Yohana 9

Yezu abimbula tsimoni tsy'omubofu

1Yezu n'aba nga akyeenda, wabona umusaani uwasaalikha nga ali umubofu. 2Baleekelwa beewe bamureeba bari, “Umuleekeli, naanu niye uwoonaka kila umusaani uyu asaalikha nga ali umubofu? Niye umweene namwe basaali beewe?”

3Yezu welamo ari, “Sishili bari khulwe bibyonako byeewe, namwe khulwe bye basaali beewe, kila umuundu uyu asaalikha nga umubofu ta. Ne khurusakho ndi ali umubofu nio akile bikholwa bya Wele biboneshele mu niye. 4Nga antsye ashiili kumuusi, shakhila khukhole kimilimo kyooyo uwanduma ise. Mbaawo unyala waraamba kumulimo nga antsye bwelabuule ta. 5#Mat 5.14; Yoh 8.12Nga ishiili mu shiibala, ise mba niye buwaanga bwe shiibala.”

6Yezu n'amala khuloma aryo, wafuutsa kamare asi, waroka lifukhuulu mu mare, walihakha khu moni tsy'omusaani umubofu. 7Waloma umubofu ari, “N'utsye wisiinge mwitibo liliili i Siloamu” (Siloamu shimanyisa Khuurumibwa). Nashiryo watsya, wesiinga, wakobola nga tsimoni tsibona.

8Ne bahesanwa b'omusaani uyo, ni babaandu babaandi abe babamubonakho khaale nga wekhaale asabilisa, baloma bari, “Umusaani uyu s'ali niye uwekhalatsaka awo nga asabilisa?” 9Batweelakho baloma bari, “Ee, niye.” Ne babaandi bakhaabisa nga baloma bari, “Taawe, s'ali niye ta. Uyuno amufwanana busa.” Kila umusaani umweene aloma ari, “Niye ise.” 10Bamureeba bari, “Ne tsimoni tsoowo tsibimbushile tsiryeena?” 11Umusaani uyo welamo ari, “Umuundu isi balaanga bari Yezu, arokile lifukhuulu, wambakha khu moni tsase, wanoma ari intsye mu Siloamu nisiinge. Nase natsya, nga ninisingile, tsimoni tsabimbukha.” 12Bamureeba bari, “Umusaani mweene uyo ali waheena?”

Wabelamo ari, “Ise simanya ta.”

Bafarisaayo bawentselesa khuwonesebwa khw'omubofu

13Bayila umusaani uwaba umubofu isi Bafarisaayo. 14Ne yaba khu shifukhu sheesi Yezu arokelamo lifukhuulu wabimbula tsimoni tsy'omusaani uyo, shaba sha Sabato. 15Bafarisaayo nabo lundi baareebelesa umusaani uyo, isaambo isi abimbukhamo tsimoni. Wabaloma ari “Ambakha liiloba khu moni tsase, natsya nasiinga mu moni mwase, narakikha khubona.”

16Batweela khu Bafarisaayo baaloma bari, “Seshinyalikha khuuba nga umuundu ukholile shino ama isi Wele ta, khulwekhuba s'alondelela kamakaambila ke shifukhu sha Sabato ta.” Ne babaandi baloma bari, “Ne abe umuundu aba umwonaki khali anyalile aryeena khukhola bye kamakaanga nga bino?” Lwanyuma abawo khukhwawukhana akari abwe.

17Bafarisaayo lundi bareeba umusaani uwabakho umubofu bari, “Umusaani uyu iwe umulomakho uryeena, khukhwaama nga n'uloma uri akhubimbuule tsimoni?” Welamo ari, “Umusaani uyo ali umuŋoosi.”

