Malaki 2
2
1Rwoth pa lwak jolweny waco ama: Aka onyo win, jocway ri Were i wi migam, me cik riwin. 2Ka wik'owinji, ka wik'okethi i cuny win miyo nyingan dwoŋ, kenyo abino kwoŋo win kiri gi nyithindho mewin; adieri atieko kwoŋo jo, rupiri wikikethi i cuny win. 3Neni, abino miyo nyithindho mewin gir'acula t'awiro woyo dhok ma wimiyan i waŋ win, aka abino riemo win woko ruwaŋan. 4#Kwan 3:11-13Ameno winoŋey ni adhiro cik me riwin, ŋey cikirok paran gi Levi wocungi, Rwoth pa lwak jolweny waco.
5 #
Kwan 25:12
“Cikirok paran gi Levi oyido ma kwo gi siem, aka amiyo go, ŋey wolworan, aka go olworan, ocungo i lworo ma nyingan. 6Fonji mar'adieri oyido ni dhoke, aka ongoye komo m'onwaŋere i dhoke. Owotho kodan i siem kodi tiro, aka owiro ji madit wok i reco. 7Rupiri dhok jacway ri Were i wi migam ripo gwoko rieko, aka ji joripo rango rieko wok bonge, rupiri go obedo jamikwenda pa Rwoth pa lwak jolweny.”
8“To onyo wiweyo yo m'otire; aka witieko miyo ji kweth ceri gi fonji mewin. Wituro cikirok paran gi win, Rwoth pa lwak jolweny waco. 9Ameno amiyo ji jobwono win, paka bende wikiluwo yo paran, aka witimo nyakucel i fonji mewin.”
Banirok pa ji ri Were
10Wangoye gi bawan acel, Were acel ama k'ocweyo wan? Raŋo onyo wabedo jobanirok ri wadi wan, aka raŋo wabwono cikirok ma Were otimo gi kwarere mawan? 11Ji ma Yuda jongoye g'adieri, aka jotimo gikoc i Isiraili gi Yerusalem; rupiri Yuda otieko koco Ot pa Rwoth ma lamo ma go omaro. Cwo jonywomo nyir ma jolamo werin pa jopath. 12Weyi Rwoth wokwany woko i dier Joisiraili ji ma jotimo gime, aka doko jokiri jowobedi i cowirok ma piny mawan kelo ri Rwoth.
13Aka me doko giman ma witimo. Wiumo migam pa Rwoth gi pigi waŋ win, gi ywak kodi ndur rupiri go doko kiyey mic mewin kosa kijol gi kisangala wok i cingi win. 14Wipenjo ni, “Raŋo go kijol?” Rupiri obedo jakony ma luwo adieri ma cikirok m'itimo gi dhako perin ma soye, m'oyido ingoye rigo g'adieri, makada nende go jakony perin aka dhako perin ma cikirok. 15Were k'ocweyo win del acel kodi cuny acel gi go? Atoŋa pere oyido aŋo i gime? Oyido obedo ni wibedi gi nyithindho manyawere. Ameno neni win ni ongoye kwoŋ win ŋata turo cikirok pere gi cege. 16Adaki turo nywomirok, Rwoth Were pa Isiraili waco. Adaki k'acel kwoŋ win timo gi gero ameno ri cege. Neni win nike wikituro cikirok mewin ŋey wibedi g'adieri ri mon mewin.
Ndelo ma thumo banja cegin
17Wiolo Rwoth gi wac mewin. Kucel wipenjo ni, “Waolo go nedi?” Gi waco ni, “Kisi ŋata timo reco ber ruwaŋ Rwoth, aka omaro jo.” Kosa gi penjo ni, “Nikune Were ma jatiro?”
Currently Selected:
Malaki 2: DHOCDC
Highlight
Share
Copy
Want to have your highlights saved across all your devices? Sign up or sign in
Dhopadhola DC Bible © Bible Society of Uganda, 2018.
