Lucas 13

Maghinulsol Kamo ukon Mapatay Kamo

1Sa sadto nga tion may mga tawo didto nga nagsugid kay Jesus nahanungod sang mga taga-Galilea nga ginpapatay ni Pilato samtang nagadulot sila sang ila mga halad sa Dios. 2Si Jesus nagsabat sa ila, “Tungod kay ini nga mga taga-Galilea ginpamatay sa sina nga paagi, nagahunahuna bala kamo nga labi pa sila ka makasasala sang sa iban nga mga taga-Galilea? 3Indi! Nagasiling ako sa inyo nga kon indi kamo mag-untat sa pagpakasala, mapatay kamo tanan pareho man sa ila. 4Ano karon yadtong mga desi otso ka mga tawo sa Siloe nga nagkalamatay sang natumbahan sila sang tore? Nagahunahuna bala kamo nga labi pa sila ka malinapason sang sa tanan nga mga tawo nga nagaestar sa Jerusalem? 5Indi! Nagasiling ako sa inyo nga kon indi kamo mag-untat sa pagpakasala, mapatay kamo tanan pareho man sa ila.”

Ang Palaanggiran Nahanungod sa Kahoy nga Higera nga Wala sing Bunga

6Dayon si Jesus nagsugid sa ila sining palaanggiran, “May isa ka tawo nga nagtanom sang kahoy nga higera sa iya ulobasan. Nagkadto sia sa pagpangita sing bunga sa sina nga higera, pero wala gid sia sing may nakita. 7Gani nagsiling sia sa iya manugtatap, ‘Tan-awa bala, tatlo na ka tuig ang pagbalikbalik ko diri sa pagpangita sing bunga sa sini nga kahoy nga higera, pero wala gid ako sing may nakita. Tapsa na lang ini! Ngaa magpadayon ini sa pagpalamgod sang duta?’ 8Pero ang manugtatap nagsabat, ‘Sir, pabay-i lang ini anay sa sini nga tuig. Kutkotan ko ang palibot sini kag abunohan. 9Kon ini nga kahoy magpamunga sa madason nga tuig, ti, maayo, kon indi gani, ti, ipatapas mo na lang ini.’”

Si Jesus Nag-ayo sang Buktot nga Babayi sa Adlaw nga Inugpahuway

10Sang isa ka Adlaw nga Inugpahuway si Jesus nagapanudlo sa sinagoga. 11May isa ka babayi didto nga ginagamhan sang malaut nga espiritu nga nagpamasakit sa iya sa sulod sang desi-otso ka tuig. Nagasiyoktot sia kag indi makatadlong. 12Sang pagkakita ni Jesus sa babayi gintawag niya sia, “Tyay, hilway ka na gikan sa imo balatian.” 13Gintungtong niya ang iya mga kamot sa babayi kag sa gilayon ang babayi makatindog na sing tadlong kag nagdayaw sa Dios.

14Ang#Exo. 20:9-10; Deut. 5:13-14. opisyal sang sinagoga naakig tungod kay nagpang-ayo si Jesus sa Adlaw nga Inugpahuway. Gani nagsiling ang opisyal sang sinagoga sa mga tawo, “May anom ka adlaw nga kita nagapangabudlay. Gani, sa sina nga mga adlaw palapit kamo kag magpabulong, pero indi sa Adlaw nga Inugpahuway!”

15Ang Ginoo nagsabat sa iya, “Mga hipokrito! Indi bala ang tagsatagsa sa inyo nagahubad sang iya baka ukon asno sa toril sa Adlaw nga Inugpahuway kag nagadala sa iya sa pagpainom? 16Karon yari ang isa ka babayi nga kaliwat ni Abraham nga gingapos ni Satanas sa sulod sang desi-otso ka tuig. Indi bala sia dapat hilwayon sa Adlaw nga Inugpahuway?” 17Sang ginsiling ni Jesus ini, ang tanan niya nga mga kaaway nahuya sa ila kaugalingon, samtang ang tanan nga mga tawo nagkalipay sa tanan nga makatilingala nga mga butang nga nahimo niya.

