Márko 14

Yíésu min hí salab mé shugudiche

1Aaléka, ˈjila máá ˈgasso-, urru-, Waaˈgietká hí gáál ˈdug gaa nadheká ubaa ˈjila balashalle máá hí maat fafuo-, mánká rámlé ka ˈgisateká naama. Gál guguđo-, suoryoká ubaa gál nyatalaamká ˈgíérích điđamo-, he Yíésu ki ˈgiiliˈgaw-, tá mú ki yegeská hol gaa ˈgeˈgedhe. 2Gaal hol geey, kieye, Mú ha ke rám ˈjiláállá gaa ˈgiliˈgâny. Mú ke ˈgiliˈgayka, ali os haí laama, gaalí yie.

3Aalé Yíésu hátlé ény Bedhene gaa ije-, máá héle haru hí fame-, gaalí Símon yegie mare ˈbílle gaa golmoteká, min mé tikiˈd sáláb him hí ilish-, usiyyo-, gaalí nárˈdo yeget mare ˈbíl kí hille. Đudmit mé gaa silliche, Yíésu salab mé ˈdú fafiyye.

4Aalé gál ál kinaal ijeká ˈdáá tikiˈd idhane, hol af les ki geey, kieye, Sáláballá kor meete he ˈdú manyjayye? 5Sáláballá onnônyka gaalí bíre máádhat hí war tikiˈd gaa aargiroká ka yían-, tá gaalí gál he maamanká eiy ki mumúrinyka kalat, gaalí yie. Gaal đo min ki lole.

6Aalé Yíésu gáál geey, kieye, Min hayyíe, háteka hí min hawul ˈgeˈgetéel? Minnééllá hé midhabká ye ki ekeyche, yie. 7Gál he maamanká bar lullé hí hol af iđa. Kúlích mákárta-, hí feˈdoká he haí shigicha. Tá yú yáá bar lulle ke hol af ma iđiny. 8Min héllé uˈdoká he ekeyche. Min yú hátlé les ma hílinyká ye salab shugudiche. 9Yú hí hé ˈdúwaká geeye, les geer lulle gaalí Fayam chia Midhaballá gaa ˈdiyeenká, hé minnééllá hí ye ki ekeychééllá úba gálaat ha gaalí geđia, giri min table gálaat ma gaa baađanyká, Yíésu hí gáál yie.

10Yíésu lalillé tomon a naamaká, tá máá gaalí Yúúˈdas Iskáryot yegetká gál guguđo-, suoryoká ˈdú sedhe, mu hát he Yíésu gáál gíl geer gaa kakawká gáál hol geey. 11Gál guguđo-, suoryoká héél maaleká ger hí gaa meedhe. Gaal bíre mú ki gugusoká ˈdeenyle mú af iđie. Yúúˈdas aalé ˈgíérích midhab-, Yíésu gál suoryoká gíl geer gaa kakawká hol gaa ˈgeˈgedhe.

Yíésu ubaa lalille hol ˈgar gololte

12ˈJila balashalle máá hí maat fafuo-, mánká ubaa ˈjila máá ˈgasso-, urru-, Waaˈgietká hí gáál ˈdug gaa nadheká kúlíchlé erkob-, gaalí aany wálaká gaa yegeská ali kí ˈdiiyye. Aalé Yíésu lalille hí heete, kieye, Ále nyí seenne, nyí ko ˈjila gólólle met tág nanniyya? yie.

13Aalé mu lalille naam ali fie, gáál geey, kieye, ˈJien sedhíe, ál kinaal mááyáb ibil bie ka ˈguoká hollo hí hol aargiˈda, mú el gaa veerée. 14ˈBíl muí hiloká máálle yietíe, Máá gáál he oonisuoká kieye, ˈBíl dheeˈgo-, yú ubaa lalichú nyí ˈjila gólólle ki golmosotoká hé eeke? yiedhíe. 15Mu ˈbíl guđo-, úr yaal-, gaalí geer gaa seeyká haí aargisia. ˈBíl kinaallá gólol tág gaa náa, Yíésu hí gáál yie.

16Aalé gál láliká é mé nieká, he lullé Yíésu hí geeyká tagano ˈgee. Gaal đo ˈjila gólólle tág koy.