18Ne Bayudaaya balekha khufukiilila bari umusaani uyo asaalikha nga ali umubofu, ne nga ari abona ta, khukhwolisa ni balaanga basaali beewe. 19Bareeba basaala beewe bari, “Uyuno ali umwaana wenywe, isi muloma muri asaalikha nga ali umubofu? Shiitsa shiryeena waba nga aluno ari abona?” 20Basaali beewe belamo bari, “Ifwe khwamanyile khuri uyuno ali umwaana wefwe, nalundi khwamanyile khuri asaalikha nga ali umubofu. 21Ne ifwe sikhumanya nga n'abimbukhile tsimoni ta, namwe sikhumanya naanu umubimbuule tsimoni ta. Khukhwaama n'ali umuundu umukhulu, ni mumureebe umweene; lekha umweene ekanikhekho.” 22Basaali beewe baloma baryo khulwe khurya baraangilisi be Bayudaaya, abe babamalile khukhalawo bari umuundu yeesi ukane alome ari Yezu niye Kristu, kane bamwikalewo khuutsya mu ntsu iye khukhwisaayilamo. 23Shino nisho shishakila basaali beewe baloma bari, “Ali umusaani umukhulu, ni mumureebe umweene.”

24Lwanyuma balaanga umusaani abe uwaba umubofu kumulundi kukukhola khabili, bamuloma bari, “Iwe n'uruuye Wele! Ifwe khwamanyile nga umuundu uyu n'ali umwonaki.” 25Umusaani wabelamo ari, “Ise s'imanya oba ali umwonaki namwe ta. Ne ise shishiindu shitweela sheesi imanya shili ndi, naba umubofu, ne ari imbona.” 26Bamureeba bari, “Ne akhukholile aryeena? Akhubimbuule aryeena tsimoni?”

27Welamo ari, “Ise namalile khaale khubaboolela, ne simuwulila ta. Khulwashiina kila mukana niilemo lundi? Namwe nanywe muli khukana khukhwikyela baleekelwa beewe?” 28Bamukhoma. Baloma bari, “Iwe niye uli umuleekelwa w'omusaani uyo. Ne ifwe khuli baleekelwa ba Musa. 29Ifwe khwamanya khuri Wele akanikha ni Musa, ne bibiwaambakana n'umusaani uyu, ifwe sikhumanya isi ama ta.”

30Umusaani uyo wabelamo ari, “Shino she khukhwiyaangisa! Khulwekhuba muloma muri si mumanya isi ama ta, ne bona ise wamimbuule tsimoni tsase. 31Feesi khwamanya khuri Wele s'arekeeresa baboonaki ta, akhali arekeeresa abo babamurya nalundi babakhola sheesi akana. 32Ne khukhwaama khukhubuumbibwa khwe shiibala khaale ni khaale, sishawuliilikhanakho nga abawo umuundu yeesi uwabimbula tsimoni tsy'omuundu uwasaalikha nga ali umubofu ta. 33Ne umuundu yuno nga khurusakho ama isi Wele, busa khali s'anyalile khukhola shishiindu shoositsana ta.”

34Bamuloma bari, “Ne iwe nawe uwasaalikha nga uli umwonaki, iwe nawe unyala uryeena khukhuleekela ifwe?” Bamuwoona khukhwaama mu ntsu ye khukhwisaayilamo.

Khuuba umubofu mu mwoyo

35Yezu n'awulila bari bamuwoonile khukhwaama mu ntsu ye khukhwisaayilamo, ne n'akaanana umusaani uwatsana, wamureeba ari, “Ufukiilila mu Mwana w'Omuundu?”

36Umusaani welamo Yezu ari, “Musakhulu, n'umboolele niye naanu, ni nase kane imufukiililemo.”

37Yezu wamuloma ari, “Wamuboone khaale, nalundi niye umweene yuno niye yeesi ulikho ukanikha ni naye.”

38Waloma Yezu ari, “Umukasya, naafukiilile.” Aryo wafukhama asi wesaaya Yezu.

39Yezu waloma ari, “Ise neetsa mu shiibala khulwe khukhala kumusaango. Nio akile babofu babimbukhe tsimoni; ni naabo bababona bekyele babofu.”

40Bafarisaayo babaaba ni Yezu ni bawulila bino kila baloma bari, “Ari kila uloma uri ifwe nafwe khuli babofu?”

41Yezu wabelamo ari, “Muba nga mumuuli babofu, khali si muli ni kumusaango kwe bubwonaki ta; ne ari ni muloma muri munyala khuubona, shimanyisa shiri muli ni kumusaango kwe bubwonaki.”

Currently Selected:

Yohana 9: LCE

Highlight

Copy