Yohana 10

Lusimo lw'omwaayi ni kamasheese keewe

1Yezu waloma ari, “Ilala, ilala, imbaboolela ndi, umuundu ukhabirira mu mulyaango nga enjila mu litaala lye kamasheese, ne waniinila ahandi busa, uyo aba umwiifwi, nalundi umunuuli. 2Ne umuundu uwingilila mu mulyaango, uyo aba niye umwaayi uwe kamasheese. 3Umweene uyo, umuliindi amwikulilawo kumulyaango, ni kamasheese kawulila likono lyeewe. Alaanga kamasina ke kamasheese keewe, wakarusa ibulafu wakayisa. 4N'amala khuuba nga warusile kamasheese keewe koosi ibulafu, akaraangilila, nako kamulondelela, khulwekhuba kaamanya likono lyeewe. 5Ne umuundu umukyeni busa sikamulondelela ta. Akhali kamwilukha, lwekhuba sikamanya likono ly'omukyeni ta.”

6Yezu araambisa lusimo luno, ne nibo balekha khumanya byeesi aba nga ababoolela, ni bili ta.

Yezu Umwaayi Umulayi

7Aryo lwanyuma Yezu waloma lundi ari: “Ilala, ilala, imbaboolela ndi, ise niye kumulyaango kwe kamasheese. 8Abo boosi babanyoowa ise khukhwiitsa, baaba babiifwi, nalundi banuuli. Ni kamasheese sikabawulila ta. 9Ise niye kumulyaango. Umuundu yeesi ni enjilila mus'iise, aliwonesebwa. Alinjila, lundi arure anyoole kamayilo.

10“Umwiifwi s'etsa khu lwe shishiindu shishindi ta, ne njeeba etsa khukhwiiba, ni khukhwiira, ni khuhesa bibiiliwo. Ne ise neetsa khubawa inywe bulamu, nalundi ndi mube ni nabwo mu bwitsufu.

11 # Sir 18.13 “Ise ndi umwaayi umulayi. Umwaayi umulayi awanayo bulamu bweewe khulwe kamasheese keewe. 12Ne umuraambi uwayisa ari afune kumukheemba, ukhali umweene uwe kamasheese ta, n'abona khatsuutse nga kheetsa, alekha kamasheese watima waatsya, khatsuutse khaluumba kamasheese, khakasalanisa. 13Umwaayi uli umuraambi uwe kumukheemba atima watsya, khulwekhuba ayila kumukheemba, ne kamasheese s'akenaanakho ta.

14 # Mat 11.27; Luk 10.22 “Ise ndi umwaayi umulayi, namanya kamasheese kaase, ni kakaase nako kayimanya samweene. 15Nga Paapa n'amanya ise, ni nase nga ni namanya Paapa, nawanayo bulamu bwase khulwe kamasheese. 16Ne ndi ni kamasheese kakandi kakakhali mu litaala lino ta; ni nako naakha khukareera. Nako kaliwulila likono lyase, kabe ke mwitaala litweela, n'umwaayi abe mutweela.

17“Paapa angana ise khulwekhuba imbaanayo bulamu bwase, nio lwanyuma imbufune lundi. 18Mbaawo umuundu uwundusakho bulamu bwase ta; ne ise imbuwaanayo samweene khu bwase. Indi ni bunyala bwe khubuwaanayo, nalundi ndi ni bunyala bwe khubufuna lundi. Shino nisho sheesi Paapa andakiile khukhola.”

19Khulwe bilomo bino, lundi ndi abawo khukhwawukhana mu Bayudaaya. 20Bakali khu nibo baloma bari, “Alikho shisaambwa, nalundi wakwiile tsintsoli. Lwashiina mumurekeeresa?”

21Ne babaandi baloma bari, “Mbaawo umuundu uli ni kimisaambwa unyala khukanikha ari taawe. Shisaambwa shinyala khubimbula tsimoni tsye babofu?”

Bayudaaya baloba Yezu

22 # 1 Mak 4.36,52-59; 2 Mak 1.18; 10.5 Byaba bifukhu bye bunyifu, ni Kamayiiya ke Khuwanayo i Yerusalemu kaaba katsya mu moni. 23Yezu aba akyeenda mu Lisaayilo Likhulu, mwitikiiyi lya Solomoni. 24Babaandu babuusana, bamwibotokhelela bamureeba bari, “Ulyoolisa ena khukhulekha ifwe nga khwikanakana? Noola iwe niye Kristu, khuboolele lubuula.”

25Yezu wabelamo ari, “Ise nababoolela, ne inywe simufukiilila ta. Buuraambi bwase bweesi inaamba mu lisiina lya Paapa, nibwo bubunganikhakho. 26Ne simufukiilila ta, khulwekhuba si muli kamasheese kakaase ta. 27Kamasheese kakaase kawulila likono lyase, nase nakamanya, lundi nako kanondelela. 28Ise ingawa bulamu bubukhawawo ta. Shikalihela ta, lundi mbaawo ulikawutula khukhwaama mu mukhono kwase ta. 29#Makh 3.1Paapa wase niye uwakaamba ise, niye uminyisa bibiindu byoosi, nashiryo mbaawo umuundu yeesi unyala khuwutula shishiindu shoosi khukhwaama mu mukhono kwa Paapa ta. 30Ise ni Paapa khuli umuundu mutweela.”

31Lundi ndi Bayudaaya bawamba kamabaale bari bamukhupe. 32Ne Yezu wabelamo ari, “Nabookesana kimilimo kimilayi khukhwaama isi Paapa, khu milimo kino kyoosi, milimo shiina khu nikyo kikila mwakhupa kamabaale?”

33 # Lev 24.16 Bayudaaya bamwiilamo bari, “Sikhuli khuutsya khukhupa kamabaale khulwe kimilimo kimilayi ta, ne khulwe khufwotsola Wele. Iwe umuundu busa, ate wilaanga khuuba Wele.”

34 # Zab 82.6 Yezu wabelamo ari, “Sisharonebwa mu makaambila keenywe shiri, ‘Ise inoma ndi muli ba wele’ ta? 35Babeene abo babalaangibwa bari ba wele, nga nibo beesi shilomo sha Wele shetsila, ni bibyaronebwa bikhosefu sibinyala khufuniakibwa ta. 36Kale inywe munyala muryeena khukhunomakho ise, isi Paapa abiitakho tsikhabi warumana mu shiibala, muri ifwotsola Wele, bari khulwekhuba ise nalomile ndi, ‘Ise indi umukhosefu khukhwaama isi Wele?’ 37Ne ni imba nga sinaamba kimilimo kya Paapa, mukhaafukiilila ta. 38Ne ikhaba nga injiraamba, mwakhalekha khufukiilila, ne ni mufukiilile buraambi, nio mumanye muri Paapa ali mus'iise, ni nase ndi mu Paapa.”

39Lundi ndi bakhakakho khumuwamba, ne Yezu wabebisakho watsya. 40#Yoh 1.28Aryo Yezu watsya injelekha we luluutsi Yorudaani, mu shifwo esi Yohana makiboole anyoowa khubatisila, waba ibweene iyo. 41Babaandu bakali beetsa is'ali baloma bari, “Akhaba nga Yohana s'akhola khabonelo khe kamakaanga khoosi ta, ne byoosi byeesi aloma khu mundu yuno, byaba bya ŋali.” 42Ibweene iyo, babaandu bakali bafukiilila mu Yezu.

Currently Selected:

Yohana 10: LCE

Highlight

Copy