Mga Binuhatan 17

Sa Tesalonica

1Nag-agi si Pablo kag si Silas sa Anfipolis kag Apolonia kag nakaabot sila sa Tesalonica sa diin may isa ka sinagoga sang mga Judio didto. 2Suno sa iya kinabatasan nagkadto si Pablo sa sinagoga. Sa sulod sang tatlo ka simana#17:2 sa sulod sang tatlo ka simana: ukonsa sulod sang tatlo ka Adlaw nga Inugpahuway. nakigbais sia didto sa mga tawo kag gingamit niya ang mga Kasulatan 3sa pagsaysay kag sa pagpamatuod nga ang Cristo kinahanglan mag-antos kag mabanhaw gikan sa mga minatay. Nagsiling si Pablo, “Ining Jesus nga akon ginasugid sa inyo amo ang Cristo.” 4Ang iban sa ila nahaylo sang iya ginsiling kag nagbuylog sila kay Pablo kag kay Silas. Nagbuylog man sa ila ang daku nga grupo sang mga Griego nga nagasimba sa Dios kag subong man ang madamo sang kinilala nga mga kababayin-an.

5Pero nahisa ang mga Judio kag gintipon nila ang iban nga mga hurong sa mga dalan. Sang makatipon sila sing madamo nga mga tawo nagtuga sila sang kinagamo sa bug-os nga siudad. Gingubat nila ang balay ni Jason sa pagpangita kay Pablo kag kay Silas agod madala sila sa atubang sang mga tawo. 6Pero sang wala nila sila makita, ila ginsagnoy si Jason kag ang pila ka mga kautoran sa atubang sang mga awtoridad sang siudad kag nagsinggit, “Ini nga mga tawo nagatuga sing gamo bisan diin lang. Karon nag-abot sila sa aton siudad 7kag gintago sila ni Jason sa iya balay. Ginalapas nila ang mga kasugoan sang Emperador kay nagasiling sila nga may isa pa ka hari nga ginahingalanan kay Jesus.” 8Ang ila ginpanghambal nagpagamo sang mga tawo kag sang mga awtoridad sang siudad. 9Ginpabayad sang mga awtoridad si Jason kag ang iya mga kaupdanan sing piyansa, kag dayon ginbuy-an sila.

Sa Berea

10Sang pagkagab-i ginpadala sang mga tumoluo si Pablo kag si Silas pakadto sa Berea. Sang pag-abot nila didto, nagkadto sila sa sinagoga sang mga Judio. 11Ang mga tawo didto mas labi pa ka handa sa pagbaton sang ginatudlo sang sa mga taga-Tesalonica. Nagpamati sila nga may daku nga kakunyag sa mensahe kag ginausisa nila adlaw-adlaw ang mga Kasulatan kon bala ang ginahambal ni Pablo matuod gid. 12Madamo sa ila ang nagtuluo lakip ang kinilala nga mga babayi kag mga lalaki nga taga-Gresia. 13Pero sang nakabati ang mga Judio sa Tesalonica nga si Pablo nagwali man sa Berea sang pulong sang Dios, nagkadto sila didto kag ginsugyot nila ang mga tawo sa paggamo. 14Sa gilayon ginpalakat sang mga kautoran si Pablo pakadto sa baybayon, pero si Silas kag si Timoteo nagpabilin sa Berea. 15Ang mga tawo nga nagdul-ong kay Pablo nag-upod sa iya tubtob sa Atenas. Dayon nagbalik sila sa Berea nga dala ang tugon ni Pablo kay Silas kag kay Timoteo nga mag-apas sila sa iya gilayon.

Sa Atenas

16Samtang nagahulat si Pablo kay Silas kag kay Timoteo sa Atenas, natublag gid sia sang makita niya ang kadamuon sang mga diosdios sa siudad. 17Gani sa sulod sang sinagoga nagpakigbais sia sa mga Judio kag mga Hentil nga nagasimba sa Dios, kag nagpakigbais man sia adlaw-adlaw sa mga tawo nga masugata niya sa plasa. 18May mga Epicureo kag Estoico nga mga manunodlo nga nagpakigbais man sa iya. Ang iban sa ila nagpamangkot, “Ano bala ang ginasugid sining tikalon?”

Ang iban nagsiling, “Daw lain naman ini nga mga dios ang ginawali niya.” Ginsiling nila ini tungod kay si Pablo nagwali nahanungod kay Jesus kag sang pagkabanhaw#17:18 JESUS KAG SANG PAGKABANHAW: Sa Griego ang pulong “pagkabanhaw” mahimo hangpon nga isa ka ngalan sang diosa. 19Gani gin-agda kag gindala nila si Pablo sa atubang sang konseho sang siudad nga ginatawag Areopago. Nagsiling sila sa iya, “Luyag namon mahibaluan ining bag-o nga pagtulon-an nga imo ginatudlo. 20Ang iban nga mga butang nga amon nabatian sa imo ginatudlo bag-o sa amon, gani luyag namon mahibaluan ang kahulogan sini.” (21Kay ang tanan nga mga taga-Atenas kag subong man ang mga dumoluong nga nagaestar didto wala na sing ginahimo kundi sa pagsugid kag sa pagpamati sang labing bag-o nga mga butang.)

22Nagtindog si Pablo sa atubang sang konseho sang siudad kag nagsiling, “Mga taga-Atenas! Nakita ko nga sa tanan nga butang tama gid sa inyo ka relihiyoso. 23#Klm. Sol. 13:1. Kay sa akon paglibot sa inyo siudad kag sa pagtan-aw ko sang mga lugar nga inyo ginasimbahan, may nakita man ako nga altar nga nasulatan, ‘Sa Wala Makilal-i nga Dios.’ Gani ang inyo ginasimba nga wala ninyo makilala, amo ang akon subong ginawali sa inyo. 24Ang#1 Hari 8:27; Isa. 42:5; Bin. 7:48. Dios nga naghimo sang kalibutan kag sang tanan nga yara sa kalibutan, amo ang Ginoo sang langit kag sang duta. Sia wala nagaestar sa mga templo nga ginhimo sang mga tawo. 25#2 Mac. 14:35.Wala man sia nagakinahanglan sang bisan ano nga sarang mahatag sang tawo paagi sa ila pagpangabudlay para sa iya, kay sia gid ang nagahatag sang kabuhi kag ginhawa kag sang tanan nga mga butang sa tanan nga mga tawo. 26#2 Mac. 7:23.Gikan sa isa ka tawo gintuga niya ang tanan nga mga rasa sang mga tawo kag ginpaestar sila sa tanan nga bahin sang bug-os nga kalibutan. Napahamtang na niya nga daan ang tanan nga mga panahon kag ang mga dulonan sang mga lugar nga pagaestaran nila. 27#Klm. Sol. 13:6-9.Ginhimo niya ini agod nga pangitaon nila sia kag basi pa lang nga mabatyagan nila sia sa ila pagpangita sa iya. Pero ang matuod nga ang Dios indi malayo sa tagsatagsa sa aton, 28kay

‘Sa iya kita nagakabuhi, nagagiho kag nangin-amo.’

Subong sang ginasiling sang iban sang inyo mga manugbinalaybay,

‘Kita man mga anak niya.’

29Tungod kay mga anak kita sang Dios, indi kita maghunahuna nga ang kinaugali sang Dios subong sang imahen nga nahimo sa bulawan, pilak ukon bato, ukon ano man nga ginsilsil sang sampaton nga tawo. 30Ginpaligad sang Dios ang mga panag-on sang wala pa makakilala ang mga tawo sa iya, pero karon iya ginasugo ang tanan nga mga tawo bisan diin sa pagbiya sang ila malaut nga mga pagginawi. 31Kay may napat-od sia nga adlaw nga pagahukman niya sing matarong ang bug-os nga kalibutan paagi sa isa ka tawo nga iya ginpili. Ginpamatud-an niya ini sa tanan paagi sa iya pagbanhaw sang amo nga tawo!”

32Sang pagkabati nila kay Pablo nga nagahambal nahanungod sang pagkabanhaw sa mga minatay, ang iban sa ila nagyaguta sa iya, pero ang iban nagsiling sa iya, “Luyag kami mamati liwat sa imo nga nagahambal nahanungod sini nga butang.” 33Gani naghalin si Pablo sa sadto nga pagtililipon. 34May mga tawo nga nag-upod sa iya kag nagtuo, ang isa sa ila amo si Dionisio nga katapo sang konseho kag ang isa ka babayi nga ginahingalanan kay Damaris kag iban pa nga mga tawo.

Currently Selected:

Mga Binuhatan 17: MBBHIL12

Highlight

Copy