Márko 2

Yíésu máá héljoká bisie

1Waaséél Yíésu geđi Kafarnáum hol ˈdú nadhe. Mú é ki ˈjímle fayamle ˈjien eiy ki bash chie. 2Gál burnayká hol ˈdu gáá yimie, ˈbíl hile, hol kar rie, ˈbíl af ˈdú tuutume, ˈjíig ˈbíl af đig yie. 3Yíésu hátlé gáál ˈdeeny Waaˈgiet oonisieká gál afur mare máá héljoká mú ˈdu gáá eey. 4Nyesebich aalé ˈbíl af ˈdú tuutumeká mú ál gaalí kí naat-, gaalí Yíésu ˈdu gáá eewká mán. Gaal đo ˈbíl mé hurt ađuđugul giri Yíésu hí ki yielká il gaa veere, mu hátlé lokoˈd gaa iifeká mú ál kinaal kí leesie. 5Yíésu hát gálal hí iiy yieká argeká máá giri héljoká geey, kieye, Inychú, ađaabanokú yáá ko gaa eey, yie.

6Gál nyatalaam ál kinaal ijeká tawue, kieye, 7Máállá háte ˈdeenyéél hí af yé gáá ˈdie? E mu Waag chaara! Waag tákáma gálaat ađaabano gaa egeyye, gaalí yie.

8Yíésu hé gaalí táb ˈdoˈdodheká gáál ger ki shuunne. Aalé đo gáál geey, Háteka hí hééllá ger ki taawuyyáal? 9Hé máre súm hawul man ki máállá geđia? Hé kua ˈdeđew-, ekeycheká ađaabanolle yáá ko gaa eeyyo, yú yeedhee? Ebá les gaa keʼ, lokoˈdkú éew, sí gal, yú yeedhe? 10Aaléka, yáá Iny Máádhátallá hát kansim yáálle lésalláka gálaat ađaabano gaa egewká ˈguoká dhaayyíe, muí gáál yie. Aalé mu máá giri héljoká geey, kieye, 11Ha yú ko geey, les gaa keʼ, lokoˈdkú éew, gal! yie. 12Gaal hátlé mú gaa dhaˈgameká mu đo les gaa kie, lokoˈdle eedhdhe, ényle mé nie. Gaal lulle héél af ˈdabe, kor Waag meey, kieye, Hé hatalóóllá hé kálta ke ma árginy! yie.

Yíésu máá gaalí Lévi yeget mare ká vie

13Aalé Yíésu ál kinaal gaa kie, geđi bás in nadhe. Nyésébích guđoká mú ˈdú sedhe, mu gáál he onisie. 14Aalé mu hátlé ˈgierich gaa igireká máá gibíre gugusat-, gaalí Lévi yeget-, iny Alfus mare ˈbíl gibireká gaa ija arge. Aalé Yíésu mú geey, kieye, Ye el gáá véer! yie. Lévi les gaa kie, đo mú el gaa veere.

15Waaséél Yíésu hátlé ˈbíl Levi gaa golmoteká gál gibíre gugusatká ubaa gál ađaabano ˈguoká úba ˈbíl ká hile, Yíésu ubaa lalille hol ˈgar gololte. Gál burnay hat kinaalloká úba mú el gaa veere. 16Aalé gál Farisaay #2:16 Gál Yisirayel tikiˈdééllá in gaalí gál Heberew ubaa gál Yuuˈdi yegedhe. Gálallá hé tág nyatalaam hí burnay. Gál Farisaay he gál bár kinaalka nyatalaam Yuuˈdi ki ˈgađameká. nyatalaamká héél argeká Yíésu lalille heete, kieye, Háteka máá kíchiallá gál gibíre gugusatká ubaa gál ađaabano ˈguoká hol ˈgar golmosotal? yie.

17Aalé Yíésu héél maaleká gáál geey, kieye, Gál fayyáká hé gilóny ma fediny, gál basham ˈguoká in gilóny fede. Yú ka yimíéllá, yáá gál ađaabano mánká ma ka ˈgíen, yú gál ađaabano ˈguoká ká ˈgiedhe, yie.

Yíésu gaalí af hisan ˈdeenyle heete

18Bar mé tikiˈd Yuána lalille ubaa gál Farisaayká af hite. Gálaat ká yimie, Yíésu heete, kieye, Háteka Yuána lalille ubaa gál Farisaayká lalille af higisat-, lalikú íín af ma higisanal? yie.

19Yíésu gáál ˈdéé hol ˈdú nie, kieye, Háte máá eedhdhe-, shien yieská dheegle af higisata, kor mu íín gáál hol af ija? Hé hát kinaallá muuniny. Máá eedhdhe kinaal ubaa dheegle hol af ijoka, hé af ma higisan. 20Kulich íín ali hai kí ˈdeenne, giri máá eedhdhe kinaal Waag hí gálaat hurt gaa egeetoká. Af kinaallá in gaal af higita.

21Hé máá níínní đafar káánaká toort gáá muuro-, toort đafar guđanteká ki ˈdaraanká mán. Har muí hát kinaal koyka, toort giri kaanaká đo đafar guđanteká hai gaa ˈgite, đafar đo súm hai ˈgiˈgite. 22Hé máá níínní ˈduuny vinna kaana-, hátle ma kárinyká orgom guguđandheká fafuoká mán. Har gaalí hát kinaal koyka, ˈduu he kareka, orgom đo eiyyo fufuadhe, orgom ubaa ˈduunyle đo hai ˈdeenedhe. Hé hát kinaallá muuniny, ˈduuny vinna kaanaká orgomlé kaanaká gaalí fafaa, muí yie.

Yíésu ííni Kúlích Hef ˈGisanká mé ki yaalla

23Kúlích Hef ˈGisanká tikiˈd Yíésu ubaa lalille lés siindi mare hurt gáá nadhe. Mú lalille ˈgíéríchlé gaa igireká sííndí met af ki ˈgieˈgite. 24Gál Farisaayká Yíésu heete, kieye, Bá dháash! Háteka gálal Kúlích Hef ˈGisanká hé nyátálkúnnoka ki ma ekemenyká ekeyal? yie.

25Yíésu gáál ˈdéé hol ˈdú nie, kieye, It hé ˈDáwuˈd af giri ubaa sheelle ger hí gaa boloyká hí ekeyká Warˈgat Waaˈgiet ma gaa túony, 26giri mu af giri Abiadhar máá méte suoryoká onnoyká ˈBíl Waaˈgiet náble hile-, balasha gaalí Waag taak ki iđie-, nyátálka gál suoryoká tákámle hí kokuoká koey-, tá sheelle úba shieká? muí yie.

27Yíésu geđi gáál geey, kieye, Kúlích Hef ˈGisanká gálaato ki midhínta, in Waag hí taak koyye. Kúlích kinaallá íín hé gálaat ma ˈdú midhanany. 28ˈDaa kinaallá ˈdugaka in Iny Máádhat Kúlích Hef ˈGisanká guchle ˈgaa, muí yie.

Currently Selected:

Márko 2: dsh

Highlight

Copy