Luka 22
22
Luwomelo lwe khuwamba Yezu
(Mat 26.1-5; Mrk 14.1-2; Yoh 11.45-53)
1 #
Luky 12.1-27
Ulwo kamayiiya ke kimikaati kikhasiila kakalaangibwa bari Kamayiiya ke Khubirakho kaaba kali ambi khukhwoola. 2Basaayi bakhulu ni baleekeli be Kamakaambila ka Musa, bakhala kamakyesi ke khukhwiira Yezu mu shimoonyo busa, lwekhuba baarya lwe babaandu.
Yuda afukiilila khuulya mu Yezu luwomelo
(Mat 26.14-16; Mrk 14.10-11)
3Lwanyuma Sitaani wenjila mu Yuda, uwalaangiwa Isikalyoti, mutweela khu baleekelwa liikhumi na babili. 4Aryo Yuda warurayo watsya waboolanila atweela ni basaayi bakhulu, ni bakhulu be basilikhale babaaliinda Lisaayilo Likhulu, nga ni kane amuweyo isi bali. 5Nabo bekhoya, balakaana ni khumuwa tsinusu. 6Yuda wafukiilila, aryo wahentselesa imbuka iye khuwayo Yezu isi bali, nga lituuli lye babaandu shililiwo ta.
Yezu aŋoonaŋoona khuulya Kamayiiya ke Khubirakho
(Mat 26.17-25; Mrk 14.12-21; Yoh 13.21-30)
7Lwanyuma shifukhu she kamayiiya ke kimikaati kikhasiila shoola; khweesi baaba baakha berirakho khasheese khe khushebulililakho Kamayiiya ke Khubirakho. 8Yezu warumana Petero ni Yohana, nga abaloma ari, “Ni mutsye mukhuŋoonaŋonele ekhuliila Kamayiiya ke Khubirakho.”
9Nabo bamureeba bari, “Ukana khutsye khukaŋoonaŋonele waheena?”
10Naye Yezu wabaloma ari, “Bona, ni munaba nga mwinjila mu shiriimba, inabawo umusaani uneetsa nga wetyukhile isoongwe iye kameetsi abakaanane, umweeneyo mumulondelele, khukhwoolesa mu ntsu isi kane enjilemo. 11Muryo mulome umweene intsu muri, ‘Umuleekeli akhureeba ari, shiseenge shiili ena mweesi niye ni baleekelwa beewe banaliila Kamayiiya ke Khubirakho?’ 12Umweeneyo kane abokese shiseenge shikali she khungaaki shishiŋoonaŋonewele, mutsye mubweenemwo muŋoonaŋoone.”
13Baryo baatsya, banyoola nga ni bili bibyeene byeesi Yezu abaloma, baŋoonaŋoona Kamayiiya ke Khubirakho.
She shiilo shimaliilisi sh'Omukasya
(Mat 26.26-30; Mrk 14.22-26; 1 Kor 11.23-25)
14Inyaanga ni yoola, Yezu wekhala asi khuuliila atweela ni baarume beewe. 15Wabaloma ari, “Ise nakanile naabi khuliila atweela ni nanywe Kamayiiya ke Khubirakho nga ishiili khutaambisibwa ta. 16Lwekhuba imbaboolela ndi, singene indyekho lundi ni nanywe kamayiiya kano khukhwoolesa ni kalyoolelela mu Buyiinga bwa Wele.”
17Aryo Yezu wabukula shikhopo, wasiima Wele, waloma ari, “Ni mwakaanile shino mukabanane, 18lwekhuba imbaboolela ndi, khukhwaama shaleelo, siindinywakho lundi ni nanywe khu byaamo bye kumusabibu, khukhwoolesa Buyiinga bwa Wele ni bulyoola.”
19Lwanyuma wabukula kumukaati wasiima Wele, wakumenyulamo, wabawa nga aloma ari, “Kuno nikwo kumubili kwase, kukuwanibwileyo khulwenywe. Ni mukholatsake muryo lwe khukhushebulilatsaka ise.”
20 #
Yer 31.31-34
Musaambo niyo ndweela ni baamala khuulya she ashilo, wabawa shikhopo nga aloma ari, “Shikhopo shino nisho shishiŋaŋasa Indakaano ya Wele imbya ikholebwele lwe kamafuki kaase kakatsutsukha khulwenywe.”
21 #
Zab 41.9
“Ne bona, kumukhono kwooyo unandyamo luwomelo kuli atweela ni nase khu shikabilo. 22Ilala Umwaana w'Omuundu alikhuutsya nga ni shakholebwa ni Wele, ne kumutaambo kwamunyoolele umuundu uyo umulyamo luwomelo!”
23Shino shakila baleekelwa bareebana bonyene na bonyene bari naanu khu nibo ukane akhole shishiindu nga shino.