17Aadh gaanateká Yíésu ubaa lalillé tomon a naamaká hol af ija, golmoto. 18Gaal hátlé golmoteká Yíésu gáál geey, kieye, Yú hí hé ˈdúwaká geeye, it ke hol állá ˈgar golmosotallá mú tikiˈd gál ye oos ˈguoká gíl geer hai ye gaa kakaa, yie.

19Gáál đo ger hí gaa ˈdeenedhe, gaal hát taataká mú heegete, kieye, He onnônyka hé yú muuninyáte? yiegie.

20Yíésu gáál ˈdéé hol ˈdú nie, kieye, He it tomon a naamáállá, tá máá nyí hol ˈdaat tikiˈd gíl ˈgar ki gagatáállá. 21Iny Máádhat ˈdeeny héle gaalí veereká he ˈgíéríchle naadha. Tá máá Iny Máádhat gál hí oos ˈguoká gíl geer gaa kakawká, ebá he hí ki ˈdéen! Máá kinaallá úba ma ká ˈdalaanka kalat, Yíésu hí yie.

22Gaal hátlé golmoteká Yíésu balashá eedhdhe, Waag gielmít hol ˈdú nie, balashá eiy ˈgieˈgie, lalille shie, gáál geey, kieye, Hééllá shuunníe, hééllá he gónchú, yie.

23Aalé mu kulu ˈduuny vinna hí gaa ijeká eedhdhe-, Waag gielmít hol ˈdú nieká, gáál kúlu shie. Gaal lulle kúlu he gaa ˈjie.

24Mu gáál geey, kieye, Hééllá he fás chia he hol af iđiny-, gál burnayká ˈdaalle ki okodmootká. 25Yú hí hé ˈdúwaká geeye, yáá geđi saano vinnáállá ˈduunyle ma igiminy, ˈdaab kúlích yú ˈduuny vinna kaanaká ál Guch Waaˈgietká ma gaa înyká, yie.

26Aalé gaal áár ˈdoyká đo yíé ˈdie, Gúm Saano Salabká álle mé nie.

Yíésu Bétiro geey, Kúún hai ye gaa faalanna, mú yie

27Aalé Yíésu gáál geey, kieye, Itín lulkícho in kar haí ye ká ˈdaraanna. Hééllá he hát Waag hí warˈgatle gaa hote-, giri mu kieye,

Yú máá wála ˈdeˈdeenká ha yeese,

wala íín eiy hai baađaa,#14:27 Sakaría 13:7

muí yieká.

28Kor yú uushich yé gáá ˈdieka met haí naadha, Galilááya ha seeme, Yíésu hí yie.

29Aalé Bétiro Yíésu geey, kieye, Har úba gaal lulle ko in kar ká ˈdaneka, yú yáá ko in kar ma ká ˈdaraminy, yie. 30Yíésu đo Bétiro geey, kieye, Yú ko hé ˈdúwaká geeye, chúúrééllá lúg hátlé a naam ma ki ˈdáinyká, kúún a seđe ye gaa faalanna, Yáá mú muog, ha cheedhe, Yíésu hí mú yie.

31Bétiro súm ˈdéé af ki gogoy, kieye, Yáá gon ko ma gaa faalminy, har úba ke hol ˈgar kufunanka! yie. Gál lálíítí úba hát tikiˈdééllá Yíésu yie.

Yíésu Geđesémane Waag gaa vite

32Aalé gaal ál gaalí Geđesémane yeget mare ki fame. Yíésu lalille geey, kieye, Állá ka yíéđía, yú sedhe, Waag vita, yie. 33Aalé mu Bétiro, Yákob, tá Yuána gáál tól gaa eedhe. Yíésu geer hí súm gaa ˈdeenedhe, tawuny hí ˈjiiyye. 34Mu gáál geey, kieye, Yáá tág geer ye gaa ˈdeenedhe, kúfach abala ˈdoy. Állá ka yíéđía, ˈdeyyée, yie.

35Aalé mu biiy met á níínni mare ki sedhe, abúún ˈdíínie, Waag vite, giri manyjasiny biiy met gaa iđóóllá kálmaréél il hí mú ma aargirinyká. 36Mu kieye, Ába, Baabá, he lulle kó uˈdo, kulu manyjasinyallá ye gaa éeb. Tá he hát yú fedoká hai yéen, hí hát kuuní feˈdoká yeet, yie.

