Lucas 22
22
Ang Plano batok kay Jesus
(Mat. 26:1-5; Mar. 14:1-2; Juan 11:45-53)
1Karon#Exo. 12:1-27. nagahilapit na ang Piesta sang Tinapay nga Wala sing Lebadora nga ginatawag Pascua. 2Ang pangulo nga mga pari kag ang mga manunodlo sang Kasugoan nagpadihot kon ano ang pagpatay kay Jesus sa tago, kay nahadlok sila sa mga tawo.
Si Judas Nagsugot sa Pagtugyan kay Jesus
(Mat. 26:14-16; Mar. 14:10-11)
3Dayon si Judas nga ginatawag Iscariote nga isa sang dose ka mga apostoles, ginsudlan ni Satanas. 4Gani, si Judas naglakat kag naghinun-anon sa pangulo nga mga pari kag sa mga opisyales sang gwardya sa Templo kon sa ano nga paagi matugyan niya si Jesus sa ila. 5Nalipay sila kag nagtanyag sa pagbayad sa iya sing kwarta. 6Nagsugot si Judas kag nagpangita sia sing kahigayunan nga matugyan niya si Jesus sa ila nga indi makahibalo ang mga tawo.
Si Jesus Nagsugo sa Pag-aman sang Panihapon sang Pascua
(Mat. 26:17-25; Mar. 14:12-21; Juan 13:21-30)
7Nag-abot ang adlaw sang Piesta sang Tinapay nga Wala sing Lebadora, nga ang mga kordero para sa panihapon sang Pascua dapat na nga ihawon. 8Gani ginpadala ni Jesus si Pedro kag si Juan kag ginsingganan: “Lakat kamo kag ihanda ninyo ang panihapon sang Pascua nga aton pagakan-on.”
9Nagpamangkot sila sa iya, “Sa diin bala ang luyag mo nga maghanda kami sini?”
10Nagsabat sia sa iya, “Pamatii ninyo ini! Sa inyo pagsulod sa banwa, may isa ka tawo nga magasugata sa inyo nga nagadala sing isa ka tibod nga tubig. Sunda ninyo sia tubtob sa balay nga sudlan niya, 11kag magsiling kamo sa tagbalay: ‘Ang Manunodlo nagasiling sa imo, Diin bala ang kwarto nga pagakaunan ko sang panihapon sang Pascua upod sa akon mga gintuton-an?’ 12Ipakita niya sa inyo ang isa ka daku kag nasangkapan nga kwarto sa ibabaw. Didto ninyo ihanda ang tanan.”
13Naglakat sila kag ila nakita ang tanan suno sa ginsiling ni Jesus sa ila, kag ginhanda nila ang panihapon sang Pascua.
Ang Panihapon sang Ginoo
(Mat. 26:26-30; Mar. 14:22-26; 1 Cor. 11:23-25)
14Sang pag-abot sang takna, nagpungko si Jesus sa pagkaon upod sa iya mga apostoles. 15Nagsiling sia sa ila, “Daku gid ang akon handom sa pagkaon sini nga panihapon sang Pascua upod sa inyo sa wala pa ako mag-antos! 16Kay nagasiling ako sa inyo, indi na ako magkaon sini tubtob nga matuman ini sa Ginharian sang Dios.”
17Dayon si Jesus nagkuha sang kupa, nagpasalamat sia sa Dios kag nagsiling, “Kuhaa ninyo ini kag bahinbahinon sa inyo kaugalingon. 18Kay nagasiling ako sa inyo, nga sugod karon indi na ako mag-inom sini nga bino tubtob mag-abot ang Ginharian sang Dios.”
19Dayon ginkuha niya ang tinapay, nagpasalamat sia sa Dios, iya ginpamihakpihak ini, kag ginhatag sa ila nga nagasiling, “Ini amo ang akon lawas nga ginahatag para sa inyo. Himua ninyo ini sa handumanan nakon.” 20Sa#Jer. 31:31-34. amo man nga bagay sa tapos ang panihapon ginhatag niya sa ila ang kupa. Nagsiling sia, “Ini nga kupa amo ang bag-o nga kasugtanan sang Dios nga ginaselyohan sang akon dugo nga ginaula para sa inyo.#22:20 Ang iban nga mga manuskrito wala sang mga pulong ni Jesus sa tapos sangIni amo ang akon lawas sa bersikulo 19, kag sang bersikulo 20.
21“Pero,#Sal. 41:9. tan-awa ninyo! Ang magatugyan sa akon yari kaupod nakon sa lamisa! 22Kay ang Anak sang Tawo mapatay suno sa gintalana sang Dios, pero daw ano ka makaluluoy yadtong tawo nga magatugyan sa iya!”
23Dayon nagpinamangkutanay sila kon sin-o ayhan sa ila ang magahimo sini.
