MARCOS 13
13
Gitagna ni Jesus ang Pagkagun-ob sa Templo
(Mat. 24:1-28; Luc. 21:5-24)
1Sa paggula ni Jesus sa Templo, usa sa iyang mga tinun-an miingon kaniya, “Tan-awa, Magtutudlo, pagkadagko niining mga batoha ug pagkaanindot niining mga balaya!” 2Ug si Jesus miingon, “Nakita ba nimo kining dagkong mga balay? Dinhi wala unyay mahibilin nga usa ka bato nga nagpatong sa bato nga dili tumpagon.”
Mga Kalisdanan ug mga Paglutos
3Samtang naglingkod siya sa Bungtod sa mga Olibo atbang sa Templo, sa tago nangutana kaniya sila si Pedro ug si Santiago ug si Juan ug si Andres, 4“Tug-ani kami, kanus-a man kini mahitabo, ug unsa man ang ilhanan nga kining tanan hapit na matuman?” 5Unya si Jesus misugod sa pag-ingon kanila, “Pagbantay kamo nga walay magpahisalaag kaninyo. 6Daghan unya ang motungha nga magdala sa akong ngalan, ug mag-ingon, ‘Ako mao ang Cristo!’ Ug daghan ang ilang pahisalaagon. 7Ug inigkadungog ninyo ug mga gubat ug mga dungogdungog mahitungod sa mga gubat, ayaw kamo kalisang kay kinahanglan gayod kini nga mahitabo, apan dili pa kini mao ang kataposan. 8Kay makiggubat ang usa ka nasod batok sa laing nasod, ug ang usa ka gingharian batok sa laing gingharian. Mahitabo ang mga linog sa nagkalainlaing mga dapit, mahitabo ang mga gutom. Apan kini sinugdanan pa lamang sa mga kasakit.
9“Apan pagbantay kamo sa iyong kaugalingon kay kamo ilang itugyan ngadto sa mga hukmanan, ug kamo ilang bunalan sulod sa mga sinagoga, ug kamo moatubang sa mga gobernador ug sa mga hari tungod ug alang kanako, aron sa pagpamatuod ngadto kanila. 10Ug ang Maayong Balita kinahanglang iwali una ngadto sa tanang kanasoran. 11#Mat. 10:17-20; Luc. 12:11-12. Sa dihang ila kamong dad-on ug itugyan ngadto sa mga hukmanan, ayaw ninyo kabalak-ing daan kon unsa ang inyong isulti apan isulti ninyo ang bisan unsa nga ihatag kaninyo niadtong taknaa, kay dili kamo mao ang magsulti kondili ang Espiritu Santo. 12Ang igsoon magtugyan sa iyang igsoon ngadto sa kamatayon, ug ang amahan magtugyan sa iyang anak. Ug ang mga anak mosupil sa ilang mga ginikanan ug ipapatay sila. 13#Mat. 10:22. Unya dumtan kamo sa tanan tungod sa akong ngalan, apan ang molahutay hangtod sa kataposan maluwas.
Ang Makalilisang nga Talan-awon
14 #
Dan. 9:27; 11:31; 12:11. “Apan inigkakita ninyo sa makalilisang nga pasipala nga gipahimutang diha sa dapit diin dili kini angay (pasabta niini ang nagbasa), ang mga atua sa Judea pakagiwa ngadto sa kabukiran. 15#Luc. 17:31. Siya nga anaa sa atop ayaw na pakanaoga o pasudla sa iyang balay aron sa pagkuha ug bisan unsa, 16ug siya nga anaa sa uma ayaw na pabalika aron sa pagkuha pa sa iyang kupo. 17Pagkaalaot gayod sa mga mabdos ug sa mga masuso niadtong mga adlawa! 18Pag-ampo kamo nga dili unta kini mahitabo sa panahon sa tingtugnaw. 19#Dan. 12:1; Pin. 7:14. Kay niadtong mga adlawa aduna unyay mga kasakitan nga wala pa mahitabo sukad sa sinugdan sa kabuhatan nga gibuhat sa Dios hangtod karon, ug nga dili na gayod kini mahitabo pa. 20Ug kon ang gidaghanon niadtong mga adlawa wala pa kunhori sa Ginoo, wala untay tawong maluwas, apan tungod sa mga pinili nga iyang gipili, iyang gikunhoran kadtong mga adlawa. 21Ug unya kon adunay moingon kaninyo, ‘Tan-awa, ania ang Cristo!’ o ‘Tan-awa, atua ra siya!’ ayaw gayod kamo pagtuo niini. 22Kay motungha ang mga mini nga Cristo ug mga mini nga propeta ug magpakita ug mga ilhanan ug mga katingalahan aron sa pagpahisalaag, kon mahimo, kanila nga mga pinili. 23Apan pagbantay kamo, gitug-anan ko na kamong daan sa tanang mga butang.
