Zekaria 12
12
Both pa Yerusalem ma yuwaŋe
1Me wac pa Rwoth kwoŋ Isiraili, Rwoth waco, go m'oyaro polo to cako piny aka otimo cuny dhano i go. 2Neni, acegin loko Yerusalem kikopo ma kirin ri ji je thoko, ka jothoki mako Yuda gi Yerusalem. 3I ndelo no alaloko Yerusalem tele mapek ri nonin je; ma jono ma jotiŋ jolalimo litho swa; aka nonin je jolariwere kanyacel monjo go. 4I ndelo no, Rwoth pa lwak jolweny waco, alagoyo kisi kayina gi kirin, aka jogwey mere gi neko. To kwoŋ ot pa Yuda alayawo waŋan, aka alagoyo kisi kayina gi waŋtho. 5Jodhum ma Yuda jolawaco iy'adundo pajo ni, “Ji ma jobedo i Yerusalem jonitie gi meni i Rwoth pa lwak jolweny bedo Were pajo.”
6I ndelo no alamiyo jodhum ma Yuda bedo paka dak mac i dier yen, paka tome mac i kanja, aka jolarere woko racuc kodi racam nonin je, kareno Yerusalem fodi ladoŋ i kabedo mere, i Yerusalem.
7Rwoth latelo botho wemin ma Yuda, ŋey dwoŋ ma ot pa Daudi kodi dwoŋ pa ji ma jobedo i Yerusalem wokiri woloyi dwoŋ pa Yuda. 8I ndelo no Rwoth lakikwonga ji ma jobedo i Yerusalem ŋey ŋata nyap kwoŋ jo i ndelo no wocale paka Daudi; aka ot pa Daudi labedo paka Were, paka malaika pa Rwoth ruwaŋ jo. 9Aka i ndelo no alarango reyo woko nonin je ma jobin monjo Yerusalem.
Ndelo ma ywak
10 #
Yoh 19:37; Meny 1:7; Mat 24:20; Meny 1:7 Alakonjo kwoŋ ot pa Daudi kodi ji ma jobedo i Yerusalem, cuny ma wor kodi ma kwayo, aka jolanenan ŋata jocwowo to joywak paka ŋata ywako wode acel g'acel. Jolabedo gi geregere rigo, paka ŋata ywako kayo pere. 11I ndelo no ywak labedo madwoŋ i Yerusalem paka ywak ri Hadad Rimon i milelo ma Megido. 12Piny laywak, kisi peco won laywak; peco pa Daudi won kende, gi mon pajo kakendi gin; peco pa Nathan won kende, gi mon pajo kakendi gin; 13peco ma ot pa Levi won kende, gi mon pajo kakendi gin, peco pa Simey won kende, gi mon pajo kakendi gin, 14pecin je ma jodoŋ, kisi peco won kende, kodi mon pajo kakendi gin.
Currently Selected:
Zekaria 12: DHOCDC
Highlight
Share
Copy
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
