Zekaria 7

Rwoth kwero riyo kec m'ongoye adieri

1I oro mar'aŋwen ma dhum pa Kere Dario, k'aŋwen ma dwe mar'abuŋwen, dwe ma Kislev, wac pa Rwoth obino ri Zekaria.

2Munyo oyido Bethel ooro Sareza kodi Regem Melek kodi cwo pajo, kwayo ruwaŋ Rwoth, 3kodi penjo jocway ri Were i wi migam m'oyido jonitie i Ot pa Rwoth pa lwak jolweny kodi jotuci wac Were ni, “Anyalo ywak kodi lokirok maleŋ i dwe mar'abic paka oyido atimo ma oro kweth pama?”

4Wac pa Rwoth pa lwak jolweny obino ran ka waco ama: 5Luw gi ji je ma piny kodi jocway ri Were i wi migam k'iwaco ni, “Ma oro piero ario, wiriyo kec to wiywak i dwe mar'abic kodi i dwe mar'abirio, i oro ario me, adieri obedo ran ma wiriy'iye kec? 6Kosa ka wicemo to wimedho, k'obedo riwin wegi? 7K'obedo gi wac pa Rwoth m'oluwo luwo i cingi jotuci wac Were ma cango, ma Yerusalem obed'iye m'okwe, kodi tindi madongo m'othoko go, yupiny ma Kanan kodi Sefela?”

8Wac pa Rwoth obino ri Zekaria ka waco ama: 9Rwoth pa lwak jolweny waco ama: Thum banja g'adieri, nyuthi wor kodi ŋono kisi dhano ri nyawote. 10Citho, nyithindho kic, japath, kosa jacandi, ikir'idiy, kosa timo can marac ri nyawotin i cunyin.

11To jokwero winjo, aka joyengo badi gin gi wictek, aka ithi gin obedo mapek ma jok'onyalo winjo. 12Jotweyo cuny jo ma jok'owinjo cik kodi wac ma Rwoth pa lwak jolweny odhiro gi cuny pere luwo i cingi jotuci wac Were ma cango. Riameno keme madwoŋ obino wok bongi Rwoth pa lwak jolweny. 13Aka paka go olwoŋo, to jok'onyalo winjo, ameno munyo jolwoŋo, go k'onyalo winjo, Rwoth pa lwak jolweny waco. 14Akedho jo g'asur i dier nonin je m'oyido fodi jokuya. Ameno lowo ma joweyo odoŋ m'ojwangere, m'ongoye ŋata oluw'iye kosa dwok'iye, lowo m'oyido ber to jwangere.

Currently Selected:

Zekaria 7: DHOPE

Highlight

Copy