Yohana 9

Yesu botho ŋat'onywol ma waŋ'otho

1Munyo Yesu wotho, oneno ŋatimoro ma cango onywol ma waŋ'otho. 2Jofonjirok pere jopenjo go ni, “Jafonji, ŋat'otimo gimarac m'omiyo ŋati me onywol ma waŋ'otho? Gimarac pere won, kosa apa jonywol pere?” 3Yesu odwoko ni, “Thowaŋ pere kimaki kwoŋ gimarac pere kosa apa jonywol pere. Go waŋ'otho nike nyaka tic pa Were wonenere ka tiyo i go. 4Kafodi piny ler waripo timo tic pa ŋat'ooran, mudho bino, ma ongoye dhano m'onyal tic. 5Kafodi anitie i piny aŋat'abedo lero ma piny.”

6Munyo otieko waco ameno, Yesu oŋulo law piny to dwanyo lowo mathin gi law no to mwono waŋ ŋato gi cwodho no, 7aka owaco rigo ni, “Kidhi ilwoki waŋin i jwom Silowam.” Gikenyo ŋato okidho lwoko waŋe, to dwoko ma waŋe neno.

8Joger pere kodi ji m'oyido jotieko neno go munyo kwayere, jopenjo ni, “Me won k'aŋata yado bedo piny aka kwayere?” 9Jomegi jowaco ni, “Me go won.” To joman jowaco ni, “Be, ki go, cale gine ayino.” Gikenyo ŋato won owaco ni, “An won a ŋata go.” 10Jopenjo go ni, “To waŋin oyawere nedi won?” 11Go odwoko ni, “Jal m'ilwoŋo ni Yesu odwanyo cwodho moro, omwono gine waŋan, to waco ran ni, ‘Kidhi i jwom Silowam ilwoki waŋin.’ Gikenyo akidho, to tekin atieko lwoko waŋan to anyalo neno.” 12Jopenjo go ni, “Go nikune?” Go odwoko ni, “Akuya ran.”

Jofarisayo jomenyo tiendi both me

13Gikenyo jotero ŋata yado waŋe oyido otho me bongi Jofarisayo. 14Ndelo ma Yesu odwany'iye cwodho aka oyawo waŋ ŋato oyido obedo Sabato. 15Am'omiyo Jofarisayo odoko jopenjo ŋata waŋe yado otho no paka ocako neno. Go owaco rijo ni, “Go oketho cwodho moro i waŋan, to alwoko waŋan aka onyo aneno.” 16Jofarisayo moro jowaco ni, “Ŋat'otimo gino kinyal wok bongi Were, rupiri go kikur cik ma Sabato.” To joman jowaco ni, “Ŋata jareco d'onyalo nedi timo tic madwoŋ ameno?” To tiakirok bedo i dier jo.

17Gikenyo Jofarisayo odoko jopenjo ŋato ni, “Iwaco nike go oyawo waŋin, to iwon iwaco aŋo kwoŋ go?” 18Ana go ni, “Go jatuci wac Were.” Gikenyo Joyuda jok'omito yeyo nike go oyido waŋ'otho aka onyo pama neno, cuka jolwoŋo jonywol pere 19to jopenjo jo ni, “Me wod win? Wiwaco nike go onywol ma waŋ'otho? K'ameno, raŋo ma go pama neno?” 20Jonywol pere jodwoko ni, “Waŋeyo nike go wod wan, aka go onywole ma waŋ'otho. 21To wakuya paka go ocako neno, kosa ŋat'oyawo waŋe. Penji win go won; kole go otegino, aka won nyalo luwo kwoŋe.” 22Jonywol pere jowaco ama kwoŋe rupiri oyido jolworo Joyuda; ato Joyuda oyido jotieko ridho ni moro je m'otuco ni Yesu obedo Kristo ibino riemo go woko i kitipa pa jom'oyeyo pa Joyuda. 23Am'omiyo jonywol pere jowaco ni, “Kole go otegino; penji win go won!”

24Gikenyo jodoko jolwoŋo ŋati m'onywol ma waŋ'otho no mar'ario to jowaco rigo ni, “Miy Were dwoŋ. Waŋeyo nike jalo jagimarac.” 25Ŋato odwoko ni, “Akuya kosa go jagimarac kosa be, to gim'aŋeyo kende a ni oyido waŋan otho to pama onyo aneno.” 26Jomedo penjo go ni, “Go otimo rin aŋo won? Oyawo waŋin nedi?” 27Go odwoko ni, “Atieko waco riwin, to wikwero winjo. Aŋo man ma wimito winjo kendo? Kono miti wibende wimito bedo jofonjirok pere!” 28Gikenyo jokwoŋo go to jowaco ni, “Ibedo jafonjirok pa jalo; wan wabedo riwan jofonjirok pa Musa. 29Waŋeyo ni Were oluwo gi Musa; to jalo, wakuya kiri kama go wok'iye!” 30Ŋato odwoko ni, “Raŋo? Meno obedo gidhier swa! Wikuya kama go wok'iye, ma to go oyawo kiri waŋan! 31Waŋeyo nike Were kiwinji joreco; go winjo joma jomiyo go dwoŋ aka jotimo gima go mito. 32Wok i cakirok pa piny fodi k'owinji ni nyatoro oyawo waŋ dhano m'onywol ma waŋ'otho. 33Kole bedi ŋati me k'owoki bongi Were, di k'onyalo timo gimoro.” 34Jodwoko go ni, “In m'idongo gi reco wok i nywolirok perin bende onyo ifonjo wan aŋo?” To joriemo go woko i kitipa pa jom'oyeyo pa Joyuda.

Thowaŋ ma cuny

35Yesu owinjo ni joriemo go woko, to munyo onwaŋo go, openjo go ni, “Iyeyo Wod Dhano?” 36Ŋato odwoko ni, “A ŋa no jadwoŋ, ŋey ayey go?” 37Yesu owaco rigo ni, “Itieko neno go, aka go won ama luwo kodin pama me.” 38Ŋato owaco ni, “Rwoth, ayeyo.” Kenyo olamo Yesu.

39Yesu owaco ni, “Abino i piny ka thumo banja, ŋey joma waŋ gin otho jowoneni, aka joma neno jowolokere joma waŋ gin otho.” 40Jofarisayo megi, m'onwaŋo jonitie bonge kenyo, jowinjo go waco ameno to jopenjo go ni, “Onyo nyutho ni wabende waŋ wan otho?” 41Yesu odwoko ni, “Bedi waŋ win otho d'onyo wingoye gi reco; to paka wiwaco ni winyalo neno, dwoŋ mere kere fodi winitie i reco.”

Currently Selected:

Yohana 9: DHOPE

Highlight

Copy