MIKEAS 6
6
Ang Mulo sa Ginoo Batok sa Israel
1Pamati kamo sa gisulti sa Ginoo:
Tindog, ipahayag sa kabukiran ang imong sumbong
ug ipadungog sa kabungtoran ang imong tingog.
2Pamati kamo, mga kabukiran, sa pagpakigbangi sa Ginoo,
ug kamo nga malig-ong mga patukoranan sa kalibotan;
kay ang Ginoo adunay pagpakigbangi sa iyang katawhan,
ug siya makigbisog sa Israel.
3“O akong katawhan, unsay akong nabuhat kanimo?
Diin man ako makapalaay kanimo? Tubaga ako!
4 #
Ex. 12:50-51;
Ex. 4:10-16;
Ex. 15:20. Kay gikuha ko ikaw gikan sa yuta sa Ehipto,
ug gilukat ko ikaw gikan sa balay sa pagkaulipon;
ug gipadala nako kanimo si Moises,
si Aaron, ug si Miriam.
5 #
Num. 22:2–24:25;
Jos. 3:1–4:19. O akong katawhan, hinumdomi unsa ang gilaraw ni Balak nga hari sa Moab,
ug kon unsa ang gitubag kaniya ni Balaam nga anak ni Beor
ug unsa ang nahitabo gikan sa Sitim ngadto sa Gilgal,
aron kamo mahibalo sa pagkamatarong sa Ginoo.”
Ang Gikinahanglan sa Ginoo
6“Uban sa unsa man nga ako maodto sa atubangan sa Ginoo,
ug moyukbo sa atubangan sa halangdon nga Dios?
Moduol ba ako kaniya uban sa mga halad nga sunogon,
ug uban sa mga nating baka nga tagsa ka tuig ang kagulangon?
7Mahimuot ba ang Ginoo sa mga linibo ka laking karnero,
uban sa napulo ka libo ka suba sa lana?
Ihatag ba nako ang akong kamagulangang anak tungod sa akong kasal-anan,
ang bunga sa akong lawas tungod sa sala sa akong kalag?”
8Gipakita na niya kanimo, O tawo, kon unsa ang maayo;
unsa ba ang gikinahanglan sa Ginoo kanimo
kondili ang pagbuhat sa hustisya ug ang gugmang walay paglubad
ug ang paglakaw nga mapaubsanon uban sa imong Dios?
9Ang tingog sa Ginoo nagtuaw ngadto sa siyudad—
ug kaalam ang pagkahadlok sa imong ngalan,
“Pamati, O banay ug katilingban sa siyudad!#6:9 kalilingban sa siyudad: Sa Hebreo, kinsa ang gitudlo niini.
10Malimtan ba nako ang mga bahandi sa kadaotan diha sa balay sa daotan,
ug ang diyotayng taksanan nga dulumtanan?
11Ipakamatarong ba nako ang tawo nga may tikasan nga mga timbangan,
ug may bag sa mga malimbongon nga timbang?
12Ang imong mga tawo nga adunahan napuno sa kabangis;
ang imong mga lumulupyo nagsulti ug bakak,
ug ang ilang dila limbongan sulod sa ilang baba.
13Busa ako nagsugod sa paghampak kanimo,
naghimo kanimo nga biniyaan tungod sa imong mga sala.
14Magkaon ikaw, apan dili matagbaw,
ug aduna unyay kagutom diha sa imong kinasuloran;
ikaw magtipig apan dili makatigom,
ug ang imong matigom ihatag nako sa espada.
15Magpugas ikaw, apan dili makaani;
ikaw magpuga sa mga olibo, apan dili ikaw makadihog sa imong kaugalingon ug lana;
ikaw magpuga sa paras, apan dili makainom ug bino.
16 #
1 Hari 16:23-28;
1 Hari 16:29-34; 21:25-26. Kay imong gituman ang mga lagda ni Omri,
ug ang tanang mga buhat sa balay ni Ahab;
ug ikaw naglakaw diha sa ilang mga tambag;
aron ikaw himoon nako nga biniyaan, ug ang mga nagpuyo niini talamayon.
Busa kamo mag-antos sa mga pagtamay sa mga katawhan.”#6:16 mga katawhan: Sa Hebreo, akong katawhan.
Currently Selected:
MIKEAS 6: ABCEB
Highlight
Share
Copy
Want to have your highlights saved across all your devices? Sign up or sign in
©Philippine Bible Society, 2011
