Lucas 21

Ang Dulot sang Babayi nga Balo

(Mar. 12:41-44)

1Si Jesus nagpanan-awtan-aw kag nakita niya ang manggaranon nga mga tawo nga nagahulog sang ila mga dulot sa kolektahan sang Templo. 2Nakita man niya didto ang isa ka imol nga babayi nga balo nga nagahulog sang duha ka sentimos. 3Si Jesus nagsiling, “Nagasiling ako sa inyo nga ining imol nga babayi nga balo nagahatag sing labaw pa sang sa ila tanan ginhulog. 4Kay ang iban naghatag sang ila mga dulot gikan sa sobra sang ila mga manggad, pero ini nga balo sa iya kaimulon naghulog sang tanan niya nga palangabuhian.”

Si Jesus Naghambal Nahanungod sang Pagkaguba sang Templo

(Mat. 24:1-2; Mar. 13:1-2)

5May mga tawo nga naghambal nahanungod sang Templo kon paano napunihan ini sang matahom nga mga bato kag sang mga dulot nga nahalad sa Dios. Si Jesus nagsiling, 6“Nahanungod sining mga butang nga nakita ninyo, magaabot ang tion nga wala sing mabilin diri nga isa ka bato nga nasampaw sa isa. Ang tanan pagagub-on.”

Mga Kagamo kag mga Paghingabot

(Mat. 24:3-14; Mar. 13:3-13)

7Nagpamangkot sila, “Manunodlo, san-o bala mahanabo ini? Kag ano bala ang tanda nga madali na lang ini mahanabo?”

8Si Jesus nagsiling, “Magbantay kamo agod indi kamo pagpatalangon. Kay madamo nga mga tawo ang magaabot sa akon ngalan nga magasiling, ‘Ako amo sia!’ kag, ‘Ang tion nag-abot na!’ Pero indi kamo magsunod sa ila. 9Indi kamo magkahadlok kon makabati kamo nga may mga inaway kag mga kinagubot. Ini nga mga butang matabo anay, pero ini wala nagakahulogan nga ang katapusan malapit na.”

10Kag nagsiling pa gid sia sa ila, “Ang isa ka pungsod magapakig-away sa isa ka pungsod, ang isa ka ginharian magasalakay sang isa ka ginharian. 11May magaabot nga mabaskog nga mga linog, mga gutom, kag mga peste sa nagakalainlain nga mga lugar. May makakulogmat nga mga butang kag dalagku nga mga tanda halin sa langit. 12Pero sa wala pa ini tanan nga mga butang mahanabo, dakpon nila kamo kag hingabuton. Igatugyan kamo sa mga sinagoga agod hukman kag pagabilangguon. Pagadalhon kamo sa atubang sang mga hari kag mga gobernador tungod sa akon ngalan. 13Ini manginkahigayunan ninyo sa pagpanugid sang Maayong Balita. 14Gani#Luc. 12:11-12. magpamat-od kamo sa wala pa mag-abot ang tion nga indi kamo magpalibog kon paano ang inyo pagsabat, 15tungod kay ako magahatag sa inyo sang mga pulong kag kaalam agod nga wala sang inyo mga kaaway ang sarang makalalis ukon makapamatok sang inyo ginasiling. 16Bisan ang inyo mga ginikanan, mga kautoran, mga pariente kag mga abyan magatugyan sa inyo kag ang iban sa inyo ipapatay nila. 17Ang tanan magadumot sa inyo bangod sa akon. 18Pero wala sing bisan isa ka bilog nga buhok sa inyo ulo nga madula. 19Magpakalig-on kamo, kag maluwas ninyo ang inyo kaugalingon.”

Si Jesus Naghambal sang Kalaglagan sang Jerusalem

(Mat. 24:15-21; Mar. 13:14-19)

20“Kon makita ninyo ang Jerusalem nga ginalibutan sang mga hangaway, ti, mahibal-an ninyo nga sa indi madugay pagalaglagon ini. 21Dayon ang mga yara sa Judea dapat magpalagyo sa mga kabukiran kag ang mga yara sa sulod sang siudad maggwa, kag ang mga yara sa kaumhan indi magsulod sa siudad. 22Kay#Os. 9:7. amo ini ang ‘Mga Adlaw sang Pagsilot,’ sa pagtuman sang tanan nga ginasiling sang mga Kasulatan. 23Daw ano ka makaluluoy ang mga babayi nga nagabulusong kag ang mga iloy nga may mga lapsag sa sadtong mga adlaw! Ang daku nga kalalat-an magaabot sa sini nga duta, kag ang silot sang Dios magaabot sa sini nga mga tawo. 24Ang iban sa ila pamatyon paagi sa espada, ang iban pagabihagon sa tanan nga mga kapungsoran, kag ang Jerusalem pagatapakon sang mga Hentil tubtob matapos ang ila panag-on.

Ang Pag-abot sang Anak sang Tawo

(Mat. 24:29-31; Mar. 13:24-27)

25“May#Isa. 13:10; Ezeq. 32:7; Joel 2:31; Bug. 6:12-13. mga tanda nga makita sa adlaw, sa bulan kag sa mga bituon. Ang tanan nga mga pungsod sa duta magakasakit kag magakatublag bangod sang dinaguhob sang mga balod sa dagat. 26Ang mga tawo magakalalipong sa kahadlok samtang nagahulat sila sang magaabot sa bug-os nga duta. Kay ang mga gahom sa kahawaan pagapatalangon sa ila kinaandan nga alagyan. 27Dayon#Dan. 7:13; Bug. 1:7. ang Anak sang Tawo magapakita, nga nagaabot nga yara sa panganod, nga may daku nga gahom kag kadungganan. 28Kon ini nga mga butang mahanabo, magtindog kamo kag magpakaisog tungod kay ang inyo kaluwasan malapit na.”

Ang Leksyon gikan sa Kahoy nga Higera

(Mat. 24:32-35; Mar. 13:28-31)

29Dayon si Jesus nagsugid sa ila sining palaanggiran, “Dumdoma ninyo ang kahoy nga higera kag ang tanan nga mga kahoy. 30Kon makita ninyo nga nagapanglumbay na sila, inyo nahibaluan nga ang tingadlaw malapit na. 31Subong man, kon makita ninyo nga nagakahanabo ini nga mga butang, mahibaluan ninyo nga malapit na ang paghari sang Dios.

32“Dumdoma ninyo ini! Ini tanan nga mga butang mahanabo sa wala pa mapatay ang tanan nga mga tawo nga nagakabuhi subong. 33Ang langit kag ang duta magataliwan, pero ang akon mga pulong indi magtaliwan.

Ang Pagbantay Kinahanglanon

34“Maghalong kamo sa inyo mga kaugalingon nga indi magamon sa pagpatuyang, pagpahuboghubog kag pagpalibog sang sini nga kabuhi, basi yadtong Adlaw mag-abot sa inyo sing hinali 35kasubong sang siod. Kay magaabot ini sa tanan nga mga tawo sa bug-os nga duta. 36Magbantay kag magpangamuyo kamo pirme agod nga may kusog kamo sa pagpalagyo sa sini nga mga butang nga mahanabo, kag makatindog kamo sa atubang sang Anak sang Tawo.”

37Adlaw-adlaw#Luc. 19:47. si Jesus nagpanudlo sa Templo, kag kon gab-i nagagwa sia kag didto sia nagatener sa Bukid sang mga Olivo. 38Aga pa gid, ang tanan nga mga tawo nagakadto sa Templo sa pagpamati sa iya.

Currently Selected:

Lucas 21: MBBHIL12

Highlight

Copy