Zekaria 6
6
Menyirok ma cawilin aŋwen
1Awire t'atiŋo waŋan malo, aŋiyo, aka neni, cawilin aŋwen jowok i dier gote ario, aka gote me oyido obedo ma ywel. 2#Meny 6:4; Meny 6:5Cawila marapena oyido nitie gi kayinin m'obokere, aka mar'ario oyido nitie gi kayinin macol. 3#Meny 6:2Cawila mar'adek oyido nitie gi kayinin matar, aka cawila mar'aŋwen oyido nitie gi kayinin makicin manyakwoyokwoyo, ma jotek. 4Apenjo malaika m'oyido luwo kodan ni, “Me ginaŋo rwoth?”
5 #
Meny 7:1
Malaika odwoko to waco ran ni, “Me koyin aŋwen ma polo, ma jowok nyaka ruwaŋ Rwoth ma piny gibe. 6Cawila manitie gi kayinin macol kadho i piny ma yumalo, aka manitie gi kayinin matar oluwo jo; cawila manitie gi kayinin makicin manyakwoyokwoyo okadho i piny ma yupiny.” 7Kayinin matek jowok, aka jodwaro kadho woth thoko piny. Malaika owaco ni, “Kadhi wiwoth thoko piny.” To jowotho thoko piny. 8Kenyo go oywakere ran ka waco ni, “Neni, jono ma jokadho i piny ma yumalo jomiyo Cunyan kwe i piny ma yumalo.”
Or ma ruko ri Yosuwa sangaria
9Wac pa Rwoth obino ran ka waco ni, 10“Kwany mic wok kwoŋ jotwec, Heldai, Tobia, kodi Yedaya, ma jotieko tundo wok i Babilon, aka ikadhi i ndelo no won, i ot pa Yosia wod Zefania. 11Kwany bongi jo feza gi zahabu, itimi sangaria aka ikethi i wi Yosuwa, wod Yehozadak jadwoŋ pa jocway ri Were i wi migam. 12#Yer 23:5; 33:15; Zek 3:8Iwaci rigo ni, Rwoth pa lwak jolweny waco ni, ‘Neni, jal ma nyinge obedo Jangi yath; kole go ladongo i kabedo pere to geto Ot pa Rwoth.’ 13Go ama lageto Ot pa Rwoth, go latiŋo dwoŋ, go labedo to dhumo i kom ma dhum pere, go labedo jacway ri Were i wi migam i kom ma dhum pere, aka rieko ma siem labedo i dier j'ario. 14Sangarin labedo paka rapoy i Ot pa Rwoth ri Heldai, Tobia, Yedaya, kodi Yosia wod Zefania.”
15“Ji ma jonitie bor jolabino geto Ot pa Rwoth, aka wilaŋeyo nike Rwoth pa lwak jolweny ooran bongi win. Gime latundo i kare, ka winowinji gi gwokirok, dwondi Rwoth Were mewin.”
Currently Selected:
Zekaria 6: DHOPE
Highlight
Share
Copy
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
