Zekaria 10
10
Rwoth ciko gonyo ji pere
1Kway win koth wok bongi Rwoth,
i hongo ma cwir,
Rwoth timo pondeponde ma kelo koth,
go miyo ji koth,
miyo kisi ndelo pa dhano twi cemo.
2 #
Mat 9:36; Mar 6:34 Kole cal joluwo kidakana,
jothieth joneno twodo,
jolek jowaco lek ma twodo,
jomiyo diyo cuny manono.
Riameno ji jolera paka rombo,
jonitie i litho kwoŋbedo jakwath rombo ongoye.
3Nge paran oliel kwoŋ jokwath,
aka amiyo wot diegi gir'acula,
kole Rwoth pa lwak jolweny owendo ri mwendi pere, ot pa Yuda,
aka lamiyo jo bedo paka kayina ma dwoŋ pere i lweny.
4Kwoŋ jo owok tele ma sonda,
kwoŋ jo owok ludhe,
kwoŋ jo owok asere ma lweny,
kwoŋ jo owok jadhum.
5Jolabedo paka cwo ma jomeni i lweny,
ma jonyono jokwor i royin,
jolalweny kwoŋbedo Rwoth nitie gi jo,
aka jolasewo wi jogwey kayinin.
6Alaloko matek ot pa Yuda kodi ot pa Yozefu,
alabotho jo, t'adwoko jo,
anitie gi wor rijo, paŋini oyido akijwango jo,
An, Rwoth Were pajo, aladwoko jo.
7Efrayim labedo matek paka cwo ma jomeni,
cuny jo lakisangala paka gi vini.
Nyithindho pajo jolaneno to josangala,
cuny jo lafore i Rwoth.
8Alalwiyo rijo, t'acoko jo,
kole atieko botho jo,
aka jolabedo kweth paka con.
9Makada nende anokedhi jo i dier nonin,
to jolapoyan i piny mabor,
jolakwo gi nyithindho pajo to jodwoko.
10Aladwoko jo wok i lowo ma Misir,
alacoko jo wok Asiria;
alakelo jo i lowo ma Giliad kodi i Lebanon,
cuka ongoye kabedo rijo.
11Jolaluwo i nam gi litho,
jolagoyo asur ma nam,
lutho ma Nayil lagik piny,
noro pa Asiria lapodho,
aka luth ma dhum pa Misir laeye woko.
12Alamiyo jo bedo matek i Rwoth,
aka jolawoth i nyingi go.
Rwoth waco.
Currently Selected:
Zekaria 10: DHOCDC
Highlight
Share
Copy
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
