Zekaria 9
9
Thumo banja ri nonin mager
1Me wac pa Rwoth ma mako kwoŋ lowo ma Hadrak,
kodi Damasiko kabedo ma ywomirok.
Kole waŋ ji kodi nonin je ma Isiraili,
nitie kwoŋ Rwoth.
2Hamath bende, ma gerere gi Tire,
kodi Sidon makada nende riek swa.
3Tire ogeto kapondo pere,
odhuro feza paka fukefuke,
kodi zahabu paka cwodho ma royin.
4To neni, Rwoth lakwedo woko go,
to bolo woko lim pere i nam,
aka mac lareyo woko go.
5 #
Isa 14:29-31; Yer 47:1-7; Eze 25:15-17; Yowel 3:4-8; Amos 1:6-8; Zef 2:4-7 Asikelon laneno, aka labwok,
Gaza bende laneno, aka ladwanyere i litho.
Ekiron bende, geno pere lalokere wickwot,
Kere larere woko gi Gaza;
aka Asikelon kiladoŋ.
6Ji m'oruwere jolabedo i Asdod,
aka alakwanyo woko noro pa Filistia.
7Alakwanyo woko remo mere wok i dhoke,
kodi amien mere wok i lake,
aka labedo paka gim'oboth ri Were mawan;
go labedo paka kwari nono i Yuda,
aka Ekiron labedo paka Joyebus.
8Alathoko ot paran gi jokur,
ŋey wongoye ŋata nyalo donjo kosa wok,
ongoye jar'adica ma ladiyo jo kendo,
kole pama atieko neno gi waŋan.
9 #
Mat 21:5; Yoh 12:15 Fore swa, Awi nyar Zayon!
Koki ri kisangala, Awi nyar Yerusalem!
Eno, kere perin labino bongin,
gi tiro kodi loyo,
gi mwolo ka gweyo punda madhako,
i wi nyathi punda madhako.
10 #
Zab 72:8
Alakwanyo woko cawilin wok i Efrayim,
kodi kayinin ma lweny wok i Yerusalem,
kodi aserin ma lweny.
Aka go laluwo siem ri nonin,
dhum pere labedo wok i nam tundo i nam,
wok i jwom kiri i gike je ma piny.
11 #
Wok 24:8
Paka ri in, ro remo ma cikirok perin,
alagonyo jotwec perin wok i bur m'ongoy'iye pi.
12Gik win i kapondo, Awi jotwec ma jogeno,
konon awaco nike alaculo win dirio.
13Kole atieko gondo Yuda paka atum bor paran,
atieko timo Efrayim paka aserin mere.
Alacewo wotin, Awi Zayon,
kwoŋ wotin, Awi Gris,
aka alacweyin paka abor pa jameni.
14Rwoth laneno i wi jo,
aka asere pere ladwire paka lithkoth,
Rwoth Were lakudho gwara,
aka laŋanjo iy'asur ma yupiny.
15Rwoth pa lwak jolweny lakikwonga jo,
aka jolareyo to nyono piny telin ma asumulu,
jolamadho remo paka jomadho vini,
aka jolapoŋ paka acero,
paka sondin ma migam.
16Rwoth Were pajo labotho jo i ndelo no,
paka mwendi pa ji pere,
kole jolabedo paka telin ma sangaria,
jolaminyin i lowo pere.
17Bero mere ocale nedi!
Ŋono mere ocale nedi!
Ŋano kodi vini lamiyo yac kodi nyir dongo matek.
Currently Selected:
Zekaria 9: DHOCDC
Highlight
Share
Copy
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