Ang Pag-abot sa Anak sa Tawo
(Mat. 24:29-35, 42-44; Luc. 21:25-36)
24 #
Isa. 13:10; Joel 2:10, 31; 3:15; Pin. 6:12;
Isa. 13:10; Ezek. 32:7. “Apan nianang mga adlawa, human sa maong kasakitan ang adlaw mongitngit ug ang bulan dili na mohatag sa iyang kahayag, 25#Isa. 34:4; Pin. 6:13; Joel 2:10. ug ang mga bituon mangatagak gikan sa kahitas-an, ug matay-og ang mga gahom sa kalangitan. 26#Dan. 7:13; Pin. 1:7. Makita unya ang Anak sa Tawo nga magsingabot nga sinapwang sa mga panganod uban sa dakong gahom ug himaya. 27Ug sugoon niya ang mga anghel, ug tigomon nila ang iyang mga pinili gikan sa upat ka hangin, gikan sa kinatumyan sa yuta hangtod sa kinatumyan sa langit.
Ang Pagtulun-an Gikan sa Kahoyng Igera
28“Gikan sa kahoyng igera, tun-i ninyo kining usa ka sanglitanan: sa diha nga mahumok na ang iyang sanga ug manalingsing na, masayran ninyo nga ang ting-init duol na. 29Mao usab, inigkakita ninyo nga mahitabo kining mga butanga, inyong masayran nga duol na siya, sa mga ganghaan gayod. 30Sa pagkatinuod, sultihan ko kamo, nga sa dili pa mahanaw kining kaliwatana, mahitabo gayod kining tanan. 31Ang langit ug ang yuta mangahanaw, apan ang akong mga pulong dili gayod mahanaw.
Walay Nasayod sa Takna sa Iyang Pagbalik
32 #
Mat. 24:36. “Apan mahitungod sa maong adlaw o takna, walay nasayod niini, bisan pa ang mga anghel sa langit o ang Anak, gawas sa Amahan lamang. 33Pagbantay, pagtukaw,#13:33 pagtukaw: Ang ubang karaang sinulat nagdugang ug pag-ampo. kay wala kamo masayod sa panahon nga mahitabo kini. 34#Luc. 12:36-38. Sama kini sa usa ka tawo nga mobiya sa iyang balay aron mopanaw ug maghatag ug kagahom ngadto sa iyang mga ulipon, matag usa diha sa iyang kaugalingong buluhaton, ug magsugo sa bantay sa pultahan aron sa pagtukaw. 35Busa pagtukaw kamo kay wala kamo masayod kon kanus-a moabot ang agalon sa panimalay, sa gabii ba o sa tungang gabii o sa tingtuktugaok ba sa manok o sa kabuntagon ba hinuon, 36kay tingali unya ug mokalit lamang siya pag-abot ug makaplagan kamo niya nga nangatulog. 37Ug ang akong gisulti kaninyo isulti nako sa tanan: Pagtukaw kamo.”
Currently Selected:
MARCOS 13: ABCEB
Highlight
Share
Copy
Want to have your highlights saved across all your devices? Sign up or sign in
©Philippine Bible Society, 2011
