Luka 5

Yezu arobola baleekelwa baakiboole

(Mat 4.18-22; Mrk 1.16-20)

1 # Mat 13.1,2; Mrk 3.9,10; 4.1 Shifukhu shitweela Yezu n'aba nga wemile khu ndulo khwe inyaantsa ye Genesareeti, babaandu bakali beetsa nga bayindana lwe khukana khuwulilisa shilomo sha Wele. 2Wabona kamakhoŋolo kabili khu ndulo khwe inyaantsa, nga balobi be tsinyeeni bakalekhile awo, balikho basiinga butiimba bwaabwe. 3Yezu waniina mu likhoŋolo litweela lilyaba lya Simoni, wamuloomba alisyendesekho khakyeekhe khu meetsi khurura khu lwoomu. Aryo waliikhalamo, waleekela babaandu.

4Nga wamalile khukanikha isi babaandu, waloma Simoni ari, “Syendesa likhoŋolo mu shisiba, mwikhise butiimba bweenywe, mulobe tsinyeeni.”

5 # Yoh 21.3 Simoni wamwiilamo ari, “Umuleekeli, khwaraambile naabi shiilo shoosi, ne mbakhuwambisakho shishiindu shoosi ta. Ne khukhwaama n'ulomele uryo, kane induumemo butiimba.” 6#Yoh 21.6Ne ni batuuma butiimba mu meetsi, bawambisa tsinyeeni swa, wakila ni butiimba bwaabwe bwenga khukhalikha. 7Baryo bamesela bashaabwe babaaba mwikhoŋolo lilindi bari beetse babayeete. Beetsa betsusa kamakhoŋolo koombi, ambi kesiikhe mu meetsi.

8Ne nga Simoni Petero waboone shino, wakwa aasi ebikyele bya Yezu, wamuloma ari, “Umukasya, n'undekhe, lwekhuba ise ndi umuundu umwonaki.” 9Lwekhuba niye ni basheewe beesi aba nabo, beyaanga naabi lwe tsinyeeni tsingali tseesi bawambisa. 10Boosi akhaba Yakobo ni Yohana, babaana ba Zebedaayo, babaaba basheewe ba Simoni, beyaanga. Ne Yezu waloma Simoni ari, “Ukharya ta, lwekhuba khukhwaama shaleelo, kane ube ureera babaandu isiindi.”

11Baryo bakhweesa kamakhoŋolo kaawe bakareera khu lwoomu, balekha byoosi, baloondelela Yezu.

Yezu awonesa umusaani

(Mat 8.1-4; Mrk 1.40-45)

12Ni lwoola, Yezu n'aba nga ali mu shiriimba shitweela, abawo umusaani uweetsa is'ali, nga wetsuule bulwaale bwe bikeenge. Ne niye n'etsa isi Yezu, wakwa asi wefumalikha, wamwikontselela nga aloma ari, “Umukasya nga abeele wakanile, unyala khukhumpyeluusa.”

13Yezu wenyusa kumukhono kweewe wamutiilakho wamuloma ari, “Ee ingana, n'uwonesewe.” Lubaluba, bulwaale bwe bikeenge bwamururakho.

14 # Lev 14.1-32 Yezu wamukhonyakilila nga amuloma ari, “Ukhaboolelakho umuundu yeesi ta, ne n'utsye wiyokesane isi umusaayi akhwimenielese, uwaneyo shiwaanwa lwe khuwonesebwa khwoowo nga Musa n'alakila. Shino shibe she khubonelakho isi babaandu shiri wawonisibwile.”

15Ne ndi khumanyikha khwa Yezu khweloosela busa osi, ni kamatuuli ke babaandu bakali, kabusana khumuwulila ni khuwonesebwa tsindwale tsaawe. 16Ne Yezu niye nga anyala wabarurakho imbuka ikiindi, watsya mu mubiimbi yenyene, waloomba.

Yezu awonesa umusaani uwakataala

(Mat 9.1-8; Mrk 2.1-12)

17Lutweela Yezu aba nga aleekela, mu baandu babaaba nga bekhaale awo bamurekeeresa, mwabamo Bafarisaayo ni baleekeli be Kamakaambila ka Musa babaaba bamile mu buli shiriimba she, Galilaaya, ni Yuda ni Yerusalemu. Ni kamaani k'Omukasya kaaba kali khu Yezu khuwonesa babaandu. 18Aabawo basaani babeetsa nga basutile umusaani uwaba wakataala khu lusaamba, baweentsa kamakyesi ke khumwingisa mu ntsu bamure mu moni tsa Yezu. 19Ne ni bakhabona isaambo yoosi iye khumwingisilamo lwe babaandu bakali, baniina khu ntsu#5.19 mu Palesitayini tsintsu tsaabwe tsaba tsabaambalikha busa khu ngaaki. khu ngaaki. Basambulako ahaandu bamubirisilamo nga ali khu lusaamba lweewe, bamura akari mu baandu mu moni tsa Yezu.

