1 SAMUEL 16

Si David Gidihogan ingon nga Hari

1Ang Ginoo miingon kang Samuel, “Unsa ba kadugay ang imong pagbangutan alang kang Saul, nga nakita nimo nga akong gisalikway siya gikan sa pagkahari sa Israel? Sudli ug lana ang imong sungay ug lakaw. Paadtoon ko ikaw kang Jesse nga taga-Betlehem kay ako nagtagana ug usa ka hari alang kanako taliwala sa iyang mga anak.” 2Si Samuel miingon, “Unsaon nako pag-adto? Kon si Saul makadungog niana, iya akong patyon.” Ug ang Ginoo miingon, “Pagdala ug usa ka nating baka ug ingna, ‘Ako mianhi aron sa paghalad alang sa Ginoo.’ 3Ug dapita si Jesse ngadto sa paghalad ug ipakita nako kanimo kon unsay imong buhaton ug ikaw magdihog alang kanako kaniya nga akong nganlan kanimo.” 4Si Samuel mibuhat sumala sa gisugo sa Ginoo, ug miadto sa Betlehem. Ug ang mga kadagkoan sa siyudad miadto aron sa pagsugat kaniya nga nagkurog ug miingon, “Mianhi ba ikaw nga malinawon?” 5Ug siya miingon, “Malinawon, ako mianhi aron sa paghalad alang sa Ginoo; pagbalaan kamo sa inyong kaugalingon, ug uban kanako sa paghalad.” Ug iyang gibalaan si Jesse ug ang iyang mga anak nga lalaki ug mitawag kanila ngadto sa paghalad.

6Sa ilang pag-abot, siya mitutok kang Eliab ug miingon, “Sa pagkatinuod ang dinihogan sa Ginoo anaa sa atubangan niya.” 7Apan ang Ginoo miingon kang Samuel, “Ayaw pagtan-aw sa iyang nawong o sa gitas-on sa iyang barog tungod kay ako nagsalikway kaniya, kay ang Ginoo nagtan-aw dili ingon sa makita sa tawo, kay ang tawo nagtan-aw sa panagway sa gawas apan ang Ginoo nagtan-aw sa kasingkasing.” 8Unya si Jesse mitawag kang Abinadab ug gipaagi siya sa atubangan ni Samuel. Ug siya miingon, “Wala usab magpili niini ang Ginoo.” 9Unya gipaagi ni Jesse si Samma. Ug siya miingon, “Wala usab magpili niini ang Ginoo.” 10Ug gipaagi ni Jesse ang pito niya ka anak nga lalaki sa atubangan ni Samuel. Ug si Samuel miingon kang Jesse, “Ang Ginoo wala magpili niini.” 11Si Samuel miingon kang Jesse, “Ania ba dinhi ang tanan nimong mga anak?” Ug siya miingon, “Aduna pay nahibilin nga kamanghoran ug atua siya nagbantay sa mga karnero.” Ug si Samuel miingon kang Jesse, “Pasugoi ug ipakuha siya, kay dili kita manglingkod hangtod nga moabot siya dinhi.” 12Iyang gipasugoan ug gidala siya sa sulod. Pulahon siya ug nawong ug nindot ang iyang mga mata ug ambongan. Ug ang Ginoo miingon, “Tindog, dihogi siya kay mao kini siya.” 13Unya si Samuel mikuha sa sungay nga gisudlan sa lana ug gidihogan siya diha sa atubangan sa iyang mga igsoon ug ang Espiritu sa Ginoo mikunsad nga puno sa gahom sa ibabaw ni David sukad niadtong adlawa. Ug si Samuel mitindog ug miadto sa Rama.

Si David Diha sa Hawanan ni Saul

14Unya ang Espiritu sa Ginoo mibulag gikan kang Saul ug usa ka daotan nga espiritu gikan sa Ginoo nagsakit kaniya. 15Ug ang mga sulugoon ni Saul miingon kaniya, “Tan-awa karon, usa ka daotang espiritu gikan sa Dios nagsakit kanimo. 16Himoa nga ang among agalon karon magsugo sa imong mga sulugoon nga anaa sa imong atubangan sa pagpangita ug usa ka tawo nga batid nga motugtog sa alpa, ug unya kon ang daotang espiritu gikan sa Dios anaa kanimo, siya motugtog niini ug ikaw mamaayo.” 17Busa si Saul miingon ngadto sa iyang mga sulugoon, “Hatagi ako karon ug usa ka tawo nga maayong motugtog ug dad-a siya dinhi kanako.” 18Unya mitubag ang usa sa mga batan-ong lalaki, “Nakita nako ang usa ka anak ni Jesse nga taga-Betlehem, batid nga motugtog, isog nga tawo, tawo sa gubat, ugdang nga manulti, maayo ug barog ug ang Ginoo nag-uban kaniya.” 19Busa si Saul nagpadala ug mga sulugoon ngadto kang Jesse, ug nag-ingon, “Ipadala ngari kanako si David nga imong anak nga atua uban sa mga karnero.” 20Ug si Jesse nagkuha ug usa ka asno nga gikargahan ug pan ug usa ka panit nga sudlanan sa bino ug usa ka nating kanding, ug gipadala kang David nga iyang anak ngadto kang Saul. 21Si David miadto kang Saul ug mitindog sa iyang atubangan. Ug si Saul nahigugma pag-ayo kaniya ug nahimo siyang tigdala sa iyang hinagiban. 22Unya si Saul nagpasugo ngadto kang Jesse nga nag-ingon, “Paalagara si David sa akong atubangan, kay siya nakakaplag ug kahimuot sa akong panan-aw.” 23Sa higayon nga ang daotang espiritu gikan sa Dios moabot kang Saul, si David mokuha sa alpa ug motugtog niini. Busa si Saul maulian ug mamaayo, ug ang daotang espiritu mobiya gikan kaniya.

Currently Selected:

1 SAMUEL 16: ABCEB

Highlight

Copy