Juan 1

Ang Pulong sang Kabuhi

1Sa wala pa matuga ang kalibutan, yara na ang Pulong. Ang Pulong kaupod sa Dios, kag ang Pulong Dios. 2Halin gid sa ginsugoran ang Pulong kaupod sa Dios. 3Paagi sa Pulong gintuga sang Dios ang tanan nga mga butang, kag wala sing may natuga kon indi paagi sa iya. 4Ang Pulong amo ang ginhalinan sang kabuhi,#1:4 Ang Pulong amo ang ginhalinan sang kabuhi: ukonAng tanan nga ginhimo may kabuhi sa paghiusa sa Pulong. kag ini nga kabuhi nagdala sing kapawa sa mga tawo. 5Ang kapawa nagasiga sa kadudulman, kag ang kadudulman wala makadaog sang kapawa.

6Ang#Mat. 3:1; Mar. 1:4; Luc. 3:1-2. Dios nagpadala sang iya manugbalita, ang tawo nga ginhingalanan kay Juan, 7nga nag-abot sa pagsugid sa mga tawo nahanungod sang kapawa. Ginsugiran niya sila agod ang tanan magpamati sang mensahe kag magtuo. 8Sia mismo indi amo ang kapawa, kundi nag-abot sia sa pagsugid lamang nahanungod sinang kapawa. 9Ini amo ang matuod nga kapawa—ang kapawa nga nagaabot sa kalibutan kag nagaiwag sa tanan nga mga tawo.

10Ang Pulong yara na nga daan sa kalibutan. Ang kalibutan gintuga sang Dios paagi sa iya, pero ang mga tawo sa kalibutan wala magkilala sa iya. 11Nag-abot sia sa iya kaugalingon nga banwa, pero ang iya mga kasimanwa wala magbaton sa iya. 12Pero may yara gid man nga nagbaton sa iya kag nagtuo sa iya ngalan. Gani ginhatagan niya sila sing kinamatarong nga mangin-anak sang Dios. 13Nangin-anak sila sang Dios indi sa tawhanon nga paagi bisan pa nga natawo sila sa tawhanon nga amay, kundi ang Dios mismo ang naghimo sa ila nga iya mangin-anak.

14Ang Pulong nangintawo kag nagkabuhi sa tunga namon. Nakita namon ang iya pagkagamhanan nga puno sang paghigugma kag kamatuoran; ini amo ang kagamhanan nga nabaton niya subong bugtong nga Anak sang Amay.

15Nagpanaksi si Juan nahanungod sa iya, kag nagsinggit, “Amo ini sia ang akon ginsiling sa inyo nga magaabot nga ulihi lang sa akon, pero labaw pa sia sa akon, tungod kay sa wala pa ako matawo, yara na sia.”

16Gikan sa kabuganaan sang iya gugma, nanginmaayo sia sa aton tanan kag nabaton naton ang nagadinasundason nga mga kaayuhan. 17Ang Kasugoan ginhatag sang Dios paagi kay Moises, pero ang gugma kag kamatuoran nag-abot sa aton paagi kay Jesu-Cristo. 18Wala sing bisan sin-o nga nakakita sa Dios, kundi ang bugtong nga Anak sang Dios, nga yara sa tupad sang Amay. Sia amo ang nagpahayag sa iya.

Ang Mensahe ni Juan nga Manugbautiso

(Mat. 3:1-12; Mar. 1:1-8; Luc. 3:1-18)

19Ang mga pangulo sang mga Judio sa Jerusalem nagpadala sang pila ka mga pari kag mga Levita sa pagpamangkot kay Juan, “Sin-o bala ikaw?”

20Si Juan nagsabat sa ila kag nagpahayag nga wala sing lipudlipod, “Indi ako amo ang Cristo.”

21Ginpamangkot#Mal. 4:5; Deut. 18:15, 18; Sir. 48:10-11. nila sia liwat, “Kon amo, sin-o ka? Ikaw bala si Elias?”

Nagsabat si Juan, “Indi ako si Elias.”

Liwat nagpamangkot sila, “Ikaw bala ang Propeta?”#1:21 ANG PROPETA: Sia amo ang ginapaabot nga magapakita kag magapahibalo sang magaabot nga Cristo.

Nagsabat si Juan, “Indi.”

22Dayon nagsiling sila, “Ti, sugiri kami kon sin-o ikaw agod may isabat kami sa mga nagpadala sa amon. Ano ang masiling mo nahanungod sa imo kaugalingon?”

23Si#Isa. 40:3 (LXX). Juan nagsabat paagi sa mga pulong ni Isaias nga propeta:

“Ako amo ‘ang nagawali sing mabaskog sa desierto:

Mag-aman kamo sing tadlong nga dalan nga pagaagyan sang Ginoo!’”

24Ini nga mga mensahero ginpadala sang mga Fariseo. 25Ginpamangkot nila si Juan, “Kon indi ikaw ang Cristo, ukon si Elias ukon ang Propeta, ngaa bala nga nagapangbautiso ka?”

26Nagsabat si Juan, “Ginbautisohan ko kamo sang tubig, pero sa tunga ninyo may isa nga nagatindog nga wala ninyo makilala. 27Magaabot sia nga ulihi lang sa akon, pero indi ako takos bisan sa paghubad sang higot sang iya sandalyas.”

