HOSEA 13
13
Ang Kataposang Paghukom sa Israel
1Sa diha nga ang Efraim misulti, dihay pagkurog,
gipasidunggan siya sa Israel,
apan siya nakasala pinaagi kang Baal ug siya namatay.
2Ug karon nagdugang ang ilang pagpakasala
ug naghimo ug mga tinunaw nga larawan alang sa ilang kaugalingon,
mga diosdios nga hinimo gikan sa plata,
ang tanan niini buhat sa mga batid nga tigpamuhat.
Sila miingon, “Paghalad kamo alang niini.”
Ang mga tawo mihalok sa mga nating baka!
3Busa mahisama sila sa gabon sa kaadlawon
o sama sa yamog nga sayong mahanaw,
sama sa tahop nga mapalid gikan sa giokanan
o sama sa aso gikan sa bintana.
4Bisan pa niana ako mao ang Ginoo nga imong Dios
gikan sa yuta sa Ehipto;
ikaw walay Dios nga nailhan kondili ako
lamang ug gawas kanako walay manluluwas.
5 #
Deut. 8:11-17. Ako ang nakaila kanimo didto sa kamingawan,
sa yuta sa dakong hulaw.
6Sa diha nga sila nakakaon#13:6 Sa diha…nakakaon: Sa Hebreo, sumala sa ilang sibsibanan. na pag-ayo,
nangabusog sila, ug gibayaw ang ilang kasingkasing,
busa sila nalimot kanako.
7Tungod niana ako mahisama sa usa ka liyon
ngadto kanila, sama sa leopardo mag-atang ako diha sa dalan.
8Mohasmag ako kanila sama sa usa ka oso nga nawad-an sa iyang mga itoy,
ug laksion nako ang ilang dughan,
ug didto ako maglamoy kanila sama sa usa ka liyon nga baye,
sama sa usa ka mananap nga ihalas nga magwataswatas kanila.
9Laglagon ko ikaw, O Israel,
kinsa ang makatabang kanimo?#13:9 kinsa…kanimo: Sa Hebreo, kanako anaa ang imong tabang.
10 #
1 Sam. 8:5-6. Hain man#13:10 Hain man: Sa Hebreo, Ako mahimo. karon ang imong hari, aron sa pagluwas kanimo.
Hain man ang imong mga pangulo sa tanan nimong mga siyudad,
sila nga mahitungod kanila ikaw nag-ingon,
“Hatagi ako ug usa ka hari ug mga pangulo”?
11 #
1 Sam. 10:17-24;
1 Sam. 15:26. Gihatagan ko ikaw ug hari diha sa akong kasuko
ug siya gikuha nako diha sa akong kaligutgot.
12Ang kasal-anan sa Efraim gibugkosan,
ang iyang sala gihipos.
13Ang kasakit sa pagpanganak modangat kaniya,
apan siya dili maalamon nga anak,
kay karon siya dili angay nga magpadayag sa iyang kaugalingon
diha sa baba sa tagoangkan.
14 #
1 Cor. 15:55. Lukaton ba nako sila gikan sa gahom sa Sheol?
Tubson ba nako sila gikan sa kamatayon?
O kamatayon, hain man ang#13:14 hain man ang: Sa Hebreo, ako mahimong. imong mga hampak?
O Sheol, hain man ang#13:14 hain man ang: Sa Hebreo, ako mahimong. imong paglaglag?
Ang kaluoy natago gikan sa akong mga mata.
15Bisan ug siya mouswag sama sa tanom nga bugang,
ang hangin sa silangan, ang hangin sa Ginoo moabot,
motungha gikan sa kamingawan;
ug ang iyang tubod maughan,
ang iyang tuboran magmala;
kini magkuha sa bililhong butang
gikan sa iyang mga bahandi.
16Ang Samaria magpas-an sa iyang sala
kay siya misukol sa iyang Dios;
sila mangapukan pinaagi sa espada,
ang ilang mga bata dugmokon,
ug ang ilang mga babaye nga mabdos yasyasan.
Currently Selected:
HOSEA 13: ABCEB
Highlight
Share
Copy
Want to have your highlights saved across all your devices? Sign up or sign in
©Philippine Bible Society, 2011
