Luka 19

Yesu kodi Zakayo

1Yesu odonjo Yeriko aka oyido wotho i dier tindi. 2Nyatoro ma nyinge Zakayo oyido nikenyo; go oyido obedo acel kwoŋ jocoki misolo madongo kendo ŋat'oŋaŋ. 3Onwaŋo go yenyo swa ŋeyo Yesu ni obedo dhano ma nedi, to onwaŋo oasa ceko ma k'onyalo neno go ro lwak ji. 4Riameno go oyombere yumalo to idho musikamol ni wonyali neno Yesu m'oyido kidho luwo kenyo. 5Munyo Yesu otundo kanyago oŋiyo malo to luwo gine; owaco ni, “Zakayo, lori, kwakere rupiri aripo bedo i ot perin konon.” 6Go oloro mayot to jolo Yesu gi kisangala. 7To ji jocako kiŋunyaŋunya munyo joneno gima timere. Jowaco ni, “Jame okidho wendo ri jagimarac.” 8To Zakayo oay ocungo to waco ri Rwoth ni, “Jadwoŋ, akidho miyo jocandi adec ma lim paran, odoko ka nitie nyatoro m'atieko diyo kwoŋe gipere akidho dwoko rigo ma kalo meno diŋwen.” 9Aka Yesu owaco rigo ni, “Konon both otieko bino i ot me, paka jame bende obedo nyakwar Abraham; 10kole Wod Dhano obino dwaro gi botho jom'orwenyo.”

Ageca kwoŋ pesa

(Mat 25:14-30)

11Munyo fodi jowinjo wac no, Yesu omedo luwo rijo iy'ageca rupiri go oyido oriko Yerusalem, aka ji oyido joparo ni Ker pa Were kidho tundo piyo no won. 12Riameno Yesu owaco ni, “Cango obedo jadwoŋ moro m'okidho i piny mabor ni woloki go kere aka nyaka wodwoki peco. 13Mafodi go koay, olwoŋo jotic pere apar bonge to miyo dhano je kwoŋ jo siringi gana acel acele, to waco ni, ‘Tiyi win gine wonywol magowa cuka anodwoki.’ 14To paka anywola ma piny no oyido jodak ŋato, jodhiro jomikwenda pajo kidho waco ni, ‘Wakimiti jalo wobedi kere mawan.’ ”

15“Jadwoŋ no oloki go kere to ay dwoko. Piyo piyo olwoŋo jotic pere m'omiyo pesa bino bonge ka mito ŋeyo magowa ma jolimo. 16Jatic marapena obino to waco ni, ‘Jadwoŋ, alimo gana apar kwoŋ gana acel m'imiyan.’ 17Go owaco ni, ‘Itimo maber, ijatic maber! Paka inyutho genirok i gimathin, onyo abino kethin kuro tindi apar.’ 18Jatic mar'ario obino to waco ni, ‘Jadwoŋ, alimo magowa ma siringi gana abic kwoŋ pesa m'imiyan.’ 19Go owaco ri ŋati me ni, ‘Ibino kuro tindi abic.’ 20Gikenyo jatic macowe obino to waco ni, ‘Jadwoŋ, siringi gana acel perin ee; akano m'opanere i kitambala. 21Ato onwaŋo alworin, rupiri in idhano ma jamahembi. Ikwanyo gim'iŋat'ikiketho, aka ikeco gim'iŋat'ikicwoyo.’ 22Jalo owaco ri ŋato ni, ‘Ijatic marac, abino thumo rin banja cungo kwoŋ wac perin won! Kere iŋeyo nike abedo jamahembi; ni akwanyo gim'akiketho, aka akeco gim'akicwoyo; 23to raŋo ma ikiketho pesa paran i kakan, di ka adwoko d'anwaŋo omedere?’ 24Gikenyo go owaco ri jom'onwaŋo jocungo kenyo ni, ‘Kwany win woko pesa no kwoŋe aka wimiy jatic manitie gi gana apar ca!’ 25To jowaco rigo ni, ‘Jadwoŋ kole go nigi siringi gana apar.’ 26#Mat 13:12; Mar 4:25; Luk 8:18To go odwoko ni, ‘Awaco riwin, moro je manitie gi gimoro ibino medo go; to ŋat'ongoye gine, kada nyaka mathin ma go nitie gine ibino kwanyo kwoŋe. 27#Mat 25:14-30Aka jokwor paran ma jokweran bedo kere pajo no keli win ka wineki jo ruwaŋan!’ ”

