Mga Binuhatan 18

Sa Corinto

1Sa tapos sini naghalin si Pablo sa Atenas kag nagkadto sa Corinto. 2Nagkitaay sila didto sang isa ka Judio nga ginahingalanan kay Aquila. Natawo sia sa Ponto kag bag-o lang sia mag-abot halin sa Italia kaupod sang iya asawa nga si Priscila, kay ginmanduan ni Emperador Claudio ang tanan nga mga Judio nga maghalin sa Roma. Nagpakigkita si Pablo sa ila, 3kag nagdayon sia kag nag-obra upod sa ila, tungod kay pareho ang ila palangitan-an nga amo ang paghimo sing mga tolda. 4Sa tagsa ka Adlaw nga Inugpahuway nagpakigbais sia sa mga Judio kag mga Griego sa sinagoga sa tuyo nga mahaylo niya sila.

5Sang pag-abot ni Silas kag ni Timoteo halin sa Macedonia, masako si Pablo sa pagwali sang mensahe kag sa pagpamatuod sa mga Judio nga si Jesus amo ang Cristo. 6Sang ginpamatukan nila sia kag ginpasipalahan, gintap-ok niya ang yab-ok sa iya bayu sa pagprotesta nga nagasiling sa ila, “Kon indi kamo maluwas, kamo mismo ang balasulon kag wala na ako sing salabton. Sugod karon makadto ako sa mga Hentil.” 7Gani ginbayaan niya sila kag nagkadto sia sa pagdayon sa balay sang isa ka Hentil nga ginahingalanan kay Tito Justo. Nagasimba sia sa Dios, kag ang iya balay yara sa tupad gid sang sinagoga. 8Si Crispo nga pangulo sang sinagoga nagtuo sa Ginoo upod sa bug-os niya nga panimalay. Madamo nga mga taga-Corinto ang nakabati sang mensahe kag nagtuo kag nagpabautiso.

9Isa sadto ka gab-i si Pablo nakakita sing isa ka palanan-awon sa diin ang Ginoo nagsiling sa iya, “Indi ka magkahadlok, kundi magpadayon ikaw sa paghambal. Indi ka mag-untat, 10kay ako kaupod sa imo. Wala sing may makahalit sa imo, kay madamo ang akon mga tawo sa sini nga siudad.” 11Gani sa sulod sang isa ka tuig kag tunga, nagtener si Pablo didto sa pagtudlo sa mga tawo sang pulong sang Dios.

12Sang si Galion amo ang gobernador nga Romanhon sang Acaya, nagtipon ang mga Judio kag ila gindakop si Pablo kag gindala sia sa hukmanan. 13Nagsiling sila, “Ini nga tawo nagapanghaylo sang mga tawo sa pagsimba sa Dios sa paagi nga batok sa kasugoan!”

14Sang buot na si Pablo maghambal, nagsiling si Galion sa mga Judio, “Kon nahanungod ini nga butang sa kalainan ukon kasal-anan nga nahimo, matarong lang para sa akon nga magpailob ako sa inyo nga mga Judio. 15Pero tungod kay ang inyo ginasuayan nahanungod sa mga pulong kag mga ngalan kag sang inyo kaugalingon nga kasugoan, indi ako manginhukom sa amo nga mga butang. Kamo mismo ang dapat maghusay sina!” 16Kag gintabog niya sila pa gwa sa hukmanan. 17Gindakop nila tanan si Sostenes nga pangulo sang sinagoga kag ginbunal sia sa atubangan sang hukmanan, pero wala ini pagsapaka ni Galion.

Ang Pagbalik sa Antioquia

18Nagtener#Num. 6:18. si Pablo sing madamo nga mga inadlaw sa Corinto upod sang mga kautoran kag ugaling naghalin sa ila kag nagpanakayon sia pakadto sa Siria kaupod kanday Priscila kag Aquila. Sa wala pa sila makapanakayon nagpakalbo sia sa Cencreas tungod kay may panaad sia.#18:18 MAY PANAAD SIA: Ini napatuhoy sa kinabatasan sang mga Judio sa pagpakalbo subong isa ka tanda nga natuman ang panaad. 19Nagdungka sila sa Efeso sa diin ginbilin niya si Priscila kag si Aquila. Nagkadto sia sa sinagoga kag nagpakigbais sa mga Judio. 20Ginpangabay sia sang mga tawo nga magpabilin sing madugay, pero indi sia magpasugot. 21Sa baylo, nagsiling sia sa ila sang manuglakat na sia, “Kon pagbuot sang Dios magabalik ako sa inyo.” Gani nagpanakayon sia halin sa Efeso.

22Sang pag-abot ni Pablo sa Cesarea, nagkadto sia sa Jerusalem kag gin-abiabi niya ang iglesia kag dayon magkadto sa Antioquia. 23Sa tapos sia makatener didto sing pila ka adlaw, naglakat sia. Nag-agi sia sa mga sakop sang Galacia kag Frigia nga nagapabakod sang tanan nga mga gintuton-an.

Si Apolos Sa Efeso kag Corinto

24May isa ka Judio nga natawo sa Alejandria nga nag-abot sa Efeso. Ginhingalanan sia kay Apolos. Isa sia ka maayo nga manughambal kag may tuman sia nga kaalam sang mga Kasulatan. 25Gintudloan sia nahanungod sang Dalan sang Ginoo kag nagwali sia nga may daku nga kapagsik kag husto ang iya pagpanudlo sang mga butang nahanungod kay Jesus. Pero ang bautiso ni Juan amo lamang ang iya nahibaluan. 26Naghambal sia sa mga tawo sa sinagoga nga may kaisog. Sang mabatian sia ni Priscila kag ni Aquila, ila sia gin-agda sa ila balay sa diin ginsaysay nila sa iya sing mas matul-id ang Dalan sang Dios. 27Dayon nagpamat-od si Apolos nga magkadto sa Acaya, gani ginbuligan sia sang mga kautoran sa Efeso paagi sa pagsulat sa mga gintuton-an sa Acaya, nga batunon gid nila sia. Sang pag-abot niya didto, daku gid ang nabulig niya sa ila nga nangintumoluo paagi sa kaayo sang Dios. 28Tungod sang iya mapag-on nga mga pagsuay, iya ginlutos ang mga Judio sa ila mga pagbaisay sa atubang sang mga tawo, paagi sa pagpamatuod sa mga Kasulatan nga si Jesus amo ang Cristo.

Currently Selected:

Mga Binuhatan 18: MBBHIL12

Highlight

Copy