Khukhabisana lwe bukhulu
(Mat 18.1-5)
24 #
Mat 18.1; Mrk 9.34; Luk 9.46 Lwanyuma abalukhawo tsikhaando mu baleekelwa nga baloma bari naanu khu nibo uwambaasibwa khuuba umukhulu khufuura. 25Yezu wabaloma ari, “Bayiinga be kamanaambo bawula babaandu baawe, ni naabo babaaba ni bunyala khu baandi balomewakho khuuba nibo bayeeti baawe. 26#Mat 23.11; Mrk 9.35#Mat 20.25-27; Mrk 10.42-44Ne inywe si muli muryo ta. Khurusakho uyo ufuura bukhulu mwiinywe niye abe nga umukyeekhe; n'umuraangilisi abe nga niye umwakaanisi. 27#Yoh 13.12-15Ne naanu umukhulu khufuurisa? Uyo uwikhala asi khuulya, namwe uyo uwakaanisa she khulya? S'ali uyo uwikhala asi khuulya? Ne bona ise indi umwakaanisi akari mwiinywe. 28Inywe muli babaandu abo babemikhile ni nase mu bikosi byase byoosi. 29Ni nase imbawa inywe buyiinga nga Paapa n'abumba ise, 30#Mat 19.28nio muliile lundi munyweele khu shikabilo shase mu Buyiinga bwase. Nalundi mulikhala khu bitsoloŋo bye shiriifwa, mukhalile bikuuka liikhumi na bibili bya Isiraeli kimisaango.”
Yezu akanikha khukhwikaana khwa Petero
(Mat 26.31-35; Mrk 14.27-31; Yoh 13.36-38)
31Yezu waloma ari, “Simoni, Simoni, Sitaani wekontseleele afukiilisibwe nio abaseese inywe mweesi nga iŋaano. 32Ne ise nakhuloombeele iwe Simoni, indi khufukiilila khwoowo khulekhe khuwawo ta. Ne n'ulimala khukalukha, ukumisatsaka bandaayo.”
33Ne Petero welamo ari, “Umukasya, ise neŋoonaŋonele khuutsya ni nawe mu bubowe ni mu khufwa.”
34Yezu wamwiilamo ari, “Petero ikhuboolela ndi, itwaya inaba nga ishiili khukholyookha ta, iwe kane untsikaane tsifuunda tsitaru uri akhumanya ise ta.”
Khasawu, isawu, ni Lurima
35 #
Mat 10.9,10; Mrk 6.8,9; Luk 9.3; 10.4 Lwanyuma Yezu wabaloma ari, “Ise ni nabarumana inywe ibulafu khuutsya nga si muli ni busawu bwe tsinusu, namwe tsisawu ta, namwe nga ni mwatsya akhali bilaalo ta, mwabakho ni sheesi mwikoomba?”
Nabo belamo bari, “Mbaawo ta.”
36Yezu wabalomela ari, “Ne ari khayo buli mundu uli ni khasawu khe tsinusu atsye nakho, ni nooyo uli ni sawu yeewe atsye nayo, ne uyo ukhali ni lurima ta, akulise ingubo yeewe alukule. 37#Isay 53.12Lwekhuba imbaboolela ndi bibyaronebwa biri, ‘Abaalibwila atweela ni baboonaki,’ isho shaakha khukhwoolelela mus'iise. Ilala, ibyo bibyaronebwa khusiise byaakha khukhwoolelesebwa.”
38Kila baleekelwa baloma bari, “Umukasya, bona tsindima tsibili itsishi.”
Naye wabelamo ari, “Isho shimala.”
Yezu aloomba Wele khu lukiingi lwe Kimizeyituni
(Mat 26.36-46; Mrk 14.32-42)
39Yezu warura watsya khu lukiingi lwe Kimizeyituni, nga niyaba isaambo yeewe, ni baleekelwa beewe bamuloondakho. 40Ne n'ola mu shifwo isho, wabaloma ari, “Ni muloombe Wele mulekhe khukhwinjila mu khukhonjelesebwa ta.”
41Ne niye wabarurakho libaanga nga esi umuundu anyala khutsukutsa libaale khukhwoola, wafukhama asi, waloomba Wele, 42nga aloma ari, “Paapa, noola ukana, n'undusekho shikhopo shino she kumutaambo, ne akhuba nga ise ni ngana ta, ne iwe sheesi ukana shikholebwe.” 43Malayika wamubonekhela nga ama mwikulu nga amukumisa. 44Ni butsiina nga buli bukali mu mwoyo kweewe, weloosela khuloomba, ni lukyesi lweewe lwaba nga kamafuki kakaroonya asi.
45Aryo wenyukhawo esi aba aloombela, welayo isi baleekelwa beewe, wabanyoola nga bakonele lwe kumutaambo kumukali. 46Wabareeba ari, “Lwashiina mukona? Ni mwinyukhe muloombe, nio mulekhe khwinjila mu khukhonjelesebwa ta.”
