Luka 23

Yezu nga ali mu moni tsa Pilato

(Mat 27.1-2,11-14; Mrk 15.1-5; Yoh 18.28-38)

1Baryo, babaandu boosi babaaba mu lubuusano, benyukha bayila Yezu wa Pilato. 2Ibweene iyo barakikha khumuwabila nga baloma bari, “Umusaani yuno khwamunyoolele nga akosaasa babaandu be linaambo lyeefwe, nga abareesa khuuwanda kumusolo isi Kayisaali, nalundi nga elaanga khuuba niye Kristu Umuyiinga.”

3Kila Pilato wamureeba ari, “Iwe uli Umuyiinga we Bayudaaya?”

Yezu wamwiilamo ari, “Shili nga iwe n'ulomele.”

4Aryo Pilato waloma basaayi bakhulu ni lituuli lye babaandu boosi ari, “Ise simbona ilomo iye kumusaango khu mundu yuno ta.”

5Ne nibo beloosela khutsuntsumilisa bari, “Niye asasamasa babaandu ni indeekela yeewe mu Yuda mwoosi. Anyoowela mu Galilaaya, ni aluno woolile ni neeno yoosi.”

Yezu bamwakaanisa wa Herode

6Ne Pilato nga wawuliile shino, wareeba ari, “Umuundu yuno umu Galilaaya?” 7Naye n'ashimanyakho ari Yezu ama mu shisiintsa shishiwuliwa ni Herode, wamwakaanisayo isi Herode, uwaba nga naye ali mu Yerusalemu mu bifukhu ibyo.

8Ne Herode n'abona Yezu, wekhoya naabi, lwekhuba awulilatsakakho busa bilomo byeewe, ne nga khukhwaama khaale aba akana khu mubonakho, nga asuubila khubonakho nga akhola she kamakaanga shoosi. 9Herode wareeba Yezu bireebo bikali, ne Yezu walekha khumwiilamo ni lomo yoosi ta. 10Basaayi bakhulu ni baleekeli be kamakaambila ka Musa, bemikhawo nga bamutsuntsumilisa naabi. 11Aryo Herode ni basilikhale beewe, bakhomyaasaka Yezu nga bamutyabila. Bamukwaarisa ingubo imelamela, lwanyuma bamukobosayo isi Pilato. 12Khukhwaama ni khu shifukhu sheenesho, Herode ni Pilato bekyela be busaale, ne nga abe mataayi baaba babiiyanila.

Yezu akhalilwa kumusaango kwe Khuufwa

(Mat 25.15-26; Mrk 15.6-15; Yoh 18.39; 19.16)

13Pilato walaanga atweela basaayi bakhulu, ni bawuli ni babaandu, 14wabaloma ari, “Inywe mundereere ano umuundu yuno nga muloma muri akoraanisaka babaandu. Ne bona ise namureebelesile mu moni tseenywe, ne nakhunyoolakho ilomo yoosi ikila mwamuwabila ta. 15Ikhaba ni Herode naye wakhunyoolakho ilomo yoosi isi mumufunisa ta, lwekhuba wamukhukoboseele fwabeene nga ni mumubona. Umuundu yuno mbaawo sheesi akholile shishakhila khumwiirisa ta. 16Ni nashiryo, ni ngane imale khumulatsakakho, kane imulekhuule.” 17Ne khu buli mayiiya ke Khubirakho, abe Pilato ali ni khulekhuulakho umubowe mutweela esi babaandu bakanatsaka bari alekhuulibwe.

18Ne lituuli lye babaandu bayokesela angaaki bari, “Uyo n'umwiire, ne ifwe ukhulekhuulile Baraba.” 19(Ne Baraba uyo aba wabowebwa mu mapuusu lwe khureera shishitulungu shishaba mu shiriimba isho, nilwe bubwiiri.)

20Ne Pilato wakanikha lundi isi bali nga akana khulekhuula Yezu. 21Ne nibo beloosela khuyokesela angaaki bari, “Mutsaangilile khu musalaba, mutsaangilile khu musalaba.”

22Aryo Pilato wabakanikhayo lundi ifuunda iye khataru ari, “Ne lwashiina? Shiina shisheene sheesi akholile? Ise simbona ilomo yoosi khu niye ikila yamwiirisa ta. Aso ni kane imale khumulatsakakho, kane imulekhuule.”

23Ne nibo beloosela khuyokesela angaaki lukali lweene bari, Yezu akha atsaangililwe khu musalaba, ni khuyokesa khwawe khwabiramo. 24Aryo kila Pilato akhalawo ari, sheesi bakana shibakholewele. 25Aryo wabalekhuulila umuundu yeesi baakana, uwaba wabowebwa lwe shishitulungu ni bubwiiri. Ne wawayo Yezu khumukhola nga ni bakana.

Bakhasi be Yerusalemu balilila Yezu

26Ulwo basilikhale ni baaba nga bayila Yezu, bawamba Simoni Umu Kurene, uwaba ama mu shaalo nga etsa mu shiriimba, bamutwikhisa kumusalaba khukusuta nga alondelela Yezu.

27Lituuli lye babaandu bakali bamuloondakho, ni mu nibo mwabamo bakhasi babaaba balila lundi nga bamwantsuyila. 28Ne Yezu weshebukha, wabaloma ari, “Bakhasi be Yerusalemu, mukhaandilila ise ta, ne ni mwililile mwabeene ni babaana beenywe. 29Lwekhuba bifukhu bilyoola lweesi babaandu baliloma bari, ‘Nga bali ni tsikhabi bakhasi bakuumba, ni bisoombo bibikhasaalatsakakho ta, ni kamabeele kakakhanunisatsakakho ta.’ 30#Hos 10.8; Bimb 6.16Lwanyuma balilakikha khuloma tsinjiinji bari, ‘Ni mukhukwekho,’ ni tsingoongo bari, ‘Ni mukhubiimbilile.’ 31Lwekhuba babaandu ni bakhola shino khu kusaala kubisi, ne khu kusaala kukwoomu, shiliiba shiryeena?”

