Luka 6

Yezu bamureeba khu biwamba khu Sabato

(Mat 12.1-8; Mrk 2.23-28)

1 # Maka 23.25 Lutweela khu shifukhu sha Sabato, Yezu n'aba nga akyeenda mu mukuunda kwe iŋaano, baleekelwa beewe bakusa bikala bye iŋaano, babifungila mu bikalabo byaawe, baalya. 2Batweela khu Bafarisaayo babareeba bari, “Lwashiina mukhola sheesi likaambila lyeefwe likhafukiilila khukhola khu Sabato?”

3Yezu wabelamo ari, “Simwasomatsakakho byeesi Daudi akhola ta? Nga niye ni babaandu beewe, intsala ni yabalya? 4#Lev 24.9#1 Sam 21.1-6Niye enjila mu ntsu ya Wele, wabukula kumukaati kukwawaanibwayo isi Wele, niye umweene walya, wawakho ni babaandu beesi aba nabo, ate nga shaba she kumusilo khuulya kumukaati kuno, khurusakho basaayi bonyene?”

5Aryo wabaloma lundi ari, “Umwaana w'Omuundu niye Umukasya uwa Sabato.”

Yezu awonesa umusaani we kumukhono kumuleme

(Mat 12.9-14; Mrk 3.1-6)

6Khu shifukhu sha Sabato shishiindi, Yezu watsya mu ntsu iye khukhwisaayilamo waleekela. Ne mwabamo umusaani uwaba ni kumukhono kweewe kumulayi nga kumuleme. 7Baleekeli be kamakaambila ka Musa, ni Bafarisaayo bamulolelela ni khukhwimenielesa khukali nga bakana babone oba nga kane awonesele khu Sabato, nio bamisilekho bamutsuntsumilise. 8Ne Yezu wamanya byeesi baaba bambaasa, waloma umusaani uwe kumukhono kumuleme ari, “Yinyukha wiime akari awo.” Aryo umusaani wenyukha weema akari. 9Lwanyuma Yezu wabaloma ari, “Imbareeba shireebo; shifukiilisibwa ni likaambila lyeenywe khukhola buulayi khu Sabato namwe khukhola buubi? Khuwonesa bulamu namwe khubuhesa?” 10Wabebotokhelesamo tsimoni boosi, lwanyuma waloma umusaani ari, “Tsalaasa kumukhono kwoowo.” Umusaani naye wakhola aryo, ni kumukhono kweewe kwaba kwakhile. 11Ne boosi bakhalala naabi, barakikha khukanikhanamo bonyene na bonyene, shiina sheesi banyala khukhola Yezu.

Yezu arobola baarume liikhumi na babili

(Mat 10.1-4; Mrk 3.13-19)

12Mu bifukhu ibyo, Yezu watsya khu lukiingi khuloomba. Ibweene iyo wabuyayo shiilo shoosi nga aloomba Wele. 13Ne antsye ni bwasha kumutikhinyi, walaanga baleekelwa beewe, mu nibo warobolamo liikhumi na babili, beesi alaanga ari baarume. 14Nibo bano: Simoni isi atwiikha ari Petero, ni Andereya wandaaye uwa Petero oyo, Yakobo ni Yohana, Filipo ni Batolomayo, 15Matayo ni Tomasi, Yakobo umwaana wa Alufayo, ni Simoni uwaba mutweela khuba Zelote, 16Yuda umwaana wa Yakobo, ni Yuda Isikalyoti uwamulyamo luwomelo.

Yezu aleekela lundi awonesa

(Mat 4.23-25)

17Yezu weekha ni baarume nga ama khu lukiingi, weema mu shiifwo shishakwalaala. Lituuli likali lye baleekelwa beewe, ni babaandu bakali bababawo nga baama mu Yuda mwoosi, ni Yerusalemu, ni babaandi babaama i Tulo ni Sidoni, bisiintsa bibibotokhelele inyaantsa. 18Babaandu bano boosi beetsa khumurekeeresa ni khuwonesebwa tsindwale tsaawe. Ni naabo boosi babataambisibwa ni kimisaambwa kimibi, boosi bawonesebwa. 19Babaandu boosi bakhakakho bari bamutiilekho lwekhuba abe kamaani kaaba karura khukhwaama mu niye kabawonesa boosi.