20Ne Yezu n'abona khufukiilila khwawe, waloma umusaani ari, “Mulebe, bibyonako byoowo byakhwiyakhiilwe!”

21Bafarisaayo ni baleekeli be Kamakaambila ka Musa barakikha khuloma bonyene bari, “Uyu naanu, ufwotsola Wele? Naanu unyala khukhwiyakhila bibyonako akhali Wele yenyene?”

22Ne Yezu n'amanya bibyambaaso byaawe, wabelamo ari, “Lwashiina mwambaasa bibiindu nga bino mu myoyo kyeenywe? 23Shishaangu nisho shili ena? Khuloma ndi, ‘Bibyonako byoowo byakhwiyakhiilwe’, namwe khuloma ndi, ‘Yinyukha ukyende?’ 24Ne shili lwe khubokesanisa ndi Umwaana w'Omuundu ali ni bunyala khu shiibala khukhwiyakhila bibyonako.”

Aryo waloma umusaani uwakataala ari, “Ikhuloma iwe ndi, yinyukha, usute lusaamba lwoowo, ukoboleyo ingo woowo.” 25Lubaluba, umusaani winyukha mu moni tsaawe boosi nga babona, wasuta lusaamba lweewe, welayo ingo weewe, nga aruuya Wele. 26Boosi bababawo, beyaanga lukali, baruuya Wele, lundi baarya nga baloma bari, “Ilala shaleelo khwaboone bye kamakaanga!”

Yezu alaanga Levi

(Mat 9.9-13; Mrk 2.13-17)

27Lwanyuma lwa bino, Yezu warura ibulafu watsya, ne wabona umubusanisi we kumusolo, lisiina lyeewe bari Levi, nga wikhaale mu shifwo isi babusanisila kumusolo. Yezu wamuloma ari, “Inondekho.” 28Levi wenyukha, walekha byoosi wamuloondakho.

29Lwanyuma Levi wateekhela Yezu kamayiiya kamaboofu mu ntsu yeewe, ne abaawo lituuli likali lye babusanisi be kumusolo ni babaandu swa busa, beetsa bekhala baalya ni nabo. 30#Luk 15.1,2Ne Bafarisaayo ni baleekeli baawe be Kamakaambila ka Musa, beŋuluŋuunyila baleekelwa ba Yezu bari, “Shiina kila muliila, lundi mwanyweela atweela ni babusanisi be kumusolo ni baboonaki?”

31Ne Yezu wabelamo ari, “Babaandu balamu si batsya isi umukaangi ta, ne njeeba balwaale nibo babaatsya. 32Ise shineetsa khulaanga bakhosefu khukhwibiiyisa ta, ne khurusakho baboonaki bonyene.”

Yezu bamureeba khu bye khubuya intsala

(Mat 9.14-17; Mrk 2.18-22)

33Batweela khu nibo bareeba Yezu bari, “Lwashiina baleekelwa ba Yohana Umubatisa babuya intsala tsifuunda ngali, lundi baloomba, ni baleekelwa be Bafarisaayo nabo bakhola baryo, ne baboowo lwawa balya lundi banywa?”

34Ne Yezu wabelamo ari, “Munyala khubuyisa intsala bakyeni booyo ukhweele, nga umweene ashiiliwo ni nabo? 35Ne bifukhu kane biitse byoole, isi ukhweele alibarusibwakho, ni nabo balibuya intsala mu bifukhu ibyo.”

36Lwanyuma wabakanikhila lusimo luno ari: “Mbaawo umuundu uwinuula shishaapa khu ngubo imbya washinabila khu ngubo ingore ta. Umuundu uyo n'akhola aryo, aba wonakisile ingubo yeewe imbya, ni shishaapa shishamile khu ngubo imbya, sishinyala khulekhaana ni ngubo ingore ta. 37Namwe mbaawo umuundu utsukha iviini inyana mu kungutsi tsingore ta. Umuundu n'akhola aryo, iviini inyana inyala khukhwinuula tsikungutsi itsyo, ni viini yatsutsukha, ni tsikungutsi batsifiilwa. 38Ne iviini nyana yaakha yatsukhiwa mu kungutsi tsiimbya. 39Nalundi mbaawo umuundu yeesi uba wamalile khuunywa iviini indule, uwandikanile khuunywa iviini inyana ta, lwekhuba aloma ari, ‘Indule niyo indayi khuminyisa.’ ”

Currently Selected:

Luka 5: LCE

Highlight

Copy