Yezu atsaangililwa khu musalaba

32Abawo basaani babaandi babili, bafuniaki be kamakaambila, nabo bayilibwa khukhwiiribwila atweela ni Yezu. 33Ne ni boola mu shifwo sheesi balaanga bari “Shihanga,” bamutsaangilila abweene awo, atweela ni bafuniaki be kamakaambila tsana, mutweela khu mukhono kwa Yezu kumulayi, n'ukuundi khu mukhono kumunyeletsi. 34#Zab 22.18Yezu waloma ari, “Paapa, n'ubeyakhile, lwekhuba si bamanyile byeesi bali khukhola ta.”

Baryo bakabanana bikwaaro byeewe nga babikhupilakho bukokha.

35 # Zab 22.7 Babaandu bemikha balolelela, ni bawuli be Bayudaaya bamwoonela nga baloma bari, “Awonesatsaka babaandi, ari ne yiwonese umweene, noola niye ali Kristu, Umurobole wa Wele.”

36 # Zab 69.21 Ni basilikhale nabo beetsa bamutsekhelela, beetsa is'ali bamuwa iviini indulutse, nga baloma bari, 37“Iwe noola uli Umuyiinga we Bayudaaya, ni wiwonese wamweene.”

38Ne angaaki khu musalaba kweewe abaawo burone bubuloma buri, “YUNO NIYE UMUYINGA WE BAYUDAAYA.”

39Mutweela khu beesi kumusaango kwafuura, abe uwatsaangililwa atweela ni Yezu warakikha khufwotsola Yezu nga aloma ari, “Iwe s'uli niye Kristu ta? Ni wiwonese wamweene, ni nafwe nafwe ukhuwonese.”

40Ne ukuundi uyo wamwikiitsa, nga aloma ari, “Iwe ni khuurya, s'urya Wele ta? Bona ifwe khuli khu shitaambiso shitweela busa ni naye. 41Ne ifwe, iwe ni nase, kumusaango kwakhufuurire lweebyo byeesi khwakholile. Ne umusaani uyu, mbaawo shiibi shoosi sheesi akholile ta.”

42Lwanyuma waloma Yezu ari, “Yezu, ushebulilatsaka lweesi uliitsila mu shiriifwa she buyiinga bwoowo.”

43Yezu wamwiilamo ari, “Ilala, ikhuboolela ndi, shaleelo kane ube ni nase mu shifwo she sangaalo mwikulu.”

Khuufwa khwa Yezu

(Mat 27.45-56; Mrk 15.33-41; Yoh 19.28-30)

44 # Luky 26.31-33 Ulwo tsisaawa tsaba nga tsisesaba tse mwihangilwe, shishiilima shakwawo khu shiibala shoosi, khukhwoolesa khu saawa nga syeenda tse angoloobe, 45lwekhuba inyaanga yakamisa khukhwaburukha. Ni ingubo iyatiimbibwa mu Lisaayilo Likhulu yonuukhamo khabili akari. 46#Zab 31.5Yezu walomela angaaki ni likono likali ari, “Paapa, mu mikhono kyoowo indamo bulamu bwase.” Aryo nga n'amala khuloma aryo, wikhisa kumwoyo kweewe wafwa.

47Umukhulu we kamaye n'abona ibyo byoosi bibibelewo, wabuyila Wele nga aloma ari, “Ilala umusaani yuno abeele umuundu umukwalaafu.”

48Ni kamatuuli ke babaandu bababawo nga babusaane, ni babona bibibelewo bino, bekhupaka mu shifuba nga belayo ingo wawe. 49#Luk 8.2,3Ne ibo boosi abe babamanya Yezu, ni bakhasi babamuloondelela khukhwaama i Galilaaya, bemikha aleeyikho, nga balolelela bibiindu bino byoosi.

Khusiikhiwa khwa Yezu

(Mat 27.57-61; Mrk 15.42-47; Yoh 19.38-42)

50-51Abawo umusaani lisiina lyeewe Yozefu, uwaba umukhulu mu shiriimba she Yuda shishilaangibwa bari Alimaseya. Abe ali umusaani umulayi, nga naye abe aliindilila khukhwiitsa khwe Buyiinga bwa Wele. Ne abe ikhaba nga aba mutweela khu bakhulu be mu lukhobo, ne niye s'afukiilisana ni neesho sheesi baakhalawo ni sheesi baakhola ta. 52Yozefu yuno watsya isi Pilato, wamuloomba kumulaambo kwa Yezu. 53Aryo wakuwanulayo, wakubowelela musuukha iwaanga, wakura mu ŋani iyabeetsebwa mu lwanda, nga yakhusiikhiwatsakamo umuundu yeesi ta. 54Shifukhu shaba she khukhwiŋoonaŋoona, lwekhuba Sabato yaba ili ambi khurakikha.

55Ne bakhasi babaloondelela Yezu khukhwaama i Galilaaya, baatsya ni Yozefu, babona iŋani, ni kumulaambo kwa Yezu nga ni kwareebwamo. 56#Luky 20.10; Maka 5.14Lwanyuma bakobolayo ingo, baŋoonaŋoona bibiwunya bulayi ni kamafura. Ne khu shifukhu sha Sabato bawola, nga likaambila ni liloma.

Currently Selected:

Luka 23: LCE

Highlight

Copy