Ang Pagbinais kon Sin-o ang Labing Daku
24Ang#Mat. 18:1; Mar. 9:34; Luc. 9:46. mga gintuton-an nagbinais kon sin-o sa ila ang ginakilala nga labing daku. 25Si#Mat. 20:25-27; Mar. 10:42-44. Jesus nagsiling sa ila, “Ang mga hari sang mga Hentil nagagahom sa ila mga ginsakpan kag ang mga manugdumala sa ila ginatawag nga ‘Mga Abyan sang mga Tawo.’ 26Pero#Mat. 23:11; Mar. 9:35. indi amo ini ang nagakabagay sa inyo; kundi ang labing daku sa inyo dapat manginsubong sang kamanghuran, kag ang pangulo dapat manginsubong sang suloguon. 27Sin-o#Juan 13:12-15. bala ang mas daku, ang nagakaon ukon ang nagasirbe? Ang nagakaon, e. Pero ako kaupod ninyo subong nga manug-alagad.
28“Gin-unongan ninyo ako sa tanan nga mga pagtilaw sa akon, 29kag subong nga ang akon Amay naghatag sa akon sang gahom sa pagdumala, ako man magahatag sa inyo sing gahom sa pagdumala. 30Magakaon#Mat. 19:28. kag magainom kamo sa lamisa sa akon Ginharian kag magapungko kamo sa mga trono sa paghukom sa dose ka mga tribo sang Israel.
Gintagna ni Jesus ang Pagpanghiwala ni Pedro
(Mat. 26:31-35; Mar. 14:27-31; Juan 13:36-38)
31“Simon, Simon, pamati ka! Si Satanas ginpahanugotan sa pagtilaw sa inyo tanan, subong sang pag-ayag sang mangungoma sang trigo sa pagpain sang tinggas sa upa. 32Pero nagpangamuyo ako para sa imo, Simon, nga ang imo pagtuo indi mapukan. Kag sa pagbalik mo sa akon, dapat mo pabakuron ang imo mga kautoran.”
33Si Pedro nagsabat, “Ginoo, handa ako magpabilanggo kag mapatay upod sa imo.”
34Si Jesus nagsabat, “Nagasiling ako sa imo, Pedro, sa wala pa makapamalo ang manok karon nga gab-i, magasiling ka sing makatlo nga wala ka makakilala sa akon.”
Kahita, Bag, kag Espada
35Dayon#Mat. 10:9-10; Mar. 6:8-9; Luc. 9:3; 10:4. nagpamangkot si Jesus sa iya mga gintuton-an, “Sang ginpadala ko kamo anay nga wala sing kahita, bag ukon sandalyas, nakulangan bala kamo sang bisan ano nga butang?”
Nagsabat sila, “Wala gid.”
36Si Jesus nagsiling sa ila, “Pero karon, ang bisan sin-o nga may kahita ukon bag kinahanglan magdala sini, kag ang bisan sin-o nga wala sing espada dapat magbaligya sang iya kunop kag magbakal sing espada. 37Kay#Isa. 53:12. nagasiling ako sa inyo nga ang kasulatan nga nagasiling, ‘Ginkabig sia nga isa sang mga kriminal,’ dapat matuman sa akon, tungod kay ang nasulat nahanungod sa akon nagakatuman.”
38Ang mga gintuton-an nagsiling, “Ginoo, tan-awa, yari may duha ka espada!”
Nagsabat sia, “Tuman na ina!”
Si Jesus Nagpangamuyo sa Bukid sang mga Olivo
(Mat. 26:36-46; Mar. 14:32-42)
39Subong sang masami nga ginahimo niya, si Jesus nagwa sa siudad kag nagkadto sa Bukid sang mga Olivo, kag ang mga gintuton-an nag-upod sa iya. 40Sang pag-abot niya didto nagsiling sia sa ila, “Pangamuyo kamo agod indi kamo mahulog sa pagsulay.”
41Dayon nagpalayo sia sa ila sa antad nga sarang malambot kon habuyan sing bato, kag nagluhod sia kag nagpangamuyo. 42Nagsiling sia, “O amay, kon buot mo, ilikaw ining kupa sa akon. Pero indi ang akon kabubot-on, kundi ang imo kabubot-on ang tumanon.” 43May isa ka anghel gikan sa langit nga nagpakita sa iya kag nagpabakod sa iya. 44Sa daku nga kalisod nagpangamuyo sia sing hugot pa gid. Ang iya balhas daw kasubong ka dalagku nga mga tinulo sang dugo nga nagatupa sa duta.#22:44 Ang iban nga mga manuskrito wala sang mga bersikulo 43-44.
45Sa tapos si Jesus makapangamuyo nagbalik sia sa mga gintuton-an kag nakita niya nga nagakatulog sila tungod kay linapyo sila sa kasubo. 46Nagsiling sia sa ila, “Ngaa nagakatulog kamo? Bangon kamo kag magpangamuyo agod indi kamo mahulog sa pagsulay.”