Yesu donjo Yerusalem gi dwoŋ

(Mat 21:1-11; Mar 11:1-11; Yoh 12:12-19)

28Munyo Yesu otieko waco gime, otelo kadho rijo Yerusalem. 29Munyo go oriko Bethfage gi Bethania, dho got Oliv, odhiro jofonjirok ario yuwiye 30munyo waco ni, “Kidhi win loka ma yuwiy win; ka widonjo loka no wibino nwaŋo nyathi punda m'otwey ma fodi dhano k'obedo i wiye, wigony to wikelo ka. 31Ka dhano openjo win ni, ‘Wigonyo punda no raŋo?’ Wiwaci rigo ni, ‘Rwoth ama mito.’ ” 32Jokadho to jonwaŋo gimoro je paka Yesu owaco rijo. 33Munyo jogonyo nyathi punda no, wegi mere jopenjo jo ni, “Wigonyo punda no raŋo?” 34Jodwoko ni, “Rwoth ama mito.” 35Jotero nyathi punda no ri Yesu. Gikenyo jobolo nangin pajo wi kayina no to joketho Yesu i wiye. 36Munyo Yesu kadho, jopedho nangin pajo i royo malomalo. 37Aka munyo Yesu oriko Yerusalem dho kama royo lor'iye yu Got ma Oliv, jofonjirok pere mathoth jocako foyo Were gi pako go gi dwondi gin ma malo ro gigipiny madongo ma jotieko neno. 38#Zab 118:26Jowaco ni, “Silwany wobedi ri Kere ma bino i nyingi Rwoth! Siem wobedi i polo, aka dwoŋ wobedi ri Were!”

39Gikenyo Jofarisayo moro i dier lwak ji jowaco ri Yesu ni, “Jafonji, waci ri jofonjirok perin jowoliŋ!” 40Yesu odwoko ni, “Ka joliŋ, awaco riwin, telin ama jobino koko.”

Yesu ywako Yerusalem

41Yesu otundo cegin gi tindi madwoŋ aka munyo oneno tindi no, oywako 42munyo waco ni, “Bedi kada konon won iŋey gima d'okelo rin siem! To gino opanere ri waŋin. 43Kole ndelo bino tundo ma jokwor perin jobino kuny'iye bur wugo thokin to jocegin iye je. 44Jobino reyin woko kicutho gi ji manitie i cel perin; ongoye tele kad'acel ma jowey i wiy nyawote, rupiri ikinyalo ŋeyo ndir ma Were owend'iye rin.”

Yesu kidho i Ot pa Were

(Mat 21:12-17; Mar 11:15-19; Yoh 2:13-22)

45Yesu odonjo i Ot pa Were to cako riemo woko jomitan 46#Isa 56:7; Yer 7:11munyo waco rijo ni, “Ondiki ni, ‘Ot paran ibino lwoŋo ni Ot ma kwayo.’ Am'onyo wiloko ŋungu ma pondo pa jokwo ayin.”

47 # Luk 21:37 Yesu ofonjo i Ot pa Were kisi ndelo. Jotel pa jocway ri Were i wi migam, Jondiko, kodi jotel pa ji oyido joyenyo neko go, 48to jok'onwaŋo yo ma timo ameno, rupiri ji je oyido jociko ithi gin winjo go gi maro madit.

Currently Selected:

Luka 19: DHOPE

Highlight

Copy