Mariko 10
10
Yezu aleekela khu bye bukhwaale
(Mat 19.1-12; Luk 16.18)
1Yezu n'arura awo watsya i Yuda, nalundi wambukha shanjelekha we luluutsi Yorudaani. Indi lundi kamatuuli ke babaandu kabusanila isi aba; ne nga ni yaba isaambo yeewe, indi lundi Yezu weloosela khubaleekela.
2Abawo Bafarisaayo babakana khukhakilisa Yezu. Kila bamureeba bari, “Shifukiilisibwa mu makaambila keefwe umusaani khuloba umukhasi weewe wamuwoona watsya?” 3Yezu wabareeba ari, “Ne mu makaambila Musa abalakila khukhola muryeena?”
4 #
Maka 24.1-4; Mat 5.31 Belamo bari, “Musa afukiilila umusaani khurona buurone bwe khuwoona umukhasi, lwanyuma wawoona umukhasi khutsya.”
5Ne Yezu wabelamo ari, “Musa arona aryo likaambila khulwekhuba kimyoyo kyeenywe sikilekikhila ta. 6#Rak 1.27; 5.2Ne busa khukhwamila ilala makiboole ke khubuumbibwa khwe shiibala, ‘Wele abuumba boombi, umusaani n'umukhasi. 7#Rak 2.24Ni khulwe ilomo yino, umusaani alekha paapawe ni maayi weewe, watsya wayila umukhasi. 8Niye n'umukhasi weewe bekyela nga umuundu mutweela.’ Ni nashiryo baba si bashiili babili ta, ne njeeba baba bekyelile kumubili mutweela. 9Nashiryo sheesi Wele amalile khutubaasa atweela, umuundu yeesi s'akha washawukhanisa ta.”
10Nga bamalile khukhwilayo mu ntsu, baleekelwa beewe bamureeba lundi khu biindu bibiwaamba khu lomo yino. 11#Mat 5.32; 1 Kor 7.10,11Yezu wabaloma ari, “Buli mundu yeesi uloba umukhasi weewe wamuwona, nalundi wayila umukhasi ukuundi, aba wasaalile kumusaango kwe khumulekha niye, watsya wakhola buyeyani. 12Namwe umukhasi uloba umuseetsa weewe watsya wakhwalikha khu museetsa ukuundi, umukhasi uyo aba wasaalile kumusaango kwe khukhola buyeyani.”
Yezu awa babaana bakyeekhe tsikhabi
(Mat 19.13-15; Luk 18.15-17)
13Abawo babaandu babareera babaana bafwiiti bari Yezu abarekho kamakhono nga abawa tsikhabi. Ne baleekelwa beewe barafuyila abo babareera babaana.
14Ne Yezu n'abona shino shalekha khumusangaasa ta, kila abalomela ari, “Ni mulekhe babaana bafwiiti beetse isi ndi, mukhabakhangabisa ta; khulwekhuba Buyiinga bwa Wele buli bwe babaandu babafwanana nga bano bari. 15#Mat 18.3Ilala, imbaboolela ndi, umuundu yeesi n'akhakaanila Buyiinga bwa Wele nga umwaana umufwiiti n'akhola, s'alibwingilamo ta.” 16Yezu wahamba babaana mu makhono keewe, wabawa tsikhabi nga abarakho kamakhono.
Umusaani umuyindifu
(Mat 19.16-30; Luk 18.18-30)
17Yezu n'aba nga ali khu ntsila atsya, abawo umusaani mutweela uwetsa butima, wafukhamila mu moni tsa Yezu, wareeba ari, “Iwe Umuleekeli umulayi, ikhole shilayi shiina nio ningile mu bulamu bubukhawawo ta?”
18Yezu wamureeba ari, “Lwashiina unaanga uri indi umulayi? Mbaawo umuundu umulayi ta, akhali Wele yenyene. 19#Luky 20.13; Maka 5.17 Luky 20.14; Maka 5.18 Luky 20.15; Maka 5.19 Luky 20.16; Maka 5.20 Luky 20.12; Maka 5.16Iwe wamanya kamakaambila ni kali: ‘Ukheera ta, ukhayeyana ta, ukheeba ta, ukhaapa umuundu washoowo liyino ta, ukhalyakhana ta, yiisatsakamo paapawo ni maayiwo shiriifwa.’ ”
20Umusaani tsana welamo Yezu ari, “Umuleekeli, ise khukhwaama mu bwaana bwase, nawamba kamakaambila ako koosi.”
