MATEO 4
4
Ang Pagtintal kang Jesus
(Mar. 1:12-13; Luc. 4:1-13)
1 #
Heb. 2:18; 4:15. Unya si Jesus gidala sa Espiritu ngadto sa kamingawan aron tintalon sa yawa. 2Ug siya nagpuasa sulod sa 40 ka adlaw ug 40 ka gabii ug human niini siya gigutom. 3Unya miduol ang maninintal ug miingon kaniya, “Kon ikaw Anak sa Dios, sugoa kining mga bato aron mahimong mga pan.” 4#Deut. 8:3. Apan siya mitubag, “Nasulat na,
‘Ang tawo mabuhi dili sa pan lamang
kondili sa matag pulong nga mogula sa baba sa Dios.’ ”
5Unya ang yawa midala kaniya ngadto sa siyudad nga balaan ug gitungtong siya sa kinahabogang bahin sa templo 6#Sal. 91:11-12. ug giingnan, “Kon ikaw Anak sa Dios, ambak ngadto sa ubos kay nasulat kini,
‘Magsugo siya sa iyang mga anghel mahitungod nimo,’
ug
‘Sa ilang mga kamot sapnayon ikaw nila,
aron ang imong mga tiil dili maigo sa bato.’ ”
7 #
Deut. 6:16. Si Jesus miingon kaniya, “Nasulat usab kini, ‘Ayaw tintala ang Ginoo nga imong Dios.’ ” 8Unya gidala na usab siya sa yawa ngadto sa usa ka habog kaayong bukid ug kaniya iyang gipakita ang tanang gingharian sa kalibotan ug ang ilang kahimayaan, 9ug ang yawa miingon kaniya, “Kining tanan akong ihatag kanimo kon ikaw moluhod ug mosimba kanako.” 10#Deut. 6:13. Unya si Jesus miingon kaniya, “Pahawa, Satanas! Kay nasulat kini,
‘Maoy simbaha ang Ginoo nga imong Dios,
ug siya lamang ang alagara.’ ”
11Unya ang yawa mibiya kaniya ug dihay mga anghel nga miabot ug mialagad kaniya.
Ang Pagsugod ni Jesus sa Iyang Pagpangalagad
(Mar. 1:14-15; Luc. 4:14-15)
12Ug sa pagkadungog niya nga si Juan gidakop, mipalayo siya ngadto sa Galilea.#Mat. 14:3; Mar. 6:17; Luc. 3:19-20. 13#Juan 2:12. Mibiya siya sa Nazaret ug mipuyo sa Capernaum sa daplin sa lanaw, sa kayutaan sa Zabulon ug Neftali. 14Sa ingon natuman ang gisulti pinaagi sa propeta nga si Isaias nga nag-ingon,
15“Ang yuta sa Zabulon ug yuta sa Neftali,
padulong sa dagat, tabok sa Jordan,
Galilea sa mga Gentil—
16 #
Isa. 9:1-2. ang mga tawo nga nagpuyo taliwala sa kangitngit
nakakita ug dakong kahayag,
ug kanila nga nagpuyo sa yuta ug sa landong sa kamatayon
midan-ag ang kahayag.”
17 #
Mat. 3:2. Sukad niadtong higayona si Jesus misugod sa pagwali nga nag-ingon, “Paghinulsol kamo kay ang gingharian sa langit duol na.”
Ang Pagtawag ni Jesus sa Upat ka Mangingisda
(Mar. 1:16-20; Luc. 5:1-11)
18Samtang naglakaw siya sa daplin sa Lanaw sa Galilea, nakita niya ang duha ka magsoon, si Simon nga ginganlan ug Pedro ug si Andres nga iyang igsoon nga namukot sa lanaw kay mga mananagat man sila. 19Ug siya miingon kanila, “Sunod kamo kanako ug himoon ko kamong mga mananagat ug tawo.” 20Dihadiha gibiyaan nila ang ilang mga pukot ug mikuyog sila kaniya. 21Ug sa nagpadayon siya paglakaw sa unahan, nakita niya ang laing duha pa ka magsoon nga lalaki: si Santiago nga anak ni Zebedeo ug si Juan nga iyang igsoon, diha sila sa ilang sakayan uban kang Zebedeo nga ilang amahan, nag-ayo sa ilang mga pukot, ug gitawag niya sila. 22Dihadiha gibiyaan nila ang ilang sakayan ug ang ilang amahan ug mikuyog kaniya.
Gialagaran ni Jesus ang Usa ka Dakong Panon sa Katawhan
(Luc. 6:17-19)
23 #
Mat. 9:35; Mar. 1:39. Milibot si Jesus sa tibuok Galilea ug nagtudlo sulod sa ilang mga sinagoga ug nagwali sa Maayong Balita mahitungod sa gingharian ug nag-ayo sa tanang balatian ug tanang sakit sa katawhan. 24Busa ang iyang kabantog mikaylap sa tibuok Siria. Ug gidala nila ngadto kaniya ang tanang masakiton, ang mga gitakboyan sa nagkalainlaing mga sakit ug mga balatian, mga gidemonyohan, mga patulon ug mga paralitiko, ug iyang giayo sila. 25Ug misunod kaniya ang dagkong panon sa katawhan gikan sa Galilea ug sa Decapolis ug sa Jerusalem ug sa Judea ug gikan sa mga dapit tabok sa Jordan.
Currently Selected:
MATEO 4: ABCEB
Highlight
Share
Copy
Want to have your highlights saved across all your devices? Sign up or sign in
©Philippine Bible Society, 2011
