Yohana 6

Yezu aliisa babaandu biikana biraano

(Mat 14.13-21; Mrk 6.30-44; Luk 9.10-17)

1Lwanyuma lw'ebyo, Yezu wambukha watsya injelekha we nyaantsa Galilaaya, isi balaanga bari Tiberiya. 2Babaandu bakali bamuloondakho, khulwekhuba abe baboone bye kamakaanga bye khuwonisa balwaale, byeesi Yezu akhola. 3Yezu waniina khu lukiingi wekhala iyo ni baleekelwa beewe. 4Ne Kamayiiya ke Bayudaaya ke Khubirakho abe kali ambi khukhwoola.

5Yezu n'enyusa tsimoni wabona babaandu bakali nga beetsa is'ali. Kila areeba Filipo ari, “Kane khukule waheena biilyo bibinyala byaliisa babaandu bano boosi?” 6Aloma aryo khukhakilisa Filipo, khulwekhuba abe niye umweene wamanyile sheesi atsya khukhola.

7Filipo wamwiilamo ari, “Khuunyalisa buli mutweela khuulyakho khakhaandu khakhaba khakyeekhe khari, kane shiyile tsidinari tsitsoola nga bitoondo bibili nio biilyo bimale.”

8Mutweela khu baleekelwa ba Yezu, ulaangibwa Andereya, nga niye wandaaye uwa Simoni Petero, waloma ari, 9“Iliwo ano umusoleeli mutweela uli ni kimikaati kye ŋaano kiraano, ni tsinyeeni tsibili. Ne khu baandu bano boosi, bino kane bikhole shiina?”

10Yezu waloma ari, “Ni mulomele babaandu bekhale asi.” Khulwekhuba abawo bunyaasi bukali mu shisiintsa isho. Babekhala asi abe boolesa nga basaani biikana biraano. 11Lwanyuma Yezu wabukula kimikaati ikyo, wakiloombela tsikhabi. Nga wamalile, wakikabila babaaba bekhaale asi. Wakhola shitweela ni tsinyeeni khukhwolisa boosi baalya bekura nga ni bakana.

12Ne boosi ni baamala khuulya bekura, Yezu walomela baleekelwa beewe ari, “Ni mubuusanise bubuya buburamiilekho, nio alekhe khubawo shishiindu shoosi shishonekha ta.” 13Baryo babuusanisa bubuya, betsusa bibiipo liikhumi na bibili.

14Babaandu babaabawo ni baabona khabonelo khe kamakaanga khano kheesi Yezu akhola baaloma bari, “Ilala, oyuno niye umuŋoosi isi abe khulindiilila khukhwiitsa mu shiibala.” 15Ne Yezu n'ashimanya ari baneetsa bamuwambe ni kamaani bamwikyese umuyiinga, wabarurakho wilooselayo lundi yenyene, watsya mu ngoongo.

Yezu akyeendela khu meetsi

(Mat 14.22-33; Mrk 6.45-52)

16Imbuka ni yoola iye angoloobe, baleekelwa beewe beekha, baatsya khu nyaantsa. 17Baniina mu likhoŋolo, baatsya bambukha i Kaperunaumu. Antsye abe bwilabuule, ne Yezu abe ashiili khukhwoola isi bali ta. 18Abweene awo abe inyaantsa yananikhile khukululukha, khulwekhuba abe imbewo ilikho iwuutsa ingali.

19Ne ni baaba nga batsiile ni likhoŋolo khumala tsi kilomita nga tsitaru namwe tsine, babona Yezu nga akyeendela khu meetsi nga etsa ambi ni likhoŋolo. Buuri bwabawamba. 20Ne Yezu wabaloma ari, “Mukharya ta. Ise niye uwiitsa.” 21Bakana bari engile mu likhoŋolo, ne lubaluba lyoola shanjelekha khu lwoomu abe isi balikho batsya.

Babaandu baweentsa Yezu

22Ne ni bwasha kumutikhinyi, babaandu babaaba isi likhoŋolo lyaama nio lyambukhe shanjelekha, bashebulila bari abawo likhoŋolo litweela lyonyene. Nalundi bashebulila bari Yezu s'atsiilamo atweela ni baleekelwa beewe ta, akhali nibo baatsya bonyene. 23Akhali ndi abawo kamakhoŋolo kakaandi kakaama i Tiberiya, keetsa khu ndulo khwe nyaantsa, ambi ni mu shifwo mweesi baaliila kimikaati, kyeesi abe Umukasya amalile khuloombela ikhabi. 24Nashiryo ni baabona bari Yezu s'aliyo ta, akhaba baleekelwa beewe, babaandu baniina mu makhoŋolo baatsya i Kaperunaumu, nga baweentsa Yezu.