Ang Pagdakop kay Jesus
(Mat. 26:47-56; Mar. 14:43-50; Juan 18:3-11)
47Sang nagahambal pa si Jesus nag-abot ang mga tawo nga ginaunahan ni Judas, ang isa sang dose ka mga apostoles. Ginpalapitan niya si Jesus kag ginhalukan. 48Pero si Jesus nagsiling, “Judas, ginaluiban mo bala ang Anak sang Tawo paagi sa isa ka halok?”
49Sang makita sang mga gintuton-an nga upod ni Jesus kon ano ang mahanabo nagsiling sila, “Panglabuon bala namon sila, Ginoo?” 50Kag ginlabo sang isa sa ila ang suloguon sang Pinakamataas nga Pari kag nautas ang iya tuo nga dulonggan.
51Pero si Jesus nagsiling, “Husto na ina!” Gintandog niya ang dulonggan sang tawo kag gin-ayo sia.
52Dayon si Jesus nagsiling sa pangulo nga mga pari kag sa mga opisyales sang mga gwardya sa Templo kag sa mga katigulangan sang mga Judio nga nagkadto didto sa pagdakop sa iya, “Ano ako buyong nga nag-abot kamo nga may mga espada kag mga inuglampos? 53Adlaw-adlaw#Luc. 19:47; 21:37. yara ako kaupod ninyo sa Templo kag wala ninyo ako pagdakpa. Ugaling ini nga takna inyo kag iya sang nagagahom sang kadudulman.”
Ginpanghiwala ni Pedro si Jesus
(Mat. 26:57-58, 69-75; Mar. 14:53-54, 66-72; Juan 18:12-18, 25-27)
54Gindakop nila si Jesus kag gindala sa balay sang Pinakamataas nga Pari. Si Pedro nagsunod, pero malayo ang antad niya. 55Nagdabok sila sa tunga sang hardin kag si Pedro nag-impon sa mga nagapulongko palibot sa dabok. 56Sang pagkakita sang isa sang mga suloguon nga babayi sa iya nga nagapungko didto malapit sa kalayo, ginhimutaran niya sia kag nagsiling, “Ini man nga tawo kaupod ni Jesus!”
57Pero si Pedro nagpanghiwala sini nga nagasiling, “Inday, wala gani ako makakilala sa iya!”
58Sa wala madugay natalupangdan sia sang isa ka tawo, kag nagsiling, “Ikaw man isa sa ila!”
Pero si Pedro nagsabat, “Tyoy, indi ako upod niya!”
59Kag sang makaligad ang isa ka oras, may isa naman ka tawo nga nag-insister gid sa pagsiling, “Wala gid sing duhaduha nga ining tawo kaupod ni Jesus tungod kay sia taga-Galilea man!”
60Pero si Pedro nagsabat, “Tyoy, wala ako makahibalo sang imo ginapanghambal!”
Kag sa gilayon, sang nagahambal pa sia, nagpamalo ang manok. 61Ang Ginoo nagliso kag gintulok niya si Pedro, kag nadumdoman ni Pedro ang mga pulong sang Ginoo nga ginsiling sa iya, “Sa wala pa magpamalo ang manok karon nga gab-i, magasiling ka sing makatlo nga wala mo ako makilala.” 62Si Pedro naggwa kag naghilibion sing tudo.
Si Jesus Ginyaguta kag Ginhanot
(Mat. 26:67-68; Mar. 14:65)
63Ang mga tawo nga nagabantay kay Jesus nagyaguta kag nagbunal sa iya. 64Gintabunan nila ang iya mga mata kag ginpamangkot sia, “Pakta, sin-o ang nagsumbag sa imo?” 65Kag madamo pa nga mga pagpasipala ang ginhambal nila kay Jesus.
Si Jesus sa Atubangan sang Konseho
(Mat. 26:59-66; Mar. 14:55-64; Juan 18:19-24)
66Sang pagkaaga, ang mga katigulangan sang mga Judio, ang pangulo nga mga pari, kag ang mga manunodlo sang Kasugoan nagtipon sing tingob, kag gindala nila si Jesus sa atubangan sang Konseho. 67Nagsiling sila, “Sugiri kami kon ikaw bala ang Cristo?”
Nagsabat sia, “Kon sugiran ko kamo, indi kamo magpati sa akon, 68kag kon pamangkuton ko kamo, indi man kamo magsabat. 69Pero sugod karon ang Anak sang Tawo magapungko sa tuo sang Dios nga Makagagahom.”
70Nagsiling sila tanan, “Kon amo, ikaw bala ang Anak sang Dios?”
Nagsabat sia sa ila, “Ginasiling ninyo nga amo ako.”
71Kag nagsiling sila, “Wala na kita nagakinahanglan sang mga saksi! Nakabati gid kita sang iya ginpanghambal!”
Currently Selected:
Lucas 22: MBBHIL12
Highlight
Share
Copy
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
