Mariko 11

Yezu enjila mu Yerusalemu

(Mat 21.1-11; Luk 19.28-40; Yoh 12.12-19)

1Yezu ni baleekelwa beewe baaba nga bali ambi ni Yerusalemu, nga boolile i Betifage shishiili ambi ni Besaniya, khu lukiingi lwa Zeyituni, warumana babili khu baleekelwa beewe ibweeni. 2Wabaloma ari, “Ni mutsye mu shaalo shishibali iburaangisi, kane munyoole ipunda inyana, yeesi umuundu yeesi akhekhalatsakakho ta, mukikangulule mukirere ano. 3Ne umuundu yeesi n'abareeba ari, ‘Shiina kila mukangulula ipunda iyo?’ Mumulomela muri, ‘Umukasya alikho akikana. Kane akikobose lwanyuma lwayo.’ ”

4Baleekelwa baatsya banyoola ipunda bakibowele imulyaango we intsu, ambi ni kumukhoosi, bakikangulula. 5Kila babaandu abe babemikhile ambi babareeba bari, “Shiina kila mulikho mukangulula ipunda iyo?” 6Bababoolela sheesi Yezu abalomela khukhwilamo, abo babaaba awo, babalekha baatsya ni ipunda.

7Baleekelwa bayila ipunda iyo isi Yezu, bakirakho bikwaaro byabwe khu mukoongo, wakiikhalakho. 8Babaandu babaandi bakali busa baala bikwaaro byabwe khu mukhoosi, ni babaandi baala asi kamasaafu ke bisaala keesi barema khu misaala.#11.8 Yino yaba indweela khu saambo tsye Bayudaaya, iye khukhwakaanilamo umukeni umurye. 9#Zab 118.25,26Babaandu babaaba ibweeni wa Yezu ni naabo babaaba bamuloondilekho, abe balikho bakukuulila angaaki bari,

“Hosana!

Nga ali n'ikhabi uyo uwiitsa mu lisiina ly'Omukasya.

10Buyiinga bwa kuuka wefwe Daudi, bubuuli khukhwiitsa buli n'ikhabi.

Hosana mu ngaaki mwikulu!”

11Yezu wenjila mu Yerusalemu, lwanyuma watsya mu Lisaayilo Likhulu. N'amala khukhwofwaasa nalundi wemenielesa buli shitweela, warura ibulafu, atweela ni baleekelwa beewe baatsya i Besaniya, khulwekhuba abe antsye bulikho bwilabula.

Yezu awuuma kusaala ku figi

(Mat 21.18-19)

12Ni bwasha shifukhu shishelakho nga baama i Besaniya, Yezu abe intsala ilikho imulya. 13Ne niye n'abonela kusaala ku figi khukhwaama aleeyi nga kulikho kamasaafu, Yezu wakutsya ambi nga ambaasa ari kane anyoolekho bibyaamo alye. N'akwolakho, wanyoola nga mbaakho shishiindu ta, akhali kamasaafu konyene, khulwekhuba yino siyaba imbuka iye kusaala kuno khurakho bibyaamo ta. 14Kila Yezu akutsuba nga akulomela ari, “S'ukane wanatsakekho bibyaamo ta, nalundi mbaawo umuundu yeesi ulilyakho khu bibyaamo byoowo ta!” Baleekelwa beewe bawulila nga n'aloma shino.

Yezu nga ali mu Lisaayilo Likhulu

(Mat 21.12-17; Luk 19.45-48; Yoh 2.13-22)

15Yezu ni baleekelwa beewe ni boola i Yerusalemu, wenjila mu Lisaayilo Likhulu. Warakikha khutimisa abo babaaba mukari nga bakulisa bibiindu, ni nabo babaaba nga bakula. Wafumalikhaka tsimeetsa tsy'abo babaaba nga bayuusaŋana tsinusu, ni bitsoloŋo byaabo babaaba nga bakulisa kamawuusi. 16Walekha khufukiilisa umuundu yeesi khubirisila shishiindu shoosi mu Lisaayilo Likhulu ta. 17#Isay 56.7 Yer 7.11Lwanyuma kila arakikha khuleekela babaandu nga aloma ari, “Bibyaronebwa bikhosefu biloma biri, ‘Intsu yase ililaangibwa iri intsu yeesi kamanaambo koosi kaloombelamo.’ Ne ari inywe mwakishuusa mwakikesa nimwo mweesi babiifwi bebisa.”