37Aalé mu hol ká nadheká, gaal ram gaa iifa. Mu Bétiro geey, kieye, Símon, kúún ramo gaa iiyya? Kó hát úba aadh ˈgas tikiˈd biiy gaa ˈdeeyyoká mân? 38In eiy ˈdeeyyíe, Waag vitíe, giri hí hé ˈdeewká ekenyle hol ma kí haađinyká. Hodhin hí he feˈde, kor gon hí he má uˈduáte, muí gáál yie.

39Aalé Yíésu geđi hol nadhe, Waag visanlé biimeká ááy gaa nie. 40Aalé mu geđi gáál hol ˈdu gáá nadheká gáál ram hí ˈdú ˈjiiy, gaal rafama. Gaal ˈdéé hót mú hol ˈdú nannuoká ˈdabe.

41Aalé mu gíl ki seđeká hol ká nadheká gaal ram gaa iifa. Mu đo gáál geey, kieye, Hátlé hí hefersete-, hí rayyekâ? Aalé he hé đue, aadh ˈgas hé ali kí ˈdiiyye. Ebá dhaayyíe, Iny Máádhat gál ađaabano ˈguoká gíl geer ha gaalí gaa kakaa. 42Les gaa kée, kí siet. Máá gál ye oos ˈguoká ye gíl geer gaa kakawká hé ká ˈjobondhe, yie.

Yíésu gaalí ˈgiliˈgay

43Yíésu hátlé ˈdéé hogodheká, Yúúˈdas giri mú lalillé tomon a naamaká mú tikiˈd onnoyká, nyésébích fado orfoká ubaa shar ˈguoká ˈgaa, ali kí ˈdie. Gál kinaallá gál guguđo-, suoryoká ubaa gál nyatalaamká, tá gál káruká hí ali ká fie.

44Máá Yíésu gál hí oos ˈgieká gíl geer gaa kakawallá íín kisso yaalmit gaalí Yíésu ki kimisatká gáál geey, kieye, Máá yú aˈdíne ˈdungoká mu hé kinaallá, mú ˈgiliˈgáa. Mú hí egeeteká mú hát ˈdabaanká chiˈdíe, gáál yie. 45Yúúˈdas ali kí ˈdieká Yíésu ˈdú sedhe, mú vie, Máá gáál he oonisúóllo! yie, đo mú aˈdíne ˈdunge. 46Aalé gaal mú ˈgiliˈgay.

47Yíésu lalillé ál kinaal ˈgieká mú tikiˈd faaˈdlé órofká ká sillite, máá méte suoryoká gédéchle net gaa sare.

48Aalé Yíésu gáál geey, kieye, Hí ká chimie-, hí fado ubaa shar ká chirate-, hí ye ˈgiliˈgayyéél, yú hé máá buraa léká? 49Bar lulle yú ˈBíl Waaˈgiet gálaat he gaa oonisuoká afo ke hol ije, tá har hí ye ál kinaal má gaa ˈgiliˈganya? Aalé káána hé Warˈgat Waaˈgiet hí hoteká hátlé kinaallá ˈdúúw hai yeedhe, yie. 50Aalé Yíésu lalille hí hay, gaal đo ali gaa ˈdoˈdodhdhe.

51Ál kinaal máá ruorich đafar ˈdú laaladhdhe mare Yíésu el gáá veere. Gaal máá kinaal ká saabite. 52Mu gáál đafar af ki gadhe, búr ˈdodhdhe.

Máá méte suoryoká Yíésu ˈdéé heete

53Gaal Yíésu máá méte suoryoká ˈdú eey. Aalé gál guguđo-, suoryoká ubaa gál káruká, tá gál nyatalaamká lulle ál kinaal hol ˈdu gáá yimie. 54Bétiro íín hé tagéétíá sie, Yíésu el gaa igire, ˈjíig máá méte suoryoká nyáláárlé hile, nááb gaa yíéđie. Mu ubaa gál ál kinaal ˈdeˈdemeká hol ˈjiet ˈgar ˈbuute.