Yezu niye biilyo bye bulamu

25Ne babaandu ni banyoola Yezu shanjelekha we inyaantsa, bamureeba bari, “Umuleekeli, woolile ino liina?”

26Yezu wabilamo ari, “Ilala, ise imbaboolela ndi, si mulikho mumeentsa khulwekhuba mwabona bye kamakaanga ta. Ne akhali ndi khulwekhuba mwalya kimikaati mwekura. 27#Sir 24.19-22Mukhamalila kamaani khu biilyo bibibola ta, ne akhali ndi ni mumalile kamaani khu biilyo bibikhawawo bye bulamu bubukhawawo ta. Ibyo nibyo byeesi kane Umwaana w'Omuundu abawe. Khulwekhuba umweeene uyo wamala khufukiilisibwa ni Wele Paapa.”

28Nio baamureeba bari, “Kane khukhole khuryeena, nio khube nga khwoolelesile isho sheesi Wele akana khukhole?”

29Yezu wabelamo ari, “Sheesi Wele akana mukhole, nikhwo khufukiilila muuyo isi amala khurumana.”

30Kila bamureeba bari, “Khabonelo shiina kheesi kane ukhole khubone, nio khukhufukiililemo? Unakhola khabonelo khe kamakaanga shiina? 31#Luky 16.4,15; Zab 78.24; Makh 16.20,21Bakuuka beefwe nga bali mu mubiimbi, baalya maanu, nga ni sharonebwa mu byaronebwa bikhosefu shiri, ‘Abawa biilyo khukhwaama mwikulu ari balye.’ ”

32Yezu wabelamo ari, “Ilala, ilala, imbaboolela ndi s'ali Musa niye uwabawa biilyo khukhwaama mwikulu ta, akhali ndi Paapa wase niye uwabawa biilyo bya ŋali bibyaama mwikulu. 33Khulwekhuba biilyo byeesi Wele abawa nibyo ibyo bibiikha asi khukhwaama mwikulu, nalundi byareera bulamu mu shiibala.”

34Nabo bamwiilamo bari, “Umukasya, n'ukhuwaatsake ifwe biilyo ibyo busheele.”

35Yezu wabaloma ari, “Ise nibyo biilyo bye bulamu. Uyo yeesi uwiitsa isi ise ndi, intsala s'ili mulya ta. Nalundi uyo ufukiilila mus'iise, bulesa sibulimulya ta. 36Nga ise n'imbaboleele inywe, akhaba nga mwamboone, ne shitweela busa simukana khufukiilila mus'iise ta. 37Buli uyo yeesi isi Paapa amba kane etse is'indi. Ne uyo yeesi uwiitsa is'indi, nase imwakaanila. 38Khulwekhuba ise sineekha khukhwaama mwikulu khukhola byeesi samweene ingana ta, ne akhali khukhola by'oyo uwanduma, byeesi akana. 39Uwanduma sheesi akana nisho shino: ari ikhakosaasakho na mutweela kh'ubo beesi amba ta. Ne akhali ari imbalamuse boosi khu shifukhu shimaliilisi. 40Khulwekhuba shino nisho sheesi Paapa wase akana, ari buli mundu yeesi ubona Umwaana nalundi wamufukiilila, ari abe ni bulamu bubukhawawo ta. Ni nase indimulamusa khu shifukhu shimaliilisi.”

41Shino shakila Bayudaaya beŋuluŋuunya, bari lwekhuba abe Yezu walomile ari, “Ise niye biilyo bibyaama mwikulu byeetsa asi.” 42Kila baloma bari, “Uyuno s'ali Yezu, umwaana uwa Yozefu? Sikhwamanya paapa weewe ni maayi weewe? Ari anyala aryeena waloma ari ekha asi khukhwaama mwikulu?”

43Yezu wabelamo ari, “Mukheŋuluŋuunya mwenyene na mwenyene ta. 44Mbaawo umuundu unyala khukhwiitsa is'indi ta, khurusakho nga paapa uwanduma wamureerire is'indi. Ni nase indilamusa umuundu uyo khu shifukhu shimaliilisi. 45#Isay 54.13Baŋoosi baarona bari, ‘Wele alibaleekela boosi.’ Buli mundu yeesi urekeeresa, nalundi weyika khukhwaama khu Paapa, etsa is'indi. 46Ne s'ili bari iliwo uwabonakho khu Paapa ta, khurusakho uyo uwama isi Wele, uyo niye wabonakho Paapa. 47Ilala, imbaboolela ndi uyo ufukiilila, ali ni bulamu bubukhawawo ta. 48Ise indi biilyo bibireera bulamu. 49Akhaba nga baakuuka beenywe nga bali mu mubiimbi baalya maanu, ne bakyelawo baafwa. 50Ne bino nibyo biilyo bibiikha aasi khukhwaama mwikulu, nio buli mundu yeesi ubilyakho alekhe khufwa ta. 51Ise indi biilyo bibireera bulamu, bibyeekha asi khukhwaama mwikulu. Umuundu yeesi ni kane alye khu biilyo bino, kane abe umulamu biilo ni biilo. Nalundi biilyo byeesi kane imbe shiibala nio akile shibe ni bulamu, nikwo kumubili kwase.”

