MGA MAGHUHUKOM 15
15
1Wala madugay, panahon sa ting-ani sa trigo, si Samson milakaw aron sa pagduaw sa iyang asawa uban ang usa ka nating kanding, ug siya miingon, “Sudlon nako ang akong asawa sa lawak.” Apan ang amahan sa babaye wala motugot kaniya sa pagsulod. 2Ug ang iyang amahan miingon, “Ako sa pagkatinuod naghunahuna nga ikaw nagdumot gayod kaniya busa gihatag nako siya sa imong kauban. Dili ba ang iyang manghod nga babaye labaw pang maanyag kay kaniya? Kuhaa siya ingon nga puli.” 3Ug si Samson miingon kanila, “Niining panahona ako walay sala sa mga Filistihanon kon ako maghimo kanila ug daotan.” 4Ug si Samson milakaw ug nanakop ug tulo ka gatos ka milo ug mikuha ug mga sulo ug gihiktan sa tinagurha ang ilang mga ikog ug gibutangan ug sulo sa taliwala sa duha ka ikog. 5Ug sa diha nga gidagkotan na niya ang mga sulo, iyang gibuhian ang mga milo ngadto sa mga nagbarog nga mga trigo sa mga Filistihanon ug nasunog ang tinapok nga inani ug ang nagbarog nga mga trigo ug lakip usab ang mga kaolibohan. 6Unya ang mga Filistihanon miingon, “Kinsay naghimo niini?” Ug sila miingon, “Si Samson nga umagad sa taga-Timna tungod kay gikuha sa iyang ugangan ang asawa ni Samson ug gihatag ngadto sa iyang kauban.” Ug ang mga Filistihanon mitungas, ug gisunog sa kalayo ang babaye ug ang iyang amahan. 7Ug si Samson miingon kanila, “Kon mao kini ang inyong buhaton, ipanumpa nako nga manimalos ako kaninyo ug human niana mohunong na ako.” 8Ug gisulong niya sila ug daghan ang iyang gipangpatay ug milugsong siya ug mipuyo sa liki sa pangpang sa Etam.
Gibuntog ni Samson ang mga Filistihanon
9Unya ang mga Filistehanon mitungas ug nagkampo sa Juda ug misulong sa Lehi. 10Ug ang katawhan sa Juda miingon, “Nganong nanungas kamo batok kanamo?” Ug sila miingon, “Mianhi kami aron sa paggapos kang Samson, sa pagbuhat kaniya sumala sa iyang gibuhat kanamo.” 11Unya tulo ka libo ka tawo sa Juda milugsong ngadto sa langob sa pangpang sa Etam ug miingon kang Samson, “Wala ba ikaw mahibalo nga ang mga Filistihanon mao ang nagmando kanato? Unsa man kining imong gibuhat kanamo?” Ug siya miingon kanila, “Sumala sa ilang gibuhat kanako, mao usab ang akong gibuhat kanila.” 12Ug sila miingon kaniya, “Kami mianhi sa paggapos kanimo aron ikatugyan ikaw namo ngadto sa kamot sa mga Filistihanon.” Ug si Samson miingon kanila, “Panumpa kanako nga dili gayod kamo mopatay kanako.” 13Ug sila miingon kaniya, “Dili, gaposon lamang ikaw namo ug itugyan ngadto sa ilang mga kamot, dili ikaw namo patyon.” Ug ilang gigapos siya sa duha ka bag-ong pisi ug gidala siya gikan sa pangpang.
14Pag-abot niya sa Lehi, ang mga Filistihanon nangabot nga naninggit sa pagsugat kaniya ug ang Espiritu sa Ginoo mikunsad nga may gahom diha kaniya ug ang mga pisi nga diha sa iyang bukton nahimo nga sama sa lino nga nasunog sa kalayo ug ang iyang mga gapos nangatangtang gikan sa iyang mga kamot. 15Ug siya nakakita ug usa ka bag-ong bukog sa apapangig sa asno, ug gituy-od niya ang iyang kamot ug gikuha kini ug pinaagi niini gipatay niya ang usa ka libo ka tawo.
16Ug si Samson miingon,
“Pinaagi sa bukog sa apapangig sa usa ka asno,
mga pundok ibabaw sa mga pinundok,
pinaagi sa apapangig sa usa ka asno nakapatay ako
ug usa ka libo ka tawo.”
17Sa diha nga nahuman siya sa pagsulti, iyang gisalibay ang bukog sa apapangig gikan sa iyang kamot ug kadtong dapita gitawag nga Ramat-lehi. 18Ug giuhaw siya pag-ayo ug misangpit siya sa Ginoo, ug miingon, “Ikaw ang naghatag niining dakong kaluwasan pinaagi sa kamot sa imong ulipon, ug karon mamatay ba ako sa kauhaw ug mahulog sa kamot sa mga dili tinuli?” 19Ug gibuksan sa Dios ang may lungag nga dapit sa Lehi ug migula ang tubig didto. Ug sa pag-inom niya, naulian ang iyang espiritu ug siya nabaskog. Busa ang ngalan niadto gitawag ug En-hakore nga anaa sa Lehi hangtod niining adlawa. 20Ug siya nahimong maghuhukom sa Israel sa mga adlaw sa mga Filistihanon sulod sa 20 ka tuig.
Currently Selected:
MGA MAGHUHUKOM 15: ABCEB
Highlight
Share
Copy
Want to have your highlights saved across all your devices? Sign up or sign in
©Philippine Bible Society, 2011
