Luka 4

Khukhakibwa khwa Yezu

(Mat 4.1-11; Mrk 1.12-13)

1Yezu wakobola nga ama khu luutsi Yorudaani nga witsuule Umwoyo Umukhosefu; Umwoyo uyo wamuraangilila wamuyila mu mubiimbi, 2ibweene iyo wamalayo bifukhu kamakhumi kane nga akhakibwa ni Sitaani. S'alyakho khakhaandu khoosi mu bifukhu ibyo ta, biryo nga byaweelekho intsala yamulya.

3Sitaani wamuloma ari, “Ilala iwe noola uli Umwaana uwa Wele, lomela libaale lino likyele biilyo.”

4 # Maka 8.3 Yezu wamwiilamo ari, “Sharonebwa shiri, ‘Umuundu s'akana abatsake umulamu lwe biilyo byonyene ta.’ ”

5Lwanyuma Sitaani wamuniinisa khu shifwo shisheyingakho angaaki mu mbuka njeekhe busa, wamwokesa buyiinga bwoosi bwe mu shiibala. 6Sitaani waloma Yezu ari, “Kane ikhuwe bunyala ibwo bwoosi, ni shiriifwa shishiilimo shoosi, lwekhuba byayimambisibwa ise, ni nase ngabila buli mundu yeesi isi ngana. 7Nashiryo singa ufukhama asi wantsisaaya, bino byoosi kane bibe bibyoowo.”

8 # Maka 6.13 Yezu wamwiilamo ari, “Bibyaronebwa biloma biri, ‘Wisaayatsaka Umukasya Wele woowo, umwakaanisatsake niye yenyene.’ ”

9Sitaani wamuraangilila lundi wamuyila i Yerusalemu, wamwimisa khu ngaaki khu litikiiyi lilifuura buleeyi lye Lisaayilo Likhulu, wamuloma ari, “Iwe noola uli Umwaana uwa Wele, suna asi awo. 10#Zab 91.11,12Lwekhuba sharonebwa shiri, ‘Wele alilakila bamalayika beewe bakhutseete bulayi.’ 11Nalundi sharonebwa shiri, ‘Balikhusutila angaaki mu makhono kaawe, nio ulekhe khukhwituya shikyele shoowo khwibaale ta.’ ”

12 # Maka 6.16 Yezu wamwiilamo ari, “Sharonebwa shiri, ‘Ukhakhakatsaka Umukasya Wele woowo ta.’ ”

13Sitaani n'amala khumukhakilisa musaambo tsoosi, wamulekhakho watsya, khukhwoolesa lundi khu mbuka ikiindi.

Yezu ni buraambi bweewe i Galilaaya

(Mat 4.12-17; Mrk 1.14-15)

14Abweenewo, nga ali ni kamaani k'Omwoyo Umukhosefu, Yezu wakobola i Galilaaya. Lubuyi lweewe lwafuma osi mu byaalo bibibotokhelelewo. 15Waleekela mu ntsu tsaawe tse khukhwisaayilamo, nga boosi bamubuyila.

Yezu bamwikaana i Nazareti

(Mat 13.53-58; Mrk 6.1-6)

16Lwanyuma Yezu weetsa i Nazareti isi atsowela, watsya mu ntsu iye khukhwisaayilamo, khu shifukhu sha Sabato, nga niyabatsaka isaambo yeewe. Wenyukha khusoma bibyaronebwa bikhosefu. 17Bamuwa buurone bw'omuŋoosi Yisaaya. Wabikhula shitabo, wanyoola shisiintsa isi sharonebwa shiri:

18 # Isay 61.1,2 “Umwoyo w'Omukasya andi khwiise,

Lwekhuba wayintsukhakho kamafura,

khuboolela bataambi kamakhuuwa kamalayi.

Wandumile khuboolela babowe ari kane balekhuuliwe,

n'isi babofu ari kane babimbuliwe tsimoni,

ni khulekhuula ibo boosi babamiinilisibwa,

19ni khuboolela babaandu kumwikhoyo kweesi

Umukasya atsya khutimililamo babaandu beewe.”

20Aryo Yezu wawulikusa buurone tsana, wabukoboselayo umwakaanisi, wekhala asi. Babaandu boosi bababawo mu ntsu iye khukhwisaayilamo, bamwomiisilakho tsimoni. 21Aryo warakikha khukanikha nga ababoolela ari; “Bibyaronebwa bikhosefu bino byoleleele lwe shalelo, nga ni muwulile ni kamaru keenywe.”

22Boosi bamulomakho bulayi, beyaanga lwe bilomo bilayi bibyetsula shiisa byeesi akanikha. Bareeba bari, “Uyu s'ali niye umwaana wa Yozefu?”

