Márko 3

Yíésu Kúlích Hef ˈGisanká máádhat gaa bisie

1Aalé Yíésu geđi ˈbíl ˈdiiyiminyká hile. ˈBíl kinaal geerle máá gil hí ki kiite-, gíl gáá héljo mare hí gaa ije. 2Gáál mé tikiˈd gál Yíésu hem gaa sisidhoká fedo mare úba ál kinaal gaa ije. Gaal aalé Yíésu ˈdeey, mu har Kúlích Hef ˈGisanká máá gíl ˈdeew kinaal gaa biisuoka. 3Yíésu máá gíl ˈdeew kinaal geey, kieye, Le gaa keʼ, biiy metééllá káde, yie.

4Aalé Yíésu gáál heete, kieye, Hemuumurit Waaˈgietka, meete ke Kúlích Hef ˈGisanká gaa ekemeye? He in hé midhabká ke ekemeyee? Ebá, hé ˈdeewká ke ekemeye? Máádhat ki biisuoká kalatoo? Ebá, máádhat ki yegeská kalat? yie. Gál giriká hé ˈdéé ma hôn, đo shab yie.

5Mu hát idhoká gáál ki fuˈjie, kor gáál met guogintléél hí geer gaa ˈdeeneyche. Mu máá giriká geey, kieye, Gíl fat, yie. Máá giriká gíl fadhe, đo gil hí midhandhe. 6Gál Farisaay kinaal đo baaˈd yé ki ˈdie, gaal ubaa gál Heroˈdeká ˈgíérích he Yíésu ki yegeská hol gaa ˈgeˈgedhe.

Nyésébích ilishká Yíésu el gaa veere

7Aalé Yíésu ubaa lalille kie, bás in mé nie. Nyésébích guđoká Galilááya gáá kie, mú el gaa veere. 8Gál éíy ilishká hé muí ekeyká maaleká úba mú ˈdu gáá yimie. Gaal lés Yuuˈdia ubaa ˈjien Yerusalem, tá lés Iđumaya ubaa wár Yorˈdan ílung ˈdaatí gáá kie. ˈJien Turo ubaa ˈjien Siˈdon gál hí innumle gaa ije mare úba Yíésu ˈdu gáá yimie.

9Aalé Yíésu lalille geey, kieye, Ye kadich bala ka kóo, kadich gaa yíéđia, nyesebich hai ye ˈdu gáá tuutúminy, yie. 10Mu gál burnayká bisie, gál basham ˈguoká lulle mú ˈdú tuutume, giri mú đig yegetká. 11Bar lulle aryaan ˈdeđewká Yíésu argiyyeka, mú ˈgas met les hai gaa ˈdanne, kúóˈd hai ˈdoyye, kieye, Kúún he Iny Waaˈgiet! hai chie. 12Tá Yíésu aryáán ˈdéé ki mure, giri aryáán mú biiy ma mamalsinyká!

Yíésu gállé alb fafuo-, tomon a naamaká waaˈde

13Aalé Yíésu gúm feˈjie, mu gállé fedeká vie, gaal mú ˈdú sedhe. 14Gáál tomon a naam muí waaˈde, giri mú hol ˈguo-, tá muí alb fafuo-, mú fayamle hol gaa sisidhoká. 15Gáál muí fargogint gálaat aryáán yé ki ˈdeđuoká shie. 16Gál tomon a naama muí waaˈdeká meetle hééllá: Símon muí meeny Bétiro léká shie. 17Yákob iny Dhebeˈdayaká ubaa nyárlé Yuána, hullaalle meenylé muí shieká Bonéˈges. (Bonéˈges hélle kieye, hele ˈgeˈgete.) 18Tá gálatí he mú Ánˈduru, Fílib, Bartolomáyo, Matááyo, Tómas, Yákob giri iny Alfaayaká, Dhádias, tá Símon giri gálaat ˈjegeduoká, 19héétí Yúúˈdas Iskáryot máá waaséél Yíésu gál hí oos ˈgieká ˈdú eeyká.

Gaal Yíésu heengʼeedhe

20Waaséél Yíésu ˈbíl hile. Nyésébích ilishká geđi hí ˈdu gáá yimie, mu ubaa lalille ál ki gololsotká úba ˈdabe. 21Aalé mú gálle héél maaleká kie, mú ˈgiedhe, Mú sigíre hí faanne? yie.

22Aalé gál gálaat nyatalaam oonisuo-, Yerúsalem gáá yimie mare kieye, Mu Belsebul#3:22 Belsebul úba Sátan meenylé. giri aryáán kánsích léká ˈgaa, in fargogintle aryáán yiem ki ˈdeđia, gaalí yie.

23Aalé ál kinaal Yíésu gáál vie, gáál he onisie, kieye, Sátan háteeye hol ali gaa aruanna? 24Les gálle hol af ká điidhe-, hol tuutuneka, hé hol af ma chochony. 25Héétí ˈbíl geer tikiˈde-, hol ki ˈdalaateká hol tuutunneka, đo eiyyo hol gaa galle. 26Hát tikiˈdééllá Sátan tákámle hol gaa maamaˈde-, tá ubaa gálle hol af ká điidheka, Sátan đo me haí ˈgidhe. 27Hé máá níínní ˈbíl máá fargogoká higilo-, shokodaam gaa ugunanká mán. Har gaal mú er hiigidheka, in tákáma mú shokodaamle ugunma. 28Yú hí hé ˈdúwaká geeye, gálaat héllé ˈdeđew ekemeyo-, hát káána ađááb yíekaʼ, chaarim he hol chacharoká yíekaʼ, lulle Waag haí haađicha. 29Tá máá Hím Naasan Waaˈgiet chaaroká ađaablé kinaallá hé Waag hí ma haađiny, ađaab kinaallá taalle bííyyo máálle haí ˈgaa, muí yie.

30Yíésu hatallá yíéllá, he ˈdaa giri gaal kieye, Mu aryaan ˈdeewká he ˈgaa, gaalí yieká.

Yíésu gálle hí hol gaa ˈgeˈgedhe

31Yíésu ˈjielle ubaa nyaaramle ká yimie, baaˈd kí ˈdie, mú gáál ali ˈdú fie, Mú nyí kí vée, yie. 32Nyésébích guđo mú ki madeká mú geey, kieye, ˈJiekú ubaa nyaaramkú baaˈd ˈgee, ko hol gaa ˈgeˈgedhe, yie.

33Aalé Yíésu gáál ˈdéé hol ˈdú nie, kieye, ˈJiechú ubaa nyaaramchú he gálya? yie.

34Aalé mu gál hí ˈdinnam lulle ijeká ki fuˈjie, kieye, Bá dhaayyíe, ˈjiechú ubaa nyaaramchú he gál ye af nee kokúóllá. 35Máá hé Waag hí feˈdoká ekemeyoká in nyárchú, nyaarchú, ˈjiechú, Yíésu hí yie.

Currently Selected:

Márko 3: dsh

Highlight

Copy