Kumwikhoyo ni Kumutaambo

(Mat 5.1-12)

20Yezu wenyusa tsimoni isi baleekelwa beewe waloma ari: “Muli n'ikhabi inywe bataambi, lwekhuba Buyiinga bwa Wele buli bubweenywe.

21“Muli n'ikhabi inywe babaali intsala ana ari, lwekhuba mulikura. Muli ni khabi inywe babalila ari, lwekhuba mulitsekha.

22 # 1 Pet 4.14 “Muli ni khabi inywe noola babaandu bababiiyila lundi babekaana babatyaabila, babakhoma khulw'Omwaana w'Omuundu.

23 # 2 Kim 36.16; Bur 7.52 “Nimwikhoyele shifukhu isho, mwisutake lwe kumwikhoyo, lwekhuba kumukheemba kweenywe mwikulu kuliba mukali, lwekhuba bakuuka baawe bakholatsaka baryo baŋoosi.

24“N'enga she kumutaambo isi inywe bayindifu ana ari, lwekhuba inywe mwafuna khaale kumwikhoyo kweenywe.

25“Nga she kumutaambo inywe babekurire ana ari, lwekhuba intsala ilibalya. Nga she kumutaambo inywe babatsekha ana ari, lwekhuba muli wunamila lundi mulile.

26“Nga she kumutaambo inywe beesi babaandu babuyila, lwekhuba bakuuka baawe baloma bibiindu nibyo bitweela isi baŋoosi be bubeeyi.

Khukana basiku

(Mat 5.38-48; 7.12a)

27“Ne imbaboolela inywe babaali khukhundekeeresa ndi, ni mukanaatsake basiku beenywe, mukholatsake bulayi ibo babababiiyiila. 28Muwe tsiikhabi abo babakholakho bibiindu biibi, muloombele ibo bababaraangana inywe. 29Isi uyo ukhukhupa luuyi khu lusaya, muyusile lusaya lwe khu lubeka lulundi nalwo. Ni n'oyo unyala wakhurusakho ikooti yoowo, lekha ayile ni isaati nayo. 30Buli mundu yeesi ukhuloomba shishiindu, n'umuwaatsake, ni nooyo ukhunuulakho shishiindu shoowo, ukhamuloomba khu shikhukobosela ta. 31#Tob 4.15; Mat 7.12Ne ni mukholatsake khu baandu babaandi muryo nga nanywe ni mukana nibo babakhole khuusi inywe.

32“Inywe ni mukana ibo babakana bonyene, ikhabi shiina yeesi muli nayo? Mbo ni baboonaki nabo bakhola baryo nga bakana ibo bababakana. 33Ne ni mukholela buulayi isi ibo babakholela inywe buulayi bonyene, ikhabi shiina yeesi muli nayo? Mbo ni baboonaki nabo bakhola baryo. 34Ne inywe ni mwikhopesa bibiindu byeenywe isi ibo beesi musuubila khubakobosela bonyene, ikhabi shiina yeesi muli nayo? Mbo ni baboonaki nabo bakhola baryo, bekhopesa baboonaki bashaawe beesi bambaasa bari kane babakobosele mu bwitsufu. 35#Sir 4.10,11Ne ni mukanaatsake basiku beenywe, nalundi mubakholatsake buulayi, mubekhopatsake nga simwiyikina muri, kane babakobosele shishiindu shoosi ta. Ni nashiryo, kumukheemba kweenywe kuliba mukali, lundi muliba babaana booyo, Wele Uli Angaaki Lukali. Lwekhuba Wele ali umulayi isi babakhasiima ni baabi beene. 36Nimube be shiisa nga Paapa weenywe n'ali ni shiisa.