28Ini tanan nahanabo sa Betania, sa tabok sang Suba sang Jordan sa diin nagapangbautiso si Juan.

Ang Kordero sang Dios

29Sang madason nga adlaw, nakita ni Juan si Jesus nga nagapadulong sa iya kag nagsiling sia, “Yari ang Kordero sang Dios nga nagakuha sang sala sang kalibutan! 30Sia amo ang akon ginsiling nga magaabot nga ulihi lang sa akon, pero labaw pa sia sang sa akon, tungod kay sa wala pa ako matawo, yara na sia. 31Wala ako makahibalo kon sin-o gid sia, pero nag-abot ako nga nagabautiso sang tubig agod nga mapakilala ko sia sa mga katawhan sang Israel.”

32Ini amo ang panaksihon nga ginhatag ni Juan, “Nakita ko ang Espiritu nga nagakunsad subong sang isa ka pating gikan sa langit, kag nagpabilin sa iya. 33Wala pa ako makakilala sa iya, pero ang Dios nga nagpadala sa akon sa pagbautiso sa mga tawo sang tubig, nagsiling sa akon, ‘Makita mo ang Espiritu nga magakunsad kag magapabilin sa isa ka tawo. Ina sia amo ang magabautiso sa mga tawo sang Espiritu Santo.’” 34Kag nagsiling pa gid si Juan, “Nakita ko ini kag nagasiling ako sa inyo, nga sia amo ang Anak sang Dios.”

Ang Nahauna nga mga Gintuton-an ni Jesus

35Sang madason nga adlaw, yadto didto liwat si Juan nagatindog upod ang duha sang iya mga gintuton-an. 36Sang nakita niya si Jesus nga nagalabay nagsiling sia, “Yari ang Kordero sang Dios!”

37Ang duha niya ka mga gintuton-an nakabati sang pagsiling niya sini, kag nagsunod sila kay Jesus. 38Sang nagbalikid si Jesus, nakita niya sila nga nagasunod sa iya, kag nagpamangkot sia sa ila, “Ano bala ang ginapangita ninyo?”

Nagsabat sila, “Sa diin bala ikaw nagaestar, Rabbi?” (Ang tinaga nga “Rabbi” sa Hebreo nagakahulogan “Manunodlo.”)

39Nagsabat sia, “Dali kag tan-awa ninyo.” Gani naglakat sila upod sa iya kag nakita nila kon diin sia nagaestar, kag nagpabilin sila upod sa iya sadtong adlaw. (Mga alas kwatro na sadto sang hapon.)

40Ang isa sini sa ila nga nakabati kay Juan kag nagsunod kay Jesus amo si Andres nga utod ni Simon Pedro. 41Sa gilayon ginpangita niya ang iya utod nga si Simon kag ginsugiran niya sia, “Nakita namon ang Mesias.” (Ang tinaga nga “Mesias” sa Hebreo nagakahulogan “Cristo.”) 42Dayon gindala niya si Simon kay Jesus.

Si Jesus nagtulok sa iya kag nagsiling, “Ikaw si Simon nga anak ni Juan. Pagahingalanan ikaw Cefas.” (Ini nga ngalan pareho sang ngalan nga Pedro nga kon sayuron “bato.”)

Gintawag ni Jesus si Felipe kag si Natanael

43Sang madason nga adlaw, nagpamat-od si Jesus nga magkadto sa Galilea. Nakita niya si Felipe kag ginsingganan, “Upod ka sa akon!” (44Si Felipe taga-Betsaida, nga amo man ang banwa sa diin si Andres kag si Pedro nagaestar.) 45Ginpangita ni Felipe si Natanael, kag ginsugiran sia, “Nakita namon ang tawo nga gintumod ni Moises sa iya ginsulat sa libro sang Kasugoan, nga nahanungod sa iya ang mga propeta nagsulat man. Sia amo si Jesus nga anak ni Jose nga taga-Nazaret.”

46Si Natanael nagpamangkot, “May maayo bala nga butang nga magagikan sa Nazaret?”

Si Felipe nagsabat, “Dali kag tan-awa.”

47Sang makita ni Jesus si Natanael nga nagapadulong sa iya nagsiling sia nahanungod sa iya, “Yari ang isa ka matuodtuod nga Israelinhon; wala sia nagadinaya!”

48Si Natanael nagpamangkot sa iya, “Paano mo ako nakilala?”

Si Jesus nagsabat, “Nakita ko na ikaw didto sa idalom sang kahoy nga higera, sa wala pa ikaw gintawag ni Felipe.”

49Nagsabat si Natanael, “Manunodlo, ikaw amo ang Anak sang Dios! Ikaw amo ang Hari sang Israel!”

50Nagsiling si Jesus, “Nagatuo bala ikaw tungod kay nagsiling ako sa imo nga nakita ko ikaw sang didto ka sa idalom sang kahoy nga higera? Mas dalagku pa gid sini nga mga butang ang imo makita!” 51Kag#Gen. 28:12. si Jesus nagsiling sa ila, “Matuod gid, makita ninyo ang langit nga nabuksan kag ang mga anghel sang Dios nga nagapasaka-panaog sa ibabaw sang Anak sang Tawo.”

Currently Selected:

Juan 1: MBBHIL12

Highlight

Copy