Lucas 20

Ang Pamangkot Nahanungod sa Awtoridad ni Jesus

(Mat. 21:23-27; Mar. 11:27-33)

1Isa ka adlaw, si Jesus didto sa Templo nga nagapanudlo kag nagawali sa mga tawo sang Maayong Balita. Nagpalapit sa iya ang pangulo nga mga pari, ang mga manunodlo sang Kasugoan kag ang mga katigulangan sang mga Judio 2kag nagsiling sa iya, “Sugiri kami kon ano ang imo awtoridad sa paghimo sining mga butang? Sin-o ang naghatag sa imo sini nga awtoridad?”

3Si Jesus nagsabat sa ila, “Karon ako man magapamangkot sa inyo. Sugiri ninyo ako, 4ang pagbautiso ni Juan halin bala sa Dios ukon sa tawo?”

5Silahanon man lang ang nagbinais nga nagasiling, “Ano ang isiling ta? Kon magsiling kita, ‘Halin sa Dios,’ magasiling sia, ‘Ti, ngaa wala kamo magtuo kay Juan?’ 6Pero kon magsiling kita, ‘Halin sa tawo,’ batuhon kita sini nga mga tawo, tungod kay nagapati gid sila nga si Juan isa ka propeta.” 7Gani nagsabat sila, “Wala kami makahibalo kon diin ini naghalin.”

8Si Jesus nagsiling sa ila, “Ti, indi man ako magsugid sa inyo kon sa ano nga awtoridad ginahimo ko ini nga mga butang.”

Ang Palaanggiran Nahanungod sa mga Agsador sa Talamnan sang Ubas

(Mat. 21:33-46; Mar. 12:1-12)

9Dayon#Isa. 5:1. si Jesus nagsugid sa mga tawo sini nga palaanggiran: “May isa ka tawo nga nagtanom sing ubas sa iya uma kag ginpaagsahan niya ini sa mga agsador. Dayon nagpanglakaton sia sa iban nga lugar sing madugay nga tion. 10Sang tion na nga inugpamupo sang mga ubas, ginpadala niya ang isa ka suloguon sa mga agsador sa pagkuha sang iya parti sang patubas. Pero ang mga agsador nagbunal sang suloguon kag ginpabalik nila sia nga wala sing dala. 11Gani nagpadala na man sia sing isa pa ka suloguon, pero ginbunal man sia sang mga agsador, ginpakahuy-an kag ginpabalik nga wala man sing dala. 12Dayon nagpadala pa gid sia sang ikatlo nga suloguon. Ginkastigo man nila sia kag ginhaboy sa gwa. 13Karon ang tag-iya sang talamnan sang ubas nagsiling, ‘Ano ang himuon ko? Ipadala ko ang akon pinalangga nga anak. Ayhan tahuron nila sia!’ 14Pero sang pagkakita sang mga agsador sang anak nagsinilingay sila, ‘Amo ini ang manunubli. Dali patyon ta sia kag ang panublion mangin-aton!’ 15Gani ginhaboy nila sia sa gwa sang ulobasan kag ginpatay.”

Si Jesus nagpamangkot, “Karon ano bala ang himuon sang tag-iya sang ulobasan sa iya mga agsador? 16Kadtuan niya kag pamatyon yadtong mga agsador kag ipaagsa ang ulobasan sa iban nga mga agsador.”

Sang pagkabati sini sang mga tawo nagsiling sila, “Ipahilayo ini sang Dios.”

17Si#Sal. 118:22. Jesus nagtulok sa ila kag nagpamangkot, “Ano bala ang kahulogan sining kasulatan?

‘Ang bato nga ginsikway sang mga manunokod

nanginpamakod nga bato.’

18Ang tagsatagsa nga mahulog sa sadto nga bato magkalabali kag ang bisan sin-o nga mahulogan sadto nga bato madugmok.

Ang Pamangkot Nahanungod sang Pagbayad sang Buhis

(Mat. 22:15-22; Mar. 12:13-17)

19Ang mga manunodlo sang Kasugoan kag ang pangulo nga mga pari nagtinguha sa pagdakop kay Jesus sa sadto gid nga tion, tungod kay nahibaluan nila nga ginsugid niya ining palaanggiran batok sa ila, pero nahadlok sila sa mga tawo. 20Gani ginhulat nila ang nagakaigo nga tion. May ginbayaran sila nga mga tawo sa pagpakunokuno nga sinsero sila, kag sa pagdakupdakop kay Jesus paagi sa mga pamangkot, agod nga matugyan nila sia sa gahom kag awtoridad sang Romanhon nga Gobernador. 21Ining mga espiya nagsiling kay Jesus, “Manunodlo, nahibaluan namon nga husto ang imo ginahambal kag ginatudlo. Nahibaluan namon nga wala ka sing may ginapasulabi, kundi nagatudlo ka sang kamatuoran nahanungod sang kabubot-on sang Dios para sa tawo. 22Sugiri kami, batok bala sa aton Kasugoan nga magbayad kami sing buhis sa Emperador ukon indi?”