Khukhalila babaandi kumusaango

(Mat 7.1-5)

37“Mukhakhalila babaandi kumusaango ta, nio nanywe Wele alekhe khuubakhalila kumusaango ta. Mukhekiitsatsaka babaandi muri kwabafuurire ta, nio nanywe Wele alekhe khubekiitsa ari kwabafuurire ta. Ni mwiyakhile basheenywe, nio nanywe Wele alibeyakhila. 38Ni muwaane isi babaandi, nio nanywe Wele alibawa. Ilala muliweebwa shipimo shibakhila shilayi, sheesi bamiinile, shishisisikhiwile bulayi, lundi nga shitsutsukhaka asi, nisho shilitsukhiwa mu makhono keenywe. Lwekhuba shipimo sheesi muraambisa khupimilamo babaandi nisho sheesi Wele aliraambisa khubapimilamo nanywe.”

39 # Mat 15.14 Kila Yezu ababoolela lusimo luno ari, “Umuundu umubofu anyala khuraangilila umubofu washeewe? N'akhola aryo, boombi si banyala baakwa mwilowo? 40#Mat 10.24,25; Yoh 13.16; 15.20Mbaawo umuleekelwa ufuura umuleekeli weewe ta, ne n'aba nga waleekiwiile mu bwitsufu, naye kane abe nga umuleekeli weewe.”

41“Iwe shiina shikila walolelela khasosono khakhaali mu moni ya wandaayo, ne walekha khumanya kukyeenga kukuuli mu moni yoowo wamweene? 42Unyala uryeena waloma wandaayo uri, ‘Wandaayase khayo ikhurusemo khasosono khakhaali mu moni yoowo,’ n'enga wamweene s'unyala khubona kukyeenga kukuuli mu moni yoowo wamweene ta? Uba wiwombesa busa. Iwe umubeeyi nyoowa urusemo kukyeenga kukuuli mu moni yoowo wamweene, nio unyalise khubona bulayi khukhwinyusamo khasosono khakhaali mu moni ya wandaayo.”

Kusaala ni bibyaamo byakwo

(Mat 7.16-20; Mrk 12.33-35)

43“Mbaawo kusaala kulayi kukwaana bibyaamo biibi ta, namwe mbaawo kusaala kuubi kukwaana bibyaamo bilayi ta. 44#Mat 12.33Buli kusaala bakumanyila khu byaamo byakwo byeesi kwama. S'unyala wabuta tsisabibu khukhwaama khu mawa ta, namwe si babuta kamakhuyu khukhwaama khu marakalu ta. 45#Mat 12.34Umuundu umulayi arusa bilayi nga abyaamisa mwibiikhilo lyeewe lilayi lye mu mwoyo kweewe. Ne umuundu umubi naye arusa biibi byeewe nga abyaamisa mwibiikhilo lyeewe liibi. Lwekhuba kumunwa kw'omundu kuloma ibyo bibitsuule mu mwoyo kweewe.”

Umwombakhi umukyesi n'umusilu

(Mat 7.24-27)

46“Lwashiina munangilisa muri, ‘Umukasya, Umukasya’, ne nga simukhola byeesi mbalomela khukhola ta? 47Buli mundu yeesi uwiitsa isiindi, wawulila bilomo byase, ne wakhola nga ni biloma, kane imbokesanise umuundu uyo nga nafwana: 48afwana nga umuundu uwayaba kumusiinji kumuleeyi naabi, wombekha intsu yeewe, warakikhila kumusiinji khu lwanda. Ne kameetsi ni ketsula kasalasala, kumukhuura kwakhupa intsu iyo ni kamaani, ne yalekha khutengaala ta, lwekhuba intsu iyo yombakhiwa khu lwanda. 49Ne umuundu uwulila bilomo byase bino, ne walekha khubikholelakho ta, ali nga umuundu uwombekha intsu yeewe khwiloba nga mbakhulima kumusiinji ta, ne kameetsi ni ketsula, kumukhuura kwakikhupa, intsu iyo yakwa, ni kumuwuulo kwayo kwaba kwe kamaani!”

Currently Selected:

Luka 6: LCE

Highlight

Copy