Ang Palaanggiran Nahanungod sa Binhi sang Mustasa

(Mat. 13:31-32; Mar. 4:30-32)

18Si Jesus nagpamangkot, “Ano bala ang kaangay sang paghari sang Dios? Sa ano nga butang ipaanggid ko ini? 19Kasubong ini sang binhi sang mustasa nga ginkuha sang isa ka tawo kag ginpanggas sa iya uma. Ang binhi nagtubo kag nangin-isa ka kahoy, kag ang mga pispis nagpugad sa iya mga sanga.”

Ang Palaanggiran Nahanungod sang Lebadora

(Mat. 13:33)

20Sa liwat si Jesus nagpamangkot, “Sa ano ko bala ipaanggid ang paghari sang Dios? 21Kaangay ini sang lebadora nga ginkuha sang isa ka babayi kag ginsamo sa tatlo ka sukob nga harina tubtob ang bug-os nga ginmasa naghabok.”

Ang Makitid nga Pwertahan

(Mat. 7:13-14, 21-23)

22Nagapakadto si Jesus sa Jerusalem nga nagpanudlo sa mga tawo sa mga banwa kag mga barangay nga iya gin-agihan. 23May nagpamangkot sa iya, “Sir, diutay lang bala nga mga tawo ang maluwas?”

Si Jesus nagsabat sa ila, 24“Magtinguha kamo sa pagsulod sa makitid nga pwertahan. Kay nagasiling ako sa inyo nga madamo ang magatinguha sa pagsulod, pero indi makasulod. 25Ang pangulo sang balay magabangon kag magapanira sang pwertahan. Ti, kon didto pa kamo nagatindog sa gwa kag magapanuktok sa pwertahan kag magsiling, ‘Sir, abrihi kami!’ magasabat sia sa inyo, ‘Wala ako makahibalo kon taga-diin kamo.’ 26Dayon magasabat kamo, ‘Nagkaon kag nag-inom kami upod sa imo kag nagpanudlo ka sa amon banwa.’ 27Pero#Sal. 6:8. magasiling sia liwat, ‘Wala ako makahibalo kon taga-diin kamo. Palayo kamo sa akon, tanan kamo nga mga manugbuhat sang kalautan!’ 28Daw#Mat. 22:13; 25:30. #Mat. 8:11-12. ano ang inyo paghinibi kag pagbinagrot sang inyo mga ngipon, kon makita ninyo si Abraham, si Isaac, kag si Jacob kag ang tanan nga mga propeta sa Ginharian sang Dios, samtang kamo inyo wala pagpasudla. 29May mga tawo nga magaabot halin sa sidlangan kag nakatundan, halin sa aminhan kag bagatnan, kag magapungko sa punsyon sa Ginharian sang Dios. 30Gani#Mat. 19:30; 20:16; Mar. 10:31. may mga naulihi nga mauna, kag may mga nauna nga maulihi.”

Ang Paghigugma ni Jesus sa Jerusalem

(Mat. 23:37-39)

31Sa amo man nga tion may mga Fariseo nga nagpalapit kay Jesus kag nagsiling sa iya, “Kinahanglan maghalin ka diri kag magkadto sa iban nga lugar tungod kay si Herodes nagtuyo sa pagpatay sa imo.”

32Si Jesus nagsabat sa ila, “Lakat kag singgani ina nga singgalong: ‘Nagapangtabog ako sing mga demonyo kag nagapang-ayo sini nga adlaw kag buas, kag sa ikatlo nga adlaw tapuson ko ang akon hilikuton.’ 33Pero kinahanglan nga magpadayon ako sa akon paglakat sini nga adlaw kag buas kag sa madason nga adlaw, kay wala nagakabagay nga ang isa ka propeta mapatay sa iban nga lugar luas sa Jerusalem.

34“O Jerusalem, Jerusalem! Ikaw nga nagapamatay sang mga propeta, ikaw nga nagapangbato sang mga ginpadala sa imo sang Dios. Makapila kuntani nga luyag ko tipunon ang tanan mo nga mga tawo kaangay sang isa ka munga nga nagatipon sang iya mga piso sa idalom sang iya mga pakpak, pero indi ka luyag. 35Gani#Sal. 118:26. ang imo Templo pagapatumbayaan. Nagasiling ako sa imo nga indi na nimo ako makita tubtob mag-abot ang tion nga magsiling ka, ‘Dios bendisyuni sia nga nagaabot sa ngalan sang Ginoo.’”

Currently Selected:

Lucas 13: MBBHIL12

Highlight

Copy