21Yezu wamulolelela, waamukana isaambo yeesi elamo. Kila alomela umusaani tsana ari, “Utaambakho shishiindu shitweela shonyene. N'utsye ingo woowo, ukulise bibiindu byoowo byoosi byeesi uli ni nabyo, tsinusu tsitsyamamo utsikabile bataambi, nio unyalise khuuba ni buyiindifu mwikulu. Lwanyuma wiitse unondekho.”
22Ne umusaani n'awulila bino, wawamo kamaani nalundi watsya nga wakhalale. Khulwekhuba aba umusaani umuyindifu naabi.
23Lwanyuma Yezu webotokhelesa tsimoni mu baleekelwa beewe, wabaloma ari, “Nga shili shihangafu abo babaali ni buyiindifu khukhwinjila mu Buyiinga bwa Wele!”
24Bilomo bino byeyangisa baleekelwa beewe. Ne Yezu weloosela ari, “Baana baase, nga shili shihangafu khukhwinjila mu Buyiinga bwa Wele!#10.24 Bibyaronebwa bitweela bilooselakho biri, “Abo babaara bubwiyikinwa mu buyiindifu.” 25Shili shishaangu iŋamya khubirira mu mwaanya kwe mbiso, khufuurisa umuundu umuyindifu khukhwinjila mu Buyiinga bwa Wele.”
26Shino shabeyangisa ni khufuurisakho, kila bereeba bonyene bari, “Naanu unyala khuwonesebwa?”
27Yezu wabalolelela, kila aloma ari, “Khusintsilila khu baandu ni bashilolelela seshinyalikha ta. Ne khusintsilila khu Wele shinyalikha, khulwekhuba mbaawo shishinyala shakhaasa Wele ta.”
28Petero wamuloma ari, “Bona ifwe khwalekha bibiindu byoosi khwetsa khukhulondelela iwe.”
29Yezu wamwilamo ari, “Ilala, mbaboolela ndi, buli umuundu yeesi uwalekha be shikuuka sheewe, namwe babandaaye beewe basiinde ni bakooko, namwe maayi weewe, namwe paapa weewe, namwe babaana, namwe liiswa, khulwe khubeela ise ni khulwe khubeela Kamakhuuwa Kamalayi, 30alifuna kumukheemba. Kumukheemba kuno akufuna ari mu bulamu buno nga aweebwa babandaaye ni bakooko ni bamaayi ni babaana ni kamaswa, khukhupanisamo kimilundi shitoondo shitweela, ni mu muboolo kukwiitsa, alifuna bulamu bubukhawawo ta. 31#Mat 20.16; Luk 13.30Ne babaandu bakali babaali babanyoowa ari, baliba babamalilisayo, ni babamalilisayo ari, baliba nibo babanyoowa.”
Yezu akanikha lundi khu bye khufwa khweewe
(Mat 20.17-19; Luk 18.31-34)
32Ni baaba nga bali khu ntsila baniina i Yerusalemu, Yezu wabaraangilila, baleekelwa beewe ni babaandu babaandi babamuloondakho baarya naabi. Yezu indi lundi weesa andulo baleekelwa beewe, wananikha khubaboolela bibiindu abe bibiitsya khumubakho. 33Wabaloma ari: “Ari khulikho khuniina i Yerusalemu; ne nga khwolile iyo, Umwaana w'Omuundu kane bamuwaaneyo mu makhono ke basaayi bakhulu ni baleekeli be Kamakaambila ka Musa. Kane bamukhalile kumusaango kwe khufwa, lwanyuma bamuwaaneyo isi Banaambo.#10.33 Yezu aba amanyisa Baroma babaaba nga nibo bawuli mu biseela ibyo. 34Banaambo bano balimubirisa buubi, bamufuutsile kamare, bamukhupe, nio bamwiire. Lwanyuma lwe bifukhu bitaru alilamukha khukhwaama mu bafu.”