52Ni abweene awo abalukhawo khukhaandisana akari e Bayudaaya boonyene na boonyene nga baloma bari, “Umusaani uyu anyala aryeena khukhuwa ifwe kumubili kweewe ari khulye?”

53Yezu wabaloma ari, “Ilala, ilala, imbaboolela ndi ni mulekha khuulya kumubili kw'Omwaana w'Omuundu, mwalekha ni khuunywa kamafuki keewe, singene mube ni bulamu mus'iinywe ta. 54Uyo yeesi ulya kumubili kwase, wanywa ni kamafuki kaase, aliba ni bulamu bubukhawawo ta, ni nase indimwinyusa ekyele umulamu khu shifukhu shimaliilisi. 55Khulwekhuba kumubili kwase kuli biilyo bya ŋali, ni kamafuki kaase niko she khuunywa sha ŋali. 56Umuundu ulya kumubili kwase, wanywa ni kamafuki kaase, aba amenya mus'iise, ni nase imba imenya mu niye. 57Nga ise n'indi umulamu khulwekhuba Paapa uwanduma ali umulamu, aryo naye umuundu ulya kumubili kwase aliba umulamu khu lwase. 58Nashiryo bino nibyo biilyo bibyeekha asi khukhwaama mwikulu. Sibili nga byeesi baakuuka beenywe baalya ta. Khulwekhuba bakyelawo baafwa. Ne uyo ulya khu biilyo bino, aliiba umulamu biilo ni biilo.”

59Bino Yezu abilomela i Kaperunaumu, nga ali mu ntsu iye khukhwisaayilamo aleekela.

Bilomo bye bulamu bubukhawawo ta

60Bakali khu baleekelwa beewe ni bawulila bino, kila baloma bari, “Khuleekela khuno khuli khwe saambo imangafu naabi. Naanu unyala khurekeeresa bino?”

61Ne akhaba nga mbaawo uwaboolela Yezu ta, ne umweene wamanya busa ari baleekelwa beewe balikho beŋuluŋuunya khu shiindu shino. Kila abalomela ari, “Shisheene isho shonyene shabamalilemo kamaani? 62Ne singa mubona Umwaana w'Omuundu nga aniina atsya isi aba makiboole? 63#Makh 9.13-18Umwoyo uwa Wele niye ukaba bulamu; khulwekhuba kamaani ke kumubili kw'omundu mbaawo sheesi kakhola ta. Bino byeesi imbaboolela bireera Umwoyo uwa Wele, nalundi bireera bulamu. 64Ne iliwo batweela khus'inywe babakhafukiilila ta.” Khulwekhuba Yezu amanyilawo khukhwaama makiboole abo babakhafukiilila ta, akhaba ni n'oyo abe wutsya khumulyamo luwomelo.

65Yezu wabalomela ari, “Shishikilile kila imbaboolela ndi, mbaawo umuundu na mutweela unyala khukhwiitsa is'indi ta, khurusakho nga Paapa wamunyalisiile khushikhola.”

66Khulwe shisheene isho, khukhwaama abweene awo, bakali khu baleekelwa beewe bamururakho, balekha khukyendatsaka ni naye lundi ta. 67Lwanyuma Yezu wareeba liikhumi na babili ari, “Ne inywe? Ni nanywe mukana khuutsya?”

68 # Mat 16.16; Mrk 8.29; Luk 9.20 Simoni Petero wamukobolamo ari, “Umukasya, ne ndi khuba khuutsya isi naanu? Bona iwe uli ni bilomo bibireera bulamu bubukhawawo ta. 69Nalundi ifwe khwafukiilile nga khumanya khuri iwe Umukhosefu uwama isi Wele.”

70Yezu welamo ari, “S'ali ise samweene niye uwabarobola inywe liikhumi na babili? Ne mutweela khus'inywe ali Sitaani.” 71Yezu aba akanikha khu Yuda, umwaana wa Simoni Isikalyoti. Khulwekhuba akhaba nga aba mutweela khu liikhumi na babili, abe niye wutsya khulya mu Yezu luwomelo.

Currently Selected:

Yohana 6: LCE

Highlight

Copy