18Ne basaayi bakhulu ni baleekeli be Kamakaambila ka Musa ni bawulila bino, barakikha khukhala kamakyesi ke khumwiira. Shino shaba abe khulwekhuba barya Yezu, isaambo yeesi abe babaandu boosi beyaanga isaambo yeesi abe aleekelamo. 19Angolobe ni ola, Yezu ni baleekelwa barura baatsya ibulafu we shiriimba.

Sheesi khwiyika khu kusaala ku figi

(Mat 21.20-22)

20Ni bwasha kumutikhinyi, baleekelwa ni baaba nga babira, babona bari kusaala ku figi tsana kwomile, ni tsiindi tseene. 21Petero washebulila sheesi Yezu aloma, kila amuloma ari, “Umuleekeli bonakho! Kusaala ku figi kwesi watsubile ingoloobe kwomile.”

22Yezu wabelamo ari, “Ni mube ni khufukiilila mu Wele. 23#Mat 17.20; 1 Kor 13.2Ilala, imbaboolela indi ni muba ni khufukiilila, mwalekha khubamo ni khukhwikanakana mu myoyo kyenywe ta, ne mwafukiilila muri sheesi muloma kane shikholikhe, munyala mwalomela lukiingi luno muri, ‘Khuulikha ano utsye ukwe mu nyaantsa,’ ilala shilikholikha. 24Ni nashiryo, imbaboolela indi, buli shoosi sheesi musaba khubirira mu khuloomba, ni mufukiilile muri mwamalile khaale khushifuna, ilala kane mushifune.

25 # Mat 6.14,15 “Ne busheele n'uba nga uloomba, yiyakhila uyo yeesi uwakhukholakho buubi; nio Paapa woowo uli mwikulu naye anyalise khukhwiyakhila iwe bibyonako byoowo. 26Ne n'ulekha khukhwiyakhila bashoowo, akhaba Paapa woowo uli mu ngaaki naye singane akhwiyashile bibyonako byoowo ta.”#11.26 Bibyaronebwa bikhosefu bikhale bilala bilooselakho khanyilili khano.

Shireebo shishiwamba khu bunyala bwa Yezu

(Mat 21.23-27; Luk 20.1-8)

27Yezu ni baleekelwa beewe ndi lundi bakobola i Yerusalemu. N'aba nga alikho akyeenda mu Lisaayilo Likhulu, basaayi bakhulu ni baleekeli be Kamakaambila ka Musa, ni basakhulu beetsa is'ali. 28Bamureeba bari, “Uli na bunyala shiina khukhola bibiindu bino? Namwe naanu niye uwakhuwa iwe bunyala bwe khubikhola?”

29Yezu wabelamo ari, “Ise inabareeba inywe shireebo shitweela shonyene; nga mwantsililemo, kane nase imbaboolele esi namisa bunyala bwe khukhola bibiindu bino. 30Ni mumboolele: bunyala bwa Yohana Umubatisa bwe khubatisa babaandu, bwama mwikulu, namwe bwama mu baandu?”

31Kila bareebana bonyene nga baloma bari, “Ni kane khulome khuri, ‘Bunyala bwama mwikulu,’ kane Yezu akhureebe ari, ‘Ne shiina kila mukhafukiilila byeesi Yohana aloma?’ 32Namwe ni khuloma khuri, abwamisa mu baandu, babaandu boosi bashimanya bari Yohana Umubatisa aba umuŋoosi umwene.” 33Kila khulwe khuurya babaandu belamo Yezu nga baloma bari, “Sikhumanya ta.”

Yezu naye wabelamo ari, “Nase singene imbaboolele esi ise namisa bunyala bwe khukhola bibiindu bino ta.”

Currently Selected:

Mariko 11: LCE

Highlight

Copy