Khuloomba khwa Yakobo ni Yohana
(Mat 20.20-28)
35Yakobo ni Yohana, babaana ba Zebedaayo, baatsya isi Yezu bamuloomba bari, “Umuleekeli, iliwo sheesi khulikho khukhuloomba ukhukholele.”
36Kila abareeba ari, “Mukana imbakholele shiina?” 37Belamo bari, “Nga wolile mu Buyiinga bwoowo bwe shiriifwa, khufukiilile ifwe khukhwikhala ni nawe, mutweela khu mukhono kwoowo kumulayi ukuundi khu munyeletsi.”
38 #
Luk 12.50
Ne Yezu wabelamo ari, “Inywe sheesi mulikho muloomba simwashimanyile ta. Inywe munyala khuunywa khu shikopo she butsiina#10.38 Mu byaronebwa bikhosefu, “Khunywa khu shikopo” shimanyisa khutaambisibwa. sheesi ise intsya khunywakho? Namwe inywe munyala mwafuna khubatisibwa khwesi ise intsya khubatisibwamo?”
39Bamwiilamo bari, “Ee, khunyala.”
Kila Yezu abalomela ari, “Shikopo sheesi intsya khunywakho, ni nanywe mulinywakho; akhaba ni khubatisibwa khwesi ise intsya khufuna, ni nanywe muli khufuna. 40Ne bye khubafukiilila khukhwikhala oba khu mukhono kwase kumulayi namwe kumunyeletsi, ibyo sibili ise niye ukhalawo ta. Ibyo bamala khu biŋoonaŋoonela babeene babyo.”
41Baleekelwa babaramile liikhumi ni bawulila shino, bakhalalila Yakobo ni Yohana.
42 #
Luk 22.25,26 Ne Yezu walaanga baleekelwa beewe boosi atweela kila aloma ari, “Mwamanya nga abo babaali bawuli mu Banaambo ni babayila ni kamaani. Nalundi baraangilisi baawe be angaaki babalikho ni bunyala. 43#Mat 23.11; Mrk 9.35; Luk 22.26Ne mus'iinywe, shikhaba shiryo ta; khayo buli ukana khuuba umuraangilisi mus'iinywe, abe niye umwakaanisi wenywe. 44Uyo ukana khuuba unyoowa mwiinywe, akha khuuba niye umwakaanisi uwa boosi. 45Khulwekhuba Umwaana w'Omuundu etsa khuuba umwakaanisi, ne akhuba indi abewo babamwakaanisa niye ta. Nalundi etsa khuwaanayo bulamu bweewe nga nibwo bubusikula babaandu bakali.”
Yezu awonesa Batimayo
(Mat 20.29-34; Luk 18.35-43)
46Yezu atweela ni baleekelwa beewe, ni lituuli lye babaandu bakyeenda boola i Yeriko. Ni baaba nga baama i Yeriko batsya, umubofu abe usabilisa bibiindu, bari Batimayo, nga ali umwaana uwa Timayo, waba abe wekhaale khu ndulo khwe intsila. 47Ne n'awulila ari Yezu uwe i Nazareti niye uli khubira, kila arakikha khukukuulila angaaki nga aloma ari, “Yezu, umwitsukhulu uwa Daudi, n'umambile shiisa!” 48Babaandu bakali bamukhookhela bari, “Sila busa.” Ne niye weloosela ni khulookha khuminyisakho nga aloma ari, “Umwitsukhulu uwa Daudi, n'umambile shiisa.”
49Yezu wema kila aloma ari, “Ni mumulaange etse.”
Kila bamulaanga nga baloma bari, “Alikho akhulaanga. Yiitsa, ukharya ta!” 50Batimayo watuuma ingubo yeewe, wenyukha watsya isi Yezu.
51Yezu wamureeba ari, “Ukana ikhukholele shiina?”
Naye welamo ari, “Umuleekeli, ingana tsimoni tsase tsibimbukhe, imbone.”
52Yezu wamuloma ari, “N'utsye, khulwekhuba lwe khufukiilila khwoowo wawonisibwile.”
Ni abweene awo tsimoni tseewe tsabimbukha warakikha khubona, walondelela Yezu.
Currently Selected:
Mariko 10: LCE
Highlight
Share
Copy
Want to have your highlights saved across all your devices? Sign up or sign in
Lumasaaba Catholic Bible © The Bible Society of Uganda, 2017.