23Ugaling nasat-uman ni Jesus ang ila kalag-it, gani nagsiling sia sa ila, 24“Abi ipakita ninyo sa akon ang isa ka sensilyo. Kay sin-o bala dagway kag ngalan ang yari diri?”

Nagsabat sila, “Iya sang Emperador.”

25Gani si Jesus nagsiling, “Kon amo ina, ihatag ninyo sa Emperador ang mga butang nga iya sang Emperador, kag sa Dios ang mga butang nga iya sang Dios.”

26Wala gid nila sia madakpi sa iya mga ginpanghambal sa atubang sang mga tawo, gani naghipos sila nga natingala sa iya nga sabat.

Ang Pamangkot Nahanungod sang Pagkabanhaw

(Mat. 22:23-33; Mar. 12:18-27)

27May#Bin. 23:8. mga Saduceo nga nagpalapit kay Jesus, sila amo ang nagasiling nga wala sing pagkabanhaw. Ginpamangkot nila sia, 28“Manunodlo,#Deut. 25:5. si Moises nagsulat sining kasugoan para sa aton: ‘Kon ang isa ka tawo mapatay nga wala sila sing bata ang iya asawa, ang utod nga lalaki sang napatay dapat magapangasawa sang nabalo agod nga sila makapamata para sa iya utod nga napatay’. 29Sadto anay may pito ka mga mag-ulotod nga lalaki. Ang magulang nagpangasawa, kag napatay nga wala sing anak. 30Dayon ang ikaduha nagpangasawa sang nabalo, 31kag amo man ang ikatlo. Amo man ang natabo sa ila tanan nga pito. Napatay sila nga wala sing ginbilin nga anak. 32Sang ulihi ang babayi napatay man. 33Sila nga pito nakapangasawa sa iya. Karon, sa adlaw sang pagkabanhaw sang mga minatay, kay sin-o bala sia asawa?”

34Si Jesus nagsabat sa ila, “Ang mga lalaki kag mga babayi sa sining panag-on nagaasawahay, 35pero ang mga lalaki kag mga babayi nga takos nga pagabanhawon kag magakabuhi sa palaabuton nga panahon wala na nagaasawahay. 36Kay kasubong sila sang mga anghel kag indi na sila mapatay. Mga anak sila sang Dios, tungod kay ginbanhaw sila gikan sa kamatayon. 37Si#Exo. 3:6. Moises nagapamatuod sing maathag nga ang mga patay pagabanhawon. Sa bahin sang kasulatan nahanungod sang nagadabdab nga kahuykahoy, nagahambal sia nahanungod sa Ginoo subong ‘Dios ni Abraham, Dios ni Isaac, kag Dios ni Jacob.’ 38Sia amo ang Dios sang mga buhi kag indi sang mga patay, kay ang tanan nagakabuhi sa iya.”

39May mga manunodlo sang Kasugoan nga nagsabat, “Manunodlo, maayo ang imo sabat!” 40Kag wala na sila magpangahas sa pagpamangkot pa sa iya.

Ang Pamangkot Nahanungod sa Cristo

(Mat. 22:41-46; Mar. 12:35-37)

41Si Jesus nagpamangkot sa ila, “Paano bala ang pagsiling sang mga tawo nga ang Cristo kaliwat ni David? 42Kay#Sal. 110:1. si David mismo nagasiling sa libro sang mga Salmo,

‘Ang Ginoo nagasiling sa akon Ginoo:

Pungko ka diri sa akon tuo,

43tubtob mabutang ko ang imo mga kaaway subong tulongtungan sang imo mga tiil.’

44Si David nagtawag sa iya nga ‘Ginoo.’ Karon paano ang pagkahimo nga kaliwat ni David ang Cristo?”

Nagpaandam si Jesus batok sa mga Manunodlo sang Kasugoan

(Mat. 23:1-36; Mar. 12:38-40)

45Samtang nagapamati ang tanan nga mga tawo kay Jesus, nagsiling sia sa iya mga gintuton-an, 46“Mag-andam kamo sa mga manunodlo sang Kasugoan, nga luyag maglagawlagaw nga nagabayo sing malaba, kag luyag gid nga tamyawon sang mga tawo nga may pagtahod sa mga tiendahan. Sa mga sinagoga ginapili nila ang pinasulabi nga mga pulongkuan kag sa mga punsyon ginapili nila ang pinasulabi nga mga lugar. 47Nagapamintaha sila sa mga balo nga babayi paagi sa pagkuha sang ila mga pagkabutang kag ila lang ginatabuntabonan ang ila ginahimo paagi sa malawig nga mga pangamuyo. Mas daku pa ang silot nga ila batunon!”

Currently Selected:

Lucas 20: MBBHIL12

Highlight

Copy