nga magaabot ukon magapaabot pa kami sing isa?”
20Sang pagkadto nila kay Jesus nagsiling sila, “Ginpadala kami ni Juan nga manugbautiso sa pagpamangkot sa imo, ‘Ikaw bala ang ginsiling niya nga magaabot, ukon magapaabot pa kami sing isa?’”
21Sa sadto gid nga tion ginpang-ayo ni Jesus ang madamo nga mga tawo nga may mga masakit, mga balatian kag may malaut nga mga espiritu, kag gin-ayo man niya ang madamo nga mga bulag. 22Nagsabat#Isa. 35:5-6; Isa. 61:1. sia sa mga ginpadala ni Juan, “Balik kamo kag sugiri si Juan sang inyo nakita kag nabatian: ang mga bulag makakita na, ang mga piang makalakat na, ang mga aruon nag-alayo na, ang mga bungol makabati na, ang mga patay ginbanhaw, kag ang Maayong Balita ginawali sa mga imol. 23Daw ano ka malipayon ang wala nagapangduhaduha sa akon!”
24Sang makahalin na ang mga ginsugo ni Juan, naghambal si Jesus sa mga tawo nahanungod kay Juan: “Ano ang ginpaabot ninyo nga makita sang pagkadto ninyo kay Juan didto sa desierto? Tigbaw bala nga ginahapayhapay sang hangin? 25Ano bala ang ginkadto ninyo nga tan-awon? Isa bala ka tawo nga nagabayo sing malahalon? Ang mga tawo nga nagabayo sang malahalon kag ang nagaginawi sing minanggaranon makita sa mga palasyo. 26Sugiri ninyo ako, ano gid bala ang inyo ginkadto nga tan-awon? Isa bala ka propeta? Huo, nagasiling ako sa inyo, kag labaw pa sa isa ka propeta ang inyo nakita. 27Kay#Mal. 3:1. si Juan amo ang ginatumod sang kasulatan: ‘Ang Dios nagsiling, ipadala ko ang akon manugbalita nga magauna sa imo kag magaaman sang imo alagyan.’ 28Nagasiling ako sa inyo, sa mga nagkalatawo wala sing may maglabaw pa kay Juan. Pero ang labing kubos nga nagapasakop sa paghari sang Dios mas daku pa sang sa iya.”
29Ang#Mat. 21:32; Luc. 3:12. tanan nga mga tawo kag ang mga manugsukot sang buhis nakabati sa iya. Sila amo ang nagtuman sang pagkamatarong nga ginapangayo sang Dios kag ginbautisohan sila ni Juan. 30Pero ang mga Fariseo kag ang mga manunodlo sang Kasugoan nagsikway sang tinutuyo sang Dios para sa ila kag wala sila magpabautiso kay Juan.
31“Si Jesus nagpadayon sa pagsiling, ‘Sa ano ko bala ipaanggid ang mga tawo sini nga mga inadlaw? Kaangay bala sila sang ano? 32Kaangay sila sang mga kabataan nga nagpungko sa tiendahan kag nagasinggitanay, ‘Nagtukar kami sa inyo sing plawta, pero wala kamo magsaot. Naghaya kami, pero wala kamo maghibi.’ 33Nag-abot si Juan nga manugbautiso kag nagpuasa kag wala mag-inom sing bino, kag kamo nagsiling, ‘Ginagamhan sia sang demonyo.’ 34Ang Anak sang Tawo nag-abot, kag nagkaon kag nag-inom, kag kamo nagsiling, ‘Tan-awa ninyo ini nga tawo! Palakaon sia kag palahubog, abyan sang mga manugsukot sang buhis kag sang iban nga mga makasasala!’ 35Pero ang kaalam sang Dios ginapamatud-an nga matuod sang tanan nga nagabaton sini.”
Si Jesus sa Balay ni Simon nga Fariseo
36Si Jesus gin-agda sang isa ka Fariseo nga magkaon upod sa iya. Nagkadto si Jesus sa balay sining Fariseo kag nagpungko sia sa pagkaon didto. 37May#Mat. 26:7; Mar. 14:3; Juan 12:3. isa ka makasasala nga babayi nga nagaestar sa amo nga banwa. Sang pagkahibalo niya nga si Jesus nagakaon sa balay sang Fariseo, nagdala sia sang tibodtibod nga puno sang agwa. 38Nagtindog sia sa likod nayon ni Jesus malapit sa iya tiil nga nagahibi, kag ginbasa niya ang mga tiil ni Jesus sang iya mga luha. Dayon ginpahiran niya ang mga tiil ni Jesus sang iya buhok, iya ginhalukan, kag ginbuboan ini sang agwa. 39Sang pagkakita sini sang Fariseo nga nag-agda kay Jesus nagsiling sia sa iya kaugalingon, “Kon matuod nga ining tawo propeta, kuntani nahibal-an niya kon sin-o kag ano ka makasasala sang kabuhi sini nga babayi nga nagatandog sa iya.”
40Si Jesus naghambal kag nagsiling sa iya, “Simon, may isugid ako sa imo.”
Si Simon nagsabat, “Huo, Manunodlo, sugiri ako.”
41Si Jesus nagsiling, “May isa ka manugpautang nga may duha ka tawo nga ginpautang. Ang isa nakautang sa iya sing 5,000 kag ang isa 500. 42Sila nga duha indi gid makabayad, gani, wala na lang sila ginpabayad sang nagpautang sa ila. Diin sa ila nga duha ang magahigugma sing labi sa nagpautang sa ila?”
43Si Simon nagsabat, “Sa banta ko ang nakautang sing daku kag wala na pagpabayara.”
Si Jesus nagsiling, “Husto ang sabat mo.” 44Dayon nagliso sia sa babayi samtang nagapadayon sa pagsiling kay Simon, “Nakita mo ining babayi? Nagsulod ako sa imo balay kag wala ka maghatag sa akon sing tubig para sa akon mga tiil, pero sia nagbasa sang akon mga tiil sang iya mga luha kag ginpahiran niya ini sang iya buhok. 45Wala ka maghalok sa pag-abiabi sa akon, pero sia halin sang akon pag-abot, wala mag-untat sa paghalok sang akon mga tiil. 46Wala mo paghaplasi sing lana nga olivo ang akon ulo, pero sia naghaplas sang akon mga tiil sang agwa. 47Gani nagasiling ako sa imo, ang iya daku nga gugma nagapamatuod nga ang iya madamo nga mga sala napatawad na. Ang bisan sin-o nga ginpatawad sing diutay nagahigugma sing diutay.”
48Dayon si Jesus nagsiling sa babayi, “Ang imo mga sala ginpatawad.”
49Ang iban nga upod niya sa kalan-an nagsiling sa ila kaugalingon, “Sin-o bala ini nga tawo nga nagapatawad bisan pa sang mga sala?”
50Pero si Jesus nagsiling sa babayi, “Ang imo pagtuo nagluwas sa imo. Maglakat ka sa paghidait.”
Currently Selected:
Lucas 7: MBBHIL12
Highlight
Share
Copy
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