Khuwambibwa khwa Yezu
(Mat 26.47-56; Mrk 14.43-50; Yoh 18.3-11)
47Ne Yezu n'aba nga ashikanikha aryo, lituuli lye babaandu lyarura, ni Yuda, mutweela khwiibo liikhumi na babili, nga wabaraangiliile, wesyeenda ambi isi Yezu, wamukwa mu shifuba. 48Ne Yezu waloma ari, “Yuda, ulya mu Mwana w'Omuundu luwomelo nga umukwa mu shifuba?”
49Baleekelwa babaaba bali ni Yezu ni baabona shishiitsya khubawo, baloma bari, “Umukasya, ari khureme ni tsindima tseefwe?” 50Aryo mutweela khu nibo waremakho khukhuru khulayi khw'omwakaanisi w'Omusaayi ufuura bukhulu.
51Ne Yezu waloma ari, “Ikhabayo shiindi shishifwanana shiryo ta.” Aryo wawamba khukhuru khw'Omwakaanisi uyo, wamuwonesa.
52Lwanyuma Yezu waloma basaayi bakhulu ni baraangilisi be basilikhale be Lisaayilo Likhulu ari, “Mwitsile ni tsindima, ni tsimiimbo, nga babetsiliile umunuuli? 53#Luk 19.47; 21.37Buli shifukhu ise nabatsaka ni nanywe mu Lisaayilo Likhulu, ne simwamaamba ta. Ne ari yino niyo isaawa yeenywe lundi niyo imbuka ye bunyala bwe shishiilima.”
Petero ekaana Yezu
(Mat 26.57-58,69-75; Mrk 14.53-54,66-72; Yoh 18.12-18,25-27)
54Baryo bawamba Yezu, bamuyila mu ntsu y'omusaayi ufuura bukhulu, ni Petero naye waba nga wabaloondelele inyuma aleeyikho. 55Ne ni baamala khukhwaasa kumulilo akari mu lwanyi, boosi bekhala asi atweela. Petero naye wekhala atweela ni nabo. 56Ne umukhaana mutweela umwakaanisi n'amubona Petero nga wekhaale abuwaanga bwe kumulilo, wamwofwasa bulayi, waloma ari, “N'umusaani uyu naye abatsaka ni naye.”
57Ne Petero wekaana nga aloma ari, “Mukhas'iwe, ise umuundu uyo si mumanya ta.”
58Lwanyuma lwe mbuka ifwiiti iri, umuundu ukuundi wamubona, waloma ari, “Ni nawe uli mutweela khu nibo.”
Ne Petero welamo ari, “Musaaniwe, si shilikho shiryo ta.”
59Lwanyuma lwe saawa nga ndweela khubirawo, umuundu ukuundi wamunialilisa ni kamaani nga aloma ari, “Mu ŋali umuundu uyu naye abeele ni Yezu, lwekhuba naye ali umu Galilaaya.”
60Ne Petero welamo ari, “Musaaniwe, ise simanya iwe byoloma ta.”
Ne n'aba nga ashikanikha aryo, itwaya yakholyookha. 61Umukasya weshebukha, walolelela Petero. Ni Petero naye washebulila shilomo sheesi Umukasya aba wamulomile ari, “Shaleelo, itwaya inaba nga ishiili khukholyookha ta, ni nawe kane untsikaane tsifuunda tsitaru.” 62Aryo Petero warura ibulafu, walila lukali kamasika.
Yezu bamutyabila lundi bamukhupa
(Mat 26.67-68; Mrk 14.65)
63Ne babaandu babaaba baliindile Yezu nga umubowe, barakikha khumutyabila nga bamukhupa. 64Bamubiimbakho mu moni, bamureebelesa bari, “Iwe khola buŋoosi! Khuboolele, naanu ukhupile?” 65Baamulomakho ni bibiindu bibiindi biikali nga bamufwotsola.
Yezu ayilibwa isi Lukhobo
(Mat 26.59-66; Mrk 14.55-64; Yoh 18.19-24)
66Awo antsye ni bwasha, lukhobo lwe basakhulu be Bayudaaya, basaayi bakhulu, ni baleekeli be kamakaambila ka Musa babusana atweela, baryo bareera Yezu mu lukhobo lwaabwe. 67Kila bamuloma bari, “Khuboolele noola iwe uli Kristu.”
Yezu wabelamo ari, “Ni kane imbaboolele, singene mufukiilile ta. 68Lundi ningene imbareebe shireebo, singene muntsilemo ta. 69Ne khukhwaama khu saawa yino, Umwaana w'Omuundu atsya khwikhala khu mukhono kumulayi kwa Wele Umunyali wa byoosi.”
70Baryo kila boosi bamureeba bari, “Nikhwo khuloma khuri, iwe uli Umwaana uwa Wele?”
Yezu wabelamo ari, “Nga ni mulomele, ise niye.”
71Kila nabo baloma bari, “Ari khukanila shiina ndi bujulisi bubundi? Lwekhuba ifwe fwabeene khwawuliile byeesi umweene ama khuloma.”
Currently Selected:
Luka 22: LCE
Highlight
Share
Copy
Want to have your highlights saved across all your devices? Sign up or sign in
Lumasaaba Catholic Bible © The Bible Society of Uganda, 2017.