23Yezu wabaloma ari, “Ilala mulinomela lusimo luno muri, ‘Umukaangi, yiwonesa wamweene.’ Lundi mulinomela muri, ‘Kholelela ni na ano, mu shiriimba shoowo, ibyo byoosi byeesi khwawulila nga ubikholela i Kaperunaumu.’ ”

24 # Yoh 4.44 Yezu waloselakho ari, “Ilala imbaboolela indi, mbaawo umuŋoosi isi babaandu be mu shiriimba she waawe bafukiilisilamo ta. 25#1 Bay 17.1Ne mu ŋali imbaboolela ndi, abawo banamulekhwa bakali mu Isiraeli, mu bifukhu bya Eliya, mu mbuka yeesi likulu lyekaliwilawo ifula yalekha khukwa ta, khumala kimiiko kitaru ni kimyeesi kisesaba, ni ntsala ngali yaakwa mu shaalo shoosi. 26#1 Bay 17.8-16Ne Eliya s'arumiwa isi ikhaba na mutweela khu nibo ta, khurusakho isi namulekhwa we Zarefasi mu shaalo sha Sidoni. 27#2 Bay 5.1-14Lundi abawo babaandu bakali mu Isiraeli babalwala bulwaale bwe bikeenge, mu bifukhu by'omuŋoosi Elisa, ne mbaawo namutweela khu nibo uwaŋoonebwakho ta, khurusakho Nayamani yenyene, uwaba umu Siriya.”

28Babaandu boosi babaaba mu ntsu iye khukhwisaayilamo ni bawulila bilomo bino, betsula lirima. 29Baryo benyukha basindikhilisa Yezu khumurusa ibulafu we shiriimba, bamuyila khu ndulo khwe lukoongo khweesi shiriimba shaawe shombekhewa, nga bakana bari bamukholowe ilumya. 30Ne niye wababiramo boosi akari, wakyeenda watsya.

Umuundu ulikho shisaambwa shiibi

(Mrk 1.21-28)

31Lwanyuma Yezu weekha i Kaperunaumu, mu shiriimba she Galilaaya, khu Sabato waleekela babaandu. 32#Mat 7.28,29Babaandu beyaanga lwe saambo ye khuleekela kweewe, lwekhuba aleekela ni bunyala.

33Muntsu iye khukhwisaayilamo mwabamo umusaani uwabakho shisaambwa shiibi, wayokesela angaaki ni likono likali ari, 34“Wo yaaya, iwe Yezu we Nazareti, ukhufunisa ifwe shiina? Wetsile khukhuwesa ifwe? Ise nakhumanya iwe nga n'uli, Uli Umukhosefu wa Wele.”

35Yezu wakhookhela shisaambwa shiibi ari, “Sila busa umururekho!.” Shiryo shisaambwa shakhupa umusaani asi akari mu baandu, shamururakho nga sishamukholilekho buubi bwoosi ta.

36Babaandu boosi beyaanga busa, baloma bonyene na bonyene bari, “Khuleekela shiina khuno? Lwekhuba ni bunyala ni kamaani, umusaani uyu alakila kimisaambwa kimibi khurura mu baandu!” 37Karyo Kamakhuuwa kano kakawamba khu Yezu kasalanila mu byaalo byoosi bibibotokhelelewo.

Yezu awonesa babaandu bakali

(Mat 8.14-17; Mrk 1.29-34)

38Yezu wenyukha warura mu ntsu iye khukhwisaayilamo, wenjila mu ntsu ya Simoni. Ne maayi umumasaala wa Simoni aba mulwaale nga alikho anikina, nga kamayima kamuwaambile, babaandu bekoontselela Yezu bari amuyeete. 39Aryo Yezu watsya weema isi umutsiina, wakhookhela kamayima, lubaluba kamururakho. Khaangukho wenyukha wabakholela she khulya.

40Lwanyuma angoloobe awo nga inyaanga yakwiile, ibo boosi babaaba ni babaandu baawe nga balwaalile tsindwale tsikhali ndweela ta, babareera isi Yezu, naye watsya nga arakho kamakhono keewe khu buli mutsiina, wabawonesa boosi. 41Ni kimisaambwa kimibi kyaba nga kirura mu baandu bakali nga kiyokesa kiri, “Iwe Uli Umwaana uwa Wele.” Yezu wakhookhela kimisaambwa nga s'akifukiilila khuloma ta, lwekhuba kyamanya kiri niye Kristu.

42Kumutikhinyi mu mamilimili, Yezu warura mu ntsu tsana, watsya mu shifwo shikhalimo babaandu ta. Ne babaandu bamuweentsa, ne ni bamunyoola, balekha khukana bari abarurekho ta. 43Ne niye wabelamo ari, “Shintsakhila khuboolela kamakhuuwa kamalayi ke Buyiinga bwa Wele mu biriimba bibiindi nabyo, lwekhuba isho nisho shishakila Wele wanduma ise mu shiibala.”

44Aryo weloosela khuleekela mu tsintsu tsye khukhwisaayilamo tse Yuda.

Currently Selected:

Luka 4: LCE

Highlight

Copy