55Aalé gál guguđo-, suoryoká ubaa ar ˈdeem mumuˈdoká lulle gál Yíésu ˈdeenteká hol gaa ˈgeˈgedhe, giri ˈdensen kinaal Yíésu ˈdú yegeská. Tá gaal hé mú ˈdú yegeská má argo. 56Gál burnayká ˈdeeny hódhoká huogodhe, Yíésu luut kaay, kor gáál hé ˈdee hí hol ma ˈdú fáminy, gáál ˈdee hí hol ká eiyye.

57Aalé gáál ˈdáá tikiˈd les gaa kie, ˈdeeny hódhoká huogodhe, kieye, 58Nyíín nyí maalleká máállá kieye, ˈBíl Waaˈgiet gaalí gíl ki ˈdissééllá ha yú ˈgieˈgia. Ram seđ ˈbíl máá hí gíl ki ˈdiiso-, mánká ha yú gaa ˈdiisa, he yie, gaalí yie. 59Hát tikiˈdééllá gáál hé ˈdee hí hol ma ˈdú fáminy.

60Aalé máá méte suoryoká les gaa kie, gáál hurt ki ˈdie, Yíésu yiete, kieye, Kó ˈdeeny hol ka nanniyyoká mân? Hé ˈdaakúka gálallá hí hodhééllá, kó hé hol gáá nanniyyoká mân? yie. 61Yíésu íín taalle shab yie, hé ˈdeeny níínní gáál hol ˈdú nieká mán.

Aalé máá méte suoryoká geđi mú heete, kieye, Kúún he Messíya, Iny Waag gaalí memeyokâ? yie.

62Aalé Yíésu kieye, He yú.#14:62 Yíéˈdími 3:14 Itín Iny Máádhátallá Waag fargogínt lulle ˈgayyoká gíl ˈdaa naaniet yíéđian-,#14:62 Warˈgat Arram 110:1 tá nyáˈdow urruká kí yiimetká haí aargiˈda,#14:62 ˈDániel 7:13 yie.

63Máá méte suoryoká héél maaleká đo idhane, hol đafar eiy ki fue, kieye, ˈDeeny éíy máre geđi ki egese? 64It hát mu Waag chaareká maallê? Hééllá háte hí ká dhaayche? yie. Aalé gaal lulle af hí hol ˈdú fame, giri mú gaalí yegeská.

65Aalé gáál ˈdáá tikiˈd mú sillam ˈdú faafie, mú in đafar gaa hidhe, mú tutumano ki tune, kieye, Máá ko ˈdoyká ebá ká hot! mú yie. Gál ˈBíl Waaˈgiet ˈdeˈdemeká úba mú eedhdhe, mú tune.

Bétiro Yíésu gaa falme

66Aalé Bétiro hátlé nááb gaa ijeká hada máá méte suoryoká hujich ki nannuo mare, ini tikiˈd hí láá ká naate. 67Ini mu ˈjiet ˈbuˈbuta-, mú argiyyeká, mú dhaayche, kieye, Kúún úba Yíésu Nasaretallá ití hol ˈgayye, chie.

68Aalé Bétiro falme, kieye, Hé hogotóóllá yáá muog, kor úba yáá eiy ma náásan yie, đo nááb gáá kie, nyáláár káráfle álle ki ˈdie. Ál tikiˈde kinaal lúg đo ˈdayche.

69Ini giriká Bétiro argiyyeká gál ál kinaal ˈgieká geđi geeyche, kieye, Hééllá úba mú máállé, chie. 70Bétiro geđi falme.

Waaséél gál ál kinaal ˈgieká mú geey, kieye, Kúún gon gál kinaallá máállé, ˈdaa giri kúún máá Galilaayaká, yie.

71Bétiro falme, Waag ˈdodhdhe, kieye, Máá hí hogotóóllá gon yáá muog, yie.

72Aalé Bétiro hátlé ˈdeeny kinaal af ká ˈgieká lúg geđi gíl ki naamaká ˈdayche. Bétiro ˈdeeny Yíésu hí geey-, giri mu kieye, Lúg hátlé gíl ki naamaká ma ki ˈdânyká, kúún a seđ ha ye gaa faalanna, muí yieká, hí táb ká ˈjie, đo imiro hí gáá okoˈde, buoy.

Currently Selected:

Márko 14: dsh

Highlight

Copy