Márko 4
4
Yíésu gáál hib máá les fafuoká geey
1Yíésu aadh eiy geđi gálaat bás in he gaa onisie. Nyésébích guđoká mú ki made, mu kádích bás gaa yielká hile, gaa yíéđie. Gálaat íín ílung yíéđie. 2Mu hé burnayká hát hibietká gáál onisie. Hibano muí gáál onisieká híb tikiˈd hééllá. Mu kieye, 3Nee kóo! Máá les fafuoká áár eedhdhe, les sedhe. 4Áár hátlé giri fafieká áár ˈdáá tikiˈd ˈgierich af ki okoˈde, hurum ká yimie, hí koey. 5Áár ˈdáá tikiˈd ál waaro-, eeˈd hí iraam mánká ki okoˈde, đo ál ˈjob hirich hí yé gáá ˈdie. 6Aadh ka ˈjiiyyeká hirís đo boloyye, ˈdaa giri hidh les ma ki arînyká. 7Áár ˈdáá tikiˈd ál híí ˈgayyoká les gaa ˈdane, hirís hí yé ká ˈdiiyyeká hiris kinaal hii hí bolosie, hé ma ˈdáliny. 8Ár giri muí ál maal hí midhabká gaa fieká ká ˈdie, hisse, ˈbaal hí tomon seđ ˈdale, ˈbaal hí tomon le ˈdale, ˈbaal hí kúˈd ˈdale, Yíésu hí yie.
9Aalé mu gáál geey, kieye, Máá nee ˈguoká hí hééllá maalo, yie.
10Yíésu tákámle onnoyká gál giri mú hol ˈgieká ubaa mú lalillé tomon a naamaká mú hibano giriká hélle heete. 11Mu gáál geey, Itíni in hé geer geđi Guch Waaˈgietká Waag hí argisiche. Tá gál baaˈd ˈgíétíá in yú he lulle hát hibietká geđia. 12Hibano yú gáál geđúóllá,
Gaalí dhaaˈgasan,
kor ha gaalí kimísan.
Gaalí maamalo,
kor ha gaalí tág mááliny.
Hát kinaal muuninyka,
gaal Waag hollo hol ˈdu gáá naadha,
Waag ađááb yé haí gaa ˈdeđicha,#4:12 Yisááya 6:9-10
muí yie.
13Aalé Yíésu gáál heete, kieye, Hibéél ití tág ma mááliny? Hibéél hí ma maalinyka, hib eiy háte hí kiimisata? yie. 14Aalé Yíésu gáál híb hélle geey, kieye, Máá les fafuoká hát máá ˈdeeny Waaˈgiet gálaat oonisuoká. Aar he ˈdeeny Waaˈgiet.
15Gáál ˈdáá tikiˈd yaalmit giri ˈdeeny Waaˈgiet ki mamaloká he hát ár ˈgierich af ki okoˈdeká. Gaal ˈdeeny Waaˈgiet maaleka, ál tikiˈde kinaal Sátan đo hai ká chimie, gáál ˈdéé hai gaa bađisiche.
16Yaalmit gáál ˈdáá tikiˈd hí ˈdeeny Waaˈgiet ki mamaloká he hát ár ál waaroká ki okoˈdeká. Gaal ˈdeeny Waaˈgiet maaleka, ˈdéé hát geer gaa meentiká iiy hai yie, kor gáál hé ˈdee hí hát ˈdabaanká ger ma híliny. 17Aalé gaal hé ˈdeeny Waaˈgiet ˈjíig ma ki yíéđiminy. ˈDeeny Waaˈgiet ˈdugaka, gaal hé ˈdeđewká ubaa manyjasiny il ki argeka, ál ˈjób kinaal gaal đo hai ginnay, ˈdéé gíl sug hai ki hay.
18Yaalmit gáál ˈdáá tikiˈd hí ˈdeeny Waaˈgiet ki mamaloká he hát ár ál híí ˈgayyoká les gaa ˈdaneká. Gaal ˈdeeny Waaˈgiet hai maale, 19kor gáál tawuny lesalloká haí ká hille, gáál kamur lesalloká haí laate, gaal hé burnayká he fede. Hát ˈguor híí ˈguo-, hirís bolosíélláka, hééllá lulle gálaat ger hileka, in gaal ˈdéé nee ma kokony, hát Waag hí feˈdoká el ma gaa igiriny.
20Yaalmit gáál ˈdáá tikiˈd hí ˈdeeny Waaˈgiet ki mamaloká he hát ár máá les fafuoká hí máál álle gaa fieká. Gál kinaallá ˈdeeny Waaˈgiet maaleka ˈdéé iiy hai yie. ˈDee gáál hát ˈdabaanká ger hileka gaal đo hát ˈguom hát ˈdabaanká hite-, ˈguom mé tikiˈd hí tomon seđe-, mé tikiˈd hí tomon le-, mé tikiˈd hí kúˈdká hai yie, Yíésu hí yie.
Nyátáá hé máá níínní hí he af bubuoká mán
21Yíésu geđi gáál geey, kieye, Nyátáá gaalí ˈjiet gaa iđieka, hé máá níínní hí ˈdébé af bubuoká mán, ubaa hí kúb geer gaa iđimuoká mán. Nyátáá hé gaalí úr ma ki ređîny, ˈbíl geer hí ma gaa eedhêny? 22Hé gaalí kakawká yé hai ká ˈdeeme, hé shuolitiká gálaat haí aargira. 23Máá nee ˈguoká hí hééllá maalo, Yíésu hí gáál yie.
24Aalé mu geđi gáál geey, kieye, Hé hí maallééllá hát ˈdabaanká nee kóo. Hé hí he ki ekemeycho-, hí gálaat he ki fafiyyoká, in úba Waag hí he kí fafiyya, hé kinaallá hé eiy úba haí ˈdú aargiˈda. 25Máá hé gaalí gíl geer gaa kaayká tág chiratká, hé éíy taaka úba ha gaalí shigia. Tá máá hé gaalí gíl geer gaa kaayká tág ma ki yaalinyká héllé gíl ká ˈguo kinaal ha gaalí gaa egedhdhe, muí yie.
Guch Waaˈgiet hát meete ki yeedhe?
26Yíésu héél gáál geey, kieye, Guch Waaˈgiet hát lés urgúaka máádhat hí fieká. 27Mu bar lulle kulich ubaa chúúrélle rafanan-, tá ka kekeenká, hirich hátlé yé ka ˈdeˈdeenká muí muogká. 28Eeˈd tákámlé ˈguom higisicha. Er hirich yé ká ˈdee, aalé hai ˈdiiyye, ˈdalleka, hai ˈgileyye. 29Waaséél hite-, muran hí ali kí ˈdiiyyeka, máálle faaˈd hai eedhdhe, haí muˈde, muí yie.
30Aalé Yíésu geđi kieye, Guch Waaˈgiet hát meete ki yeedhe? Hib máre ke Guch Waaˈgiet ki ekemeye? 31Guch Waaˈgiet hát heert ninniká. Heert kinaallá hé arram lullé gaalí les gaa fafuoká heersamle ˈdú ninni. 32Tá gaalí fieka, ˈgórle hé ˈguor lullé les gaa ˈgieká ˈdú guđo. Heert ninnííllá ˈgórle ˈdie-, kolm hí gaa fuufuadheka, gáchle đo kimír haí ˈdú galle-, é haí gaa ˈdisate, muí yie.
33Mu hib burnayye-, hatalloká gáál geey. ˈDaab gaalí met ki chiiratká muí gáál ˈdeenyle ki onisie. 34Mu hát hibietká tákáma gálaat he oonisie. Tá mu af giri ubaa lalille tákámle onnoyká he lulle gáál eiy ki nie.
Yíésu waanich ubaa huđum ali koy
35Kúlích kinaallá gélgálle Yíésu lalille geey, kieye, Kí bás ílung ˈdaatí yé ki ˈdie, yie. 36Gaal nyesebich hay, kádích Yíésu hí gaa ijeká ˈdeete. Kadis eiy úba gáál hol eedhdhe. 37Aalé baran ká kiisate, huđum kadich geer faafame, kadich bie hí geer koch ká yie. 38Yíésu íín kadich ello he iife, đafare mé ˈdú iđie, rafame. Aalé mú lalille hí ram gaa kiisie, kieye, Máá gáál he oonisúóllo, in ke kufuma háluke, hé ko geer gaa ˈdeew mân? mú yie.
39Aalé Yíésu les gaa kieká waanich ali koy, huđum geey, kieye, Shab áat, ali ki ˈdé! yie. Waanich ali ki ˈdie, biiy đo ˈgidhiche.
40Aalé mu lalille heete, kieye, Háteka hí seereyyéel? Ití ye iiy ma chéen? yie.
41Gáál sierm hí súm faanne, gaal hol heegete, kieye, Héél máá máre, máá waanich ubaa huđum hí af maalóol? gaalí yie.
Currently Selected:
Márko 4: dsh
Highlight
Share
Copy
Want to have your highlights saved across all your devices? Sign up or sign in
Bible